Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 50;1-26

50  Ndien Joseph ọduọ ofụk ete esie iso+ onyụn̄ atua enye onyụn̄ etịm enye inua.+  Ekem Joseph ọnọ mme asan̄autom esie, kpa mbiausọbọ, uyo ete ẹtịm okpo ete imọ ẹnịm.+ Ntre mbiausọbọ oro ẹtịm okpo Israel ẹnịm,  akada mmọ ofụri usen aba nditịm okpo esie nnịm, koro ibat usen emi ke mmọ ẹkesida ẹtịm okpo ẹnịm, ndien nditọ Egypt ẹtua enye ke usen ata ye duop.+  Ekem ke mme usen emi mmọ ẹtuade enye ẹma ẹkebe, Joseph ọdọhọ mbonufọk Pharaoh, ete: “Edieke n̄kụtde mfọn ke iso mbufo,+ mbọk, ẹdọhọ Pharaoh, ẹte,  ‘Ete mi ama anam mi n̄n̄wọn̄ọ,+ ọdọhọde ete: “Sese! Ami mmọn̄ n̄kpa.+ Afo edibụk mi+ ke udi mi emi n̄ketịbide ke isọn̄ Canaan.”+ Mbọk, yak mi ndọk n̄ka n̄kobụk ete mi, ekem nyafiak ndi.’”  Ndien Pharaoh ọdọhọ ete: “Dọk ka kobụk usọ kpa nte enye akanamde fi ọn̄wọn̄ọ.”+  Ntre Joseph ọdọk aka ndibụk ete esie, kpukpru mme asan̄autom Pharaoh ẹnyụn̄ ẹsan̄a ye enye, kpukpru mbiowo+ ufọk esie ye kpukpru mbiowo isọn̄ Egypt,  ye kpukpru mbonufọk Joseph ye nditọete esie ye mbonufọk ete esie.+ Sụk n̄kpri nditọ mmọ ye erọn̄ mmọ ye enan̄ mmọ ke mmọ ẹkekpọn̄ ke isọn̄ Goshen.  Mme chariot+ ye mme awat enan̄-mbakara n̄ko ẹsan̄a ye enye ẹka, ndien otuowo ẹwak etieti. 10  Ekem mmọ ẹdisịm ọtọ udịghi wheat+ ke Atad, emi odude ke ikpehe Jordan,+ mmọ ẹnyụn̄ ẹtie do ẹtua ata ọkpọsọn̄ eyet ndien enye enịm edinam ufụhọ n̄kpa ete esie ke usen itiaba.+ 11  Ndien mbon Canaan emi ẹdụn̄de ke obio oro ẹkụt edinam ufụhọ n̄kpa emi ke ọtọ udịghi wheat ke Atad, ndien mmọ ẹfiori ẹte: “Akwa mfụhọ edi emi ọnọ nditọ Egypt!” Ntak edi oro ẹkotde enye Abel-mizraim, emi odude ke ikpehe Jordan.+ 12  Ndien nditọ esie ẹnam kpa nte enye eketemede mmọ.+ 13  Ntre ke nditọ esie ẹmen enye ẹdisịm isọn̄ Canaan ẹnyụn̄ ẹbụk enye ke abaitiat oro odude ke in̄wan̄ Machpelah, emi asakde iso ese Mamre,+ emi Abraham ọkọbọde Ephron, owo Hittite, edep man ada enyene nte itie ubụkowo. 14  Ekem ke Joseph ama okobụk ete esie, enye ye nditọete esie ye kpukpru mbon oro ẹkesan̄ade ye enye ẹka ndibụk ete esie, ẹfiak ẹnyọn̄ọ Egypt. 15  Ke ini nditọete Joseph ẹkụtde ke ete mmimọ amakpa, mmọ ẹtọn̄ọ ndidọhọ ẹte: “Ekeme ndidi Joseph ke enyenyene usua ke esịt aban̄a nnyịn+ ndien enye iditreke ndisio nnyịn usiene ofụri idiọkn̄kpọ oro ikanamde enye.”+ 16  Ntre mmọ ẹtịn̄ ikọ ewụhọ emi ẹnọ Joseph ẹte: “Mbemiso usọ akpade enye ama owụk ete, 17  ‘Ntem ke mbufo ẹdidọhọ Joseph ẹte: “Mmekpe fi ubọk nte, mbọk, dahado nọ+ nditọusọ ke ndudue ye idiọkn̄kpọ oro mmọ ẹkenamde fi.”’+ Ndien, mbọk, dahado nọ ikọt Abasi ete fo ke ndudue mmọ.”+ Ndien Joseph atua ke ini mmọ ẹtịn̄de ikọ emi ye enye. 18  Ekem nditọete esie n̄ko ẹdiduọ ke isọn̄ ke iso esie ẹnyụn̄ ẹdọhọ ẹte: “Sese nnyịn idi ifịn fo!”+ 19  Ndien Joseph ọdọhọ mmọ ete: “Ẹkûfehe ndịk, nte ami ndu ke itie Abasi?+ 20  Mbufo ẹkeduak idiọk uduak ẹban̄a mi. Edi Abasi akaduak eti n̄kpọ man akpanam nte edide mfịn emi ete inịm ediwak owo uwem.+ 21  Ntre ẹkûfehe ndịk. Ami nyọnọ mbufo ye n̄kpri nditọ mbufo udia.” Ntem ke enye ọdọn̄ mmọ esịt onyụn̄ etịn̄ ikọ ndisụk mmọ esịt.+ 22  Ndien Joseph ye ufọk ete esie ẹdụn̄ ke Egypt; ndien Joseph odu uwem isua ikie ye duop. 23  Ndien Joseph okụt nditọ Ephraim eke ọyọhọ emana ita,+ ye nditọ Machir,+ eyen Manasseh. Mmọ ẹkemana ẹdoro Joseph ke edọn̄.+ 24  Ekem Joseph ọdọhọ nditọete esie ete: “Ami mmọn̄ n̄kpa; edi Abasi iditreke ndiwọn̄ọde ntịn̄enyịn esie nnọ mbufo,+ idinyụn̄ itreke ndision̄o mbufo ke isọn̄ emi n̄ka isọn̄ eke enye ọkọn̄wọn̄ọde ọnọ Abraham ye Isaac ye Jacob.”+ 25  Ntem Joseph anam nditọiren Israel ẹn̄wọn̄ọ, ọdọhọde ete: “Abasi iditreke ndiwọn̄ọde ntịn̄enyịn esie nnọ mbufo. Ndien mbufo ẹnyene nditan̄ ọkpọ mi ke ebiet emi mfep.”+ 26  Ekem Joseph akpa ke esịmde isua ikie ye duop; ndien mmọ ẹtịm okpo esie ẹnịm,+ ẹnyụn̄ ẹsịn enye ke ekebe okpo ke Egypt.  

Mme Ikọ Idakisọn̄