Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Isaiah 65;1-25

65  “Mmayak mbon oro mîkobụpke iban̄a mi+ ẹyom mi.+ Mmayak mbon oro mîkoyomke mi ẹkụt mi.+ Mmọdọhọ idụt oro mîkokotke enyịn̄ mi+ nte, ‘Se mi mi, se mi mi!’+  “Mmanyan ubọk mi ofụri usen nnọ mbon nsọn̄ibuot,+ mbon oro ẹsan̄ade ke usụn̄ oro mîfọnke,+ oro ẹsan̄ade ke ekikere esịt mmọ;+  mme owo oro ẹsịnede ke otu mmọ emi ẹdade ke iso mi ẹyat+ mi esịt kpukpru ini, emi ẹwade uwa ke mme in̄wan̄+ ẹnyụn̄ ẹnamde nsụn̄ikan̄ uwa+ ọwọrọ ọdọk ke mme kọrikọri,  emi ẹtiede ke mme itie ubụkowo,+ emi n̄ko ẹdan̄de ke mme ataya ukpeme, emi ẹtade unam edi,+ emi efere ndedehe n̄kpọ+ odude ke mme eso mmọ;  mbon emi ẹdọhọde ẹte, ‘Da ke idemfo. Kûsan̄a ukpere mi, mbak edisana idaha mi edibe fi.’+ Mmọ emi ẹdi nsụn̄ikan̄ ke ndudu ibuo mi,+ ẹdi ikan̄ eke asakde ofụri usen.+  “Sese! Ẹmewet enye ke iso mi.+ Ndidopke uyo,+ edi nyọnọ utịp;+ nyọdọn̄ utịp ke ikpanesịt mmọ,+  ke ntak mme ndudue mmọ ye ke ntak mme ndudue mme ete ete mmọ n̄ko,”+ Jehovah ọdọhọ. “Koro mmọ ẹmenam nsụn̄ikan̄ uwa ọwọrọ ọdọk ke ikpọ obot, ẹmenyụn̄ ẹsuene mi+ ke n̄kpri obot,+ ami n̄ko nyebem iso ndomo utịp mmọ ndọn̄ ke ikpanesịt mmọ.”+  Ntem ke Jehovah ọdọhọ ete: “Kpa nte ẹnyenede obufa wine+ ẹto etuek ndien owo ọdọhọ ete, ‘Kûbiat enye,+ sia edidiọn̄ odude ke enye,’+ kpa ntre ke ndinam ke ntak mme asan̄autom mi mbak ndisobo kpukpru owo.+  Ndien nyanam eyen+ oto ke Jacob ọwọrọ nyonyụn̄ nnam andida mme obot+ mi nnyene oto ke Judah ọwọrọ; ndimek ikọt mi ẹyenyụn̄ ẹda enye ẹnyene,+ ndien mme asan̄autom mi ẹyedụn̄ do.+ 10  Ndien Sharon+ ayakabade edi in̄wan̄ mbiet ufene ọnọ mme erọn̄,+ unaisọn̄ itịghede Achor+ oyonyụn̄ edi ebiet nduọkodudu ọnọ mme enan̄, onyụn̄ edi ọnọ ikọt mi oro ẹdiyomde mi.+ 11  “Edi mbufo ẹdi mmọ emi ẹkpọn̄de Jehovah,+ mbon emi ẹfrede edisana obot mi,+ mbon emi ẹbride okpokoro ẹnọ abasi Mfọniso,+ emi ẹnyụn̄ ẹsịnde mbuaha wine ẹyọhọ ẹnọ abasi Akan̄a.+ 12  Ndien ami nyenịm mbufo nnọ akan̄kan̄,+ kpukpru mbufo ẹyenyụn̄ ẹnụhọ ẹte ẹwot mmimọ;+ koro n̄kokotde+ edi mbufo iyereke; mma ndọhọ edi mbufo ikpan̄ke utọn̄;+ mbufo ẹma ẹnyụn̄ ẹnam se idiọkde mi ke enyịn,+ ẹnyụn̄ ẹmek se mîdatke mi esịt.”+ 13  Mmọdo ntem ke Jehovah Akakan Ọbọn̄ Andikara ọdọhọ ete: “Sese! Mme asan̄autom mi ẹyedia n̄kpọ,+ edi biọn̄ ọyọdọn̄ mbufo.+ Sese! Mme asan̄autom mi ẹyen̄wọn̄ n̄kpọ,+ edi itọn̄ ayasat mbufo.+ Sese! Mme asan̄autom mi ẹyedara,+ edi bụt ayanam mbufo.+ 14  Sese! Mme asan̄autom mi ẹyesio n̄kpo idara ke ntak idatesịt,+ edi mbufo ẹyetuan̄a ke ntak ubiak esịt ẹyenyụn̄ ẹfiori n̄kpo ke ntak emi ẹfụhọde ke spirit.+ 15  Ndien mbufo ẹyenịm enyịn̄ mbufo ẹnọ ndimek ikọt mi ẹda ẹn̄wọn̄ọ un̄wọn̄ọ, Jehovah Akakan Ọbọn̄ Andikara oyonyụn̄ owot mbufo owo kiet kiet,+ edi enye oyokot mme asan̄autom esie enyịn̄ efen;+ 16  ntem owo ekededi eke edidiọn̄de idemesie ke isọn̄ edida Abasi akpanikọ ọdiọn̄ idemesie,+ owo ekededi eke edinyụn̄ ọn̄wọn̄ọde un̄wọn̄ọ ke isọn̄ edida Abasi akpanikọ ọn̄wọn̄ọ;+ koro ẹyefre nnanenyịn oro ekebemde iso odu, koro mmọ ẹyenyụn̄ ẹdịbe mi ke enyịn.+ 17  “Koro sese ami mmọn̄ mbot mbufa enyọn̄+ ye obufa isọn̄;+ ndien owo iditịghi+ aba mme akpa n̄kpọ, mmọ idinyụn̄ idụkke owo esịt.+ 18  Edi mbufo ẹdat esịt,+ ẹnyụn̄ ẹdara ke nsinsi ke se ami mbotde.+ Koro sese ami mbot Jerusalem man edi n̄kpọ inemesịt nnyụn̄ mbot mbio obio esie man ẹdi ntak idatesịt.+ 19  Ndien nyadara mban̄a Jerusalem nnyụn̄ ndat esịt mban̄a ikọt mi;+ ndien owo idikopke aba uyo ntuan̄a m̀mê uyo mfụhọ ke esịt esie.”+ 20  “Eyen usen ifan̄ eke awapde eba+ m̀mê akani owo oro mîyọhọke usen esie+ idiwọrọke ke ebiet oro; koro owo ayakpa nte ekpri eyenọwọn̄, okposụkedi emi enye edide isua ikie; ndien amaedi anamidiọk, okposụkedi emi enye edide isua ikie ẹyesụn̄i enye.+ 21  Ndien mmọ ẹyebọp ufọk ẹnyụn̄ ẹdụn̄ ke esịt;+ mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.+ 22  Mmọ idibọpke ndien owo en̄wen odụn̄; mmọ iditọhọ ndien owo en̄wen adia. Koro mme usen ikọt mi ẹdibiet mme usen eto;+ ndien ndimek ikọt mi ẹyedia ufọn utom ubọk mmọ ọyọhọ ọyọhọ.+ 23  Mmọ idikpaha utom ke ikpîkpu,+ idinyụn̄ imanke nditọ inọ n̄kpọndịk;+ koro mmọ ye nditọ mmọ ẹdide ubon+ eke Jehovah ọdiọn̄de.+ 24  Ndien ama ekem, ke mmọ mîkam ikotke kan̄a, ami nyeyere;+ ke adan̄aemi mmọ ẹsụk ẹtịn̄de ikọ, ami nyokop.+ 25  “Wolf+ ye eyenerọn̄ ẹyedia n̄kpọ ọtọkiet,+ ekpe oyonyụn̄ ata nnyanyan̄a nte ayara enan̄;+ ndien amaedi urụkikọt, ntan edidi udia esie.+ Mmọ idinamke ibak+ idinyụn̄ ibiatke n̄kpọ ke ofụri edisana obot mi,”+ Jehovah ọdọhọ.

Mme Ikọ Idakisọn̄