Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 9;1-29

9  Ndien Abasi ọdiọn̄ Noah ye nditọ esie onyụn̄ ọdọhọ mmọ ete: “Mbufo ẹtọt ẹnyụn̄ ẹwak ẹnyụn̄ ẹyọhọ isọn̄.+  Ndịk ye uten̄e mbufo ẹyenam kpukpru odu-uwem edibotn̄kpọ ke isọn̄ ye kpukpru mme edibotn̄kpọ emi ẹfede ke enyọn̄ ye kpukpru se inyọnide ke isọn̄ ye kpukpru iyak ke inyan̄. Ke emi, mmayak mmọ nsịn mbufo ke ubọk.+  Kpukpru unam eke ẹnyọnide emi ẹdude uwem ẹyedi udia mbufo.+ Mmonyụn̄ nyak kpukpru mmọ nnọ mbufo kpa nte n̄kọnọde mbufo awawa ikọn̄.+  Mbufo ẹkûta+ unam ye ukpọn̄+ esie, oro edi, iyịp+ esie.  N̄ko, nyobụp iyịp ukpọn̄ mbufo ke ubọk mbufo. Nyobụp enye ke ubọk kpukpru odu-uwem edibotn̄kpọ; nyonyụn̄ mbụp ke ubọk owo, ye ke ubọk eyenete esie.+  Owo ekededi eke ọduọkde iyịp owo, owo ọyọduọk iyịp esie,+ koro Abasi okobotde owo ke mbiet esiemmọ.  Edi mbufo ẹtọt ẹnyụn̄ ẹwak ẹnyụn̄ ẹsiaha ke isọn̄ ẹnyụn̄ ẹwak ke esịt.”+  Ndien Abasi ọdọhọ Noah ye nditọiren esie ete:  “Ami mmanam ediomi+ ye mbufo ye nditọ mbufo emi ẹditienede mbufo,+ 10  ye kpukpru ukpọn̄ eke ẹdude uwem oro ẹdude ye mbufo, inuen ye unam ikọt ye kpukpru odu-uwem edibotn̄kpọ ke isọn̄ oro ẹdude ye mbufo, ọtọn̄ọde ke kpukpru mmọ oro ẹkewọn̄ọde ke ubom tutu esịm kpukpru odu-uwem edibotn̄kpọ ke isọn̄.+ 11  Mmanam ediomi ye mbufo: Kpukpru obụkidem iditakke aba ke mmọn̄ ukwọ, ndien ukwọ iditọn̄ọke aba ntak isobo isọn̄.”+ 12  Ndien Abasi adian do ete: “Emi edi idiọn̄ọ+ ediomi emi nnịmde ke ufọt mi ye mbufo ye ke ufọt kpukpru ukpọn̄ eke ẹdude uwem emi ẹdude ye mbufo, ke ofụri emana. 13  Mmenịm akpara+ mi ke ikpaenyọn̄, ndien enye eyedi idiọn̄ọ ediomi ke ufọt mi ye isọn̄. 14  Ndien ke ini nnamde obubịt enyọn̄ ofụk isọn̄, akpara ọyọwọrọ ke obubịt enyọn̄ oro. 15  Ndien nyeti ediomi+ emi nnamde ye mbufo ye kpukpru ukpọn̄ ke otu kpukpru obụkidem;+ ndien mmọn̄ idikabakede aba idi ukwọ isobo ofụri obụkidem.+ 16  Ndien akpara oyodu ke obubịt enyọn̄,+ ndien nyokụt enye nnyụn̄ nti nsinsi ediomi+ emi Abasi akanamde ye kpukpru ukpọn̄ eke ẹdude uwem ke otu kpukpru obụkidem eke ẹdude ke isọn̄.”+ 17  Ndien Abasi ọtọn̄ọ ntak ọdọhọ Noah ete: “Emi edi idiọn̄ọ ediomi oro nnamde ye kpukpru obụkidem eke ẹdude ke isọn̄.”+ 18  Ndien nditọ Noah+ oro ẹkewọn̄ọde ke ubom ẹkedi Shem ye Ham ye Japheth. Ekem Ham obon Canaan.+ 19  Mbita emi ẹkedi nditọ Noah, ndien kpukpru mme andidụn̄ isọn̄ ẹkesiaha ẹto mmọ.+ 20  Ekem Noah akabade edi ọtọin̄wan̄+ onyụn̄ ọtọ in̄wan̄ vine.+ 21  Ndien enye ọn̄wọn̄ wine oyụhọ+ onyụn̄ ana iferi ke ufọt tent esie. 22  Ekem Ham,+ ete Canaan, okụt ete esie iferi+ onyụn̄ eketịn̄ ọnọ nditọeka esie iba emi ẹkedude ke esien.+ 23  Ndien Shem ye Japheth ẹda ọfọn̄+ ẹdori ke afara mmọ ẹnyụn̄ ẹsan̄a edem edem ẹdụk. Ntem ke mmọ ẹfụk ete mmọ iferi, edi ẹwọn̄ọde iso ẹse ebiet efen, ndien mmọ ikwe iferi ete mmọ.+ 24  Ekem Noah edemede ke wine esie onyụn̄ edifiọk se ekperedem eyen esie akanamde enye. 25  Ndien enye ọdọhọ ete: “Osụk ọdọdiọk ọnọ Canaan.+ Enye eyedi n̄kpri-n̄kan ofụn ọnọ nditọeka esie.”+ 26  Ndien enye adian do ete: “Yak itoro enyene Jehovah,+ Abasi Shem, Yak Canaan akabade edi ofụn ọnọ enye.+ 27  Yak Abasi ọnọ Japheth ufan̄ oro okponde ekem, Yak enye onyụn̄ odụn̄ ke mme tent Shem.+ Yak Canaan edi ofụn esie n̄ko.” 28  Ndien Noah odu uwem isua ikie ita ye aba ye duop ke ukwọ ama ekebe.+ 29  Ntem ofụri isua uwem Noah ekedi isua ikie usụkkiet ye aba ye duop ndien enye akpa.+

Mme Ikọ Idakisọn̄