Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Isaiah 59;1-21

59  Sese! Ubọk Jehovah imụhọke ikaha ikan nte enye anyan̄ade,+ utọn̄ esie inyụn̄ idobike ikaha ikan nte enye okopde.+  Baba, akam edi mme ndudue mbufo ẹdi mme n̄kpọ oro ẹsịnde ubahade ke ufọt mbufo ye Abasi mbufo,+ mme idiọkn̄kpọ mbufo ẹnyụn̄ ẹnam enye edịp mbufo iso esie mbak edikop.+  Koro iyịp amanam ekaubọk mbufo ẹdehe,+ ndudue omonyụn̄ anam nnuenubọk mbufo ẹdehe. N̄kpọkinua mbufo ẹmesu nsu.+ Edeme mbufo osụk etịn̄ ata ukwan̄n̄kpọ.+  Idụhe owo eke ofioride okot ke edinen ido,+ inyụn̄ idụhe owo eke okotde ikpe ke akpanikọ. Mmọ ẹbuọt idem ke se mîdụhe,+ ẹnyụn̄ ẹtịn̄ ikpîkpu n̄kpọ.+ Ẹmeyomo afanikọn̄, ẹnyụn̄ ẹman ibak.+  Mmọ ẹmebòt nsen idiọk urụkikọt, ẹnyụn̄ ẹdọk n̄kpan̄utue.+ Owo ekededi oro atade ndusụk nsen mmọ ayakpa, ndien nsen oro akanuahade oyobòt ibọm.+  N̄kpan̄utue mmọ idikabakede idi ọfọn̄idem, mmọ idinyụn̄ idaha utom mmọ ifụk idemmọ.+ Utom mmọ ẹdi utom ibak, edinam afai onyụn̄ odu mmọ ke ekaubọk.+  Ikpat mmọ ẹsụk ẹfehe ẹka ndinam idiọk,+ mmọ ẹnyụn̄ ẹwara ndiduọk iyịp owo eke mîduehe.+ Mme ekikere mmọ ẹdi ekikere ibak;+ mbụme ye n̄wụre ẹdu ke mme ọkpọusụn̄ mmọ.+  Mmọ ẹmefụmi usụn̄ emem,+ baba unenikpe kiet inyụn̄ idụhe ke mme afan̄usụn̄ mmọ.+ Mmọ ẹmenam mme ọkpọusụn̄ mmọ ẹkwan̄a ẹnọ idemmọ.+ Baba owo kiet eke asan̄ade ke mmọ idifiọkke emem.+  Ntak edi oro unenikpe oyomde usụn̄ ọkpọn̄ nnyịn, edinen ido mînyụn̄ isịmke nnyịn. Nnyịn idori enyịn ke un̄wana, edi sese! ekịm; idori enyịn ke uyama, edi nnyịn isan̄a ke ọkpọsọn̄ ekịm oro akade-ka iso.+ 10  Nnyịn ifiọn̄ọ ubọk iyom ibibene nte nnan, inyụn̄ ika iso ifiọn̄ọ ubọk iyom usụn̄ nte mbon oro mînyeneke enyịn.+ Nnyịn imatuak ukot iduọn̄ọ ke ufọt uwemeyo kpa nte ke mfụn̄mfụn̄ mbubreyo; nnyịn itie nte mme akpan̄kpa ke otu mbon emi ẹkopde idem.+ 11  Kpukpru nnyịn ikụni nte bear; inyụn̄ isioro uyo nte ibiom ke ntak mfụhọ.+ Nnyịn ikosụk idori enyịn ke unenikpe,+ edi baba kiet idụhe; idori enyịn ke edinyan̄a, edi enye omodu oyom usụn̄ ọkpọn̄ nnyịn.+ 12  Koro nsọn̄ibuot nnyịn ẹmewak ke iso fo;+ ndien amaedi mme idiọkn̄kpọ nnyịn, mmọ kiet kiet ẹmetie ntiense ẹban̄a nnyịn.+ Koro nsọn̄ibuot nnyịn ẹdu ye nnyịn; amaedi mme ndudue nnyịn, nnyịn imetịm ifiọk mmọ.+ 13  Ẹmebiat ibet ẹnyụn̄ ẹkan̄ Jehovah;+ mmọ ẹnyụn̄ ẹfiak edem ẹkpọn̄ Abasi nnyịn, ẹtịn̄ ẹban̄a ufịk ye nsọn̄ibuot,+ ẹyomo ẹnyụn̄ ẹtịn̄ ikọ nsu eke otode esịt.+ 14  Ẹma ẹbịn unenikpe afiak edem,+ edinen ido onyụn̄ ada nsannsan.+ Koro akpanikọ amatuak ukot ọduọ ke an̄wa obio, se inende inyụn̄ ikemeke ndibe ndụk.+ 15  Ndien akpanikọ osop,+ ẹnyụn̄ ẹbụme owo ekededi oro ọwọn̄ọrede ọkpọn̄ idiọk.+ Ndien Jehovah okụt, onyụn̄ ọdiọk enye ke enyịn nte ke baba unenikpe kiet idụhe.+ 16  Ndien ke ini enye okụtde ke owo ndomokiet idụhe, idem akpa enye nte ke baba esịne-ufọt kiet idụhe.+ Ndien ubọk esie ọkọnọ enye edinyan̄a, edinen ido esie okonyụn̄ an̄wam enye.+ 17  Ekem enye emen edinen ido esịne nte kod ukwak,+ onyụn̄ ayara ndụn edinyan̄a ke ibuot.+ N̄ko-n̄ko, enye emen ọfọn̄idem usiene esịne nte edisịnen̄kpọ+ onyụn̄ ada ifịk ofụk idemesie nte n̄kpọ eke edide anana-ubọk kod.+ 18  Enye ọyọnọ utịp kpa nte ekemde ye se ẹnamde,+ ọyọnọ mme asua esie ifụtesịt, ọnọ mme asua esie utịp oro odotde.+ Enye oyosio mme isuo usiene oro odotde.+ 19  Ndien ọtọn̄ọde ke usoputịn, mmọ ẹyetọn̄ọ ndibak enyịn̄ Jehovah,+ onyụn̄ ọtọn̄ọde ke usiahautịn, mmọ ẹyebak ubọn̄ esie,+ koro enye oyodụk edi nte akpa mmọn̄ eke adahade, emi spirit Jehovah onụkde.+ 20  “Ndien Andifak+ eyedi ke Zion,+ onyụn̄ edi ebịne mbon oro ẹwọn̄ọrede ẹkpọn̄ ubiatibet ke Jacob,”+ uyo Jehovah edi emi. 21  “Ndien amaedi ami, ediomi oro nnamde ye mmọ edi emi,”+ Jehovah ọdọhọ. “Spirit mi oro odude fi ke idem+ ye ikọ mi oro nsịnde fi ke inua+—mmọ idiwọrọke fi ke inua m̀mê ke inua nditọ fo m̀mê ke inua nditọ nditọ fo, ke emi ye ke nsinsi,” Jehovah ọdọhọ.+

Mme Ikọ Idakisọn̄