Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Isaiah 31;1-9

31  Mbọm mmọ eke ẹsụhọrede ẹka Egypt ẹkeyom un̄wam,+ mmọ eke ẹberide edem ke mme enan̄-mbakara,+ ẹnyụn̄ ẹbuọtde idem ke mme chariot ekọn̄,+ ke ntak emi mmọ ẹwakde, ye ke mme enan̄-mbakara ekọn̄, ke ntak emi mmọ ẹdide n̄kpọsọn̄, edi emi mîsehe Edisana Abasi Israel mînyụn̄ iyomke Jehovah.+  Enye n̄ko enyene ọniọn̄,+ oyonyụn̄ ada afanikọn̄ edi,+ enye inyụn̄ ikpụhọkede ikọ esie;+ ndien enye ayadaha an̄wana ye ufọk mme idiọkowo+ onyụn̄ an̄wana ye un̄wam mbon oro ẹbakde ibak.+  Nditọ Egypt ẹdi mme owo,+ idịghe Abasi; mme enan̄-mbakara mmọ ẹdi obụk,+ idịghe spirit. Ndien Jehovah ayanyanade ubọk esie, ndien owo oro ọnọde un̄wam ayatuak ukot ọduọ,+ owo emi onyụn̄ ọbọde un̄wam ọyọduọ, kpukpru mmọ ẹyesịm utịt ini kiet.  Koro ntem ke Jehovah ọdọhọ mi ete: “Kpa nte ekpe okụnide, ih abak ayara ekpe,+ ke ntak unam emi enye omụmde, ke ini ofụri ibat mme ekpemerọn̄ ẹsiode n̄kpo ẹban̄a enye, ndien kpa ye uyom oro mmọ ẹnamde idem idinyekke enye, editịm oro mmọ ẹsịnde inyụn̄ inamke enye efehe; kpasụk ntre ke Jehovah mme udịm edisụhọde edin̄wana ekọn̄ ke Obot Zion ye ke ekpri obot esie.+  Kpa nte mme inuen emi ẹfede, kpasụk ntre ke Jehovah mme udịm edikpeme Jerusalem.+ Enye eyekpeme enye onyụn̄ anyan̄a enye.+ Enye ayatua enye mbọm onyụn̄ anam enye efehe ọbọhọ.”  “Mbufo nditọ Israel ẹfiak ẹtiene+ Enye emi mbufo ẹnen̄erede ẹsọn̄ ibuot ye enye.+  Koro ke usen oro mmọ ẹyesịn mbukpo abasi silver mmọ ye mme abasi gold mmọ emi mînyeneke ufọn,+ oro ẹdade ubọk mbufo ẹnam ẹnọ idem mbufo nte idiọkn̄kpọ.+  Ndien owo Assyria ọyọduọ ke akan̄kan̄, edi idịghe akan̄kan̄ owo; akan̄kan̄ ayadia enye, edi idịghe akan̄kan̄ owo.+ Ndien enye eyefehe ke ntak akan̄kan̄, ẹyenyụn̄ ẹnyịk n̄kparawa esie ẹnam ọkpọsọn̄ utom.  Ndien akwa itiat esie eyebe efep ke ntak ọkpọsọn̄ ndịk, idem oyonyụn̄ enyek mbọn̄ esie ke ntak idiọn̄ọ,”+ emi edi uyo Jehovah, emi un̄wana esie odude ke Zion, akwa ikan̄+ esie onyụn̄ odude ke Jerusalem.

Mme Ikọ Idakisọn̄