Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 47;1-31

47  Ekem Joseph edisian Pharaoh ete:+ “Ete mi ye nditọete mi ẹmesan̄a ye erọn̄ ye enan̄ mmọ ye kpukpru se mmọ ẹnyenede ẹto isọn̄ Canaan ẹdi, ndien sese mmọ mmọdo ke isọn̄ Goshen.”+  Ndien enye osio owo ition ke otu nditọete esie ada aka iso Pharaoh.+  Ekem Pharaoh ọdọhọ nditọete esie ete: “Nso idi ubọkutom mbufo?”+ Ntre mmọ ẹbọrọ Pharaoh ẹte: “Mme asan̄autom fo ye mme ete ete+ nnyịn idi mme ekpemerọn̄.”+  Ekem mmọ ẹdọhọ Pharaoh ẹte: “Nnyịn imedi ndidụn̄ nte isenowo ke isọn̄ emi,+ koro mbiet idụhe se ufene mme asan̄autom fo ẹtade,+ sia akan̄ ọsọn̄de ubọk ke isọn̄ Canaan.+ Mbọk, yak mme asan̄autom fo ẹdụn̄ ke isọn̄ Goshen.”+  Ndien Pharaoh ọdọhọ Joseph ete: “Usọ ye nditọusọ ẹmedi ẹtiene fi.  Isọn̄ Egypt esịne fi ke ubọk.+ Nam usọ ye nditọusọ ẹdụn̄ ke ebiet emi ọfọnde akan ke isọn̄ emi.+ Yak mmọ ẹdụn̄ ke isọn̄ Goshen,+ ndien edieke afo ọfiọkde ete mbon uko+ ẹdu ke otu mmọ, mek mmọ nte etubom mme andise mban̄a enan̄ mi.”+  Ndien Joseph ada Jacob, ete esie, ediwụt Pharaoh, Jacob onyụn̄ ọdiọn̄ Pharaoh.+  Ntem Pharaoh ọdọhọ Jacob ete: “Afo edi isua ifan̄?”  Ndien Jacob ọbọrọ Pharaoh ete: “Isua oro ndude uwem nte esenowo edi isua ikie ye edịp ye duop.+ Isua uwem mi iwakke ẹnyụn̄ ẹyọhọ ye ukụt,+ mmọ iwakke nte isua uwem mme ete mi ke ini mmọ ẹkedide isenowo.”+ 10  Ekem Jacob ọdiọn̄ Pharaoh onyụn̄ ọwọrọ ọkpọn̄ iso Pharaoh.+ 11  Ntem Joseph anam ete esie ye nditọete esie ẹdụn̄ do onyụn̄ ọnọ mmọ udeme ke isọn̄ Egypt, ke ebiet emi ọfọnde akan, ke isọn̄ Rameses,+ kpa nte Pharaoh okowụkde. 12  Ndien Joseph ọnọ ete esie ye nditọete esie ye ofụri mbonufọk ete esie udia+ nte ibat n̄kpri nditọ mmọ edide.+ 13  Udia ikodụhe ke ofụri isọn̄ koro akan̄ ọkọsọn̄de ubọk etieti;+ ndien udia okụre ke isọn̄ Egypt ye ke isọn̄ Canaan ke ntak akan̄ oro.+ 14  Ndien Joseph ọbọ kpukpru okụk oro okodude ke isọn̄ Egypt ye ke isọn̄ Canaan ke udia* oro mme owo ẹkedepde;+ Joseph ada okụk oro edinịm ke ufọk Pharaoh. 15  Ekem okụk okụre ke isọn̄ Egypt ye ke isọn̄ Canaan, ndien kpukpru nditọ Egypt ẹka ẹbịne Joseph ẹkedọhọ ẹte: “Nọ nnyịn udia!+ Ntak emi nnyịn idikpan̄ade ke iso fo koro okụk okụrede?”+ 16  Ndien Joseph ọbọrọ ete: “Edieke edide okụk okụre, ẹtan̄ ufene mbufo ẹdi man nnọ mbufo udia.” 17  Ndien mmọ ẹtọn̄ọ nditan̄ ufene mmọ nsọk Joseph; ndien Joseph ọbọ mmọ mme enan̄-mbakara ye erọn̄ ye enan̄ ye mme ass+ okpụhọ ọnọ mmọ udia, enye onyụn̄ ọbọ mmọ kpukpru ufene mmọ okpụhọ ọnọ mmọ udia ke ofụri isua oro. 18  Ekem isua oro ebe, mmọ ẹdi ẹbịne enye ke isua oro eketienede ẹdidọhọ enye ẹte: “Nnyịn iditreke ndisian ọbọn̄ mi nte ke ima itan̄ kpukpru okụk ye ufene nnyịn isọk ọbọn̄ mi.+ N̄kpọ ndomokiet isụhọke aba ndida nsọk ọbọn̄ mi ke mîbọhọke idem nnyịn ye isọn̄ nnyịn.+ 19  Ntak emi idikpan̄ade ke iso fo,+ nnyịn ye isọn̄ nnyịn? Dep nnyịn ye isọn̄ nnyịn nyụn̄ nọ nnyịn udia,+ ndien nnyịn iyedi ifịn Pharaoh, isọn̄ nnyịn oyonyụn̄ edi eke esie; nọ nnyịn wheat man idu uwem mbak nnyịn idikpan̄a, isọn̄ nnyịn edinyụn̄ ana ndon.”+ 20  Ntre Joseph edep kpukpru isọn̄ nditọ Egypt ọnọ Pharaoh,+ koro nditọ Egypt ẹkenyamde in̄wan̄ mmọ ke ntak emi akan̄ okomụmde mmọ etieti; ndien isọn̄ akabade edi eke Pharaoh. 21  Ndien enye osion̄o mme owo ọtọn̄ọde ke edem kiet ke Egypt tutu esịm eken edidọn̄ ke ikpọ obio.+ 22  Isọn̄ mme oku kpọt ke enye mîkedepke,+ koro edi Pharaoh ekesinọ mme oku udeme udia mmọ, ndien mmọ ẹkesidia se Pharaoh ọnọde mmọ.+ Oro anam mmọ mîkanyamke isọn̄ mmọ.+ 23  Ekem Joseph ọdọhọ mme owo ete: “Sese mmedep mbufo ye isọn̄ mbufo mfịn emi nnọ Pharaoh. Ẹbọ n̄kpasịp ẹtọ ke isọn̄.+ 24  Ke ini enye on̄wụmde,+ mbufo ẹyeda mbak kiet ke itie ition ẹsọk Pharaoh,+ ndien mbak inan̄ ẹyedi eke mbufo nte n̄kpasịp nditọ ke in̄wan̄ ye nte udia mbufo ye eke mbonufọk mbufo ye eke n̄kpri nditọ mbufo.”+ 25  Ndien mmọ ẹdọhọ ẹte: “Afo emenịm nnyịn uwem.+ Yak nnyịn ikụt mfọn ke iso ọbọn̄ mi, nnyịn iyonyụn̄ ikabade idi ifịn Pharaoh.”+ 26  Ndien Joseph owụk ewụhọ aban̄a in̄wan̄ ke Egypt tutu esịm mfịn emi ete ẹsida mbak mbun̄wụm kiet ke itie ition ẹsọk Pharaoh. In̄wan̄ mme oku kpọt mîkedịghe eke Pharaoh.+ 27  Ndien Israel ẹdụn̄ ke isọn̄ Goshen,+ ke isọn̄ Egypt; ndien mmọ ẹkọ inyene, ẹtọt ẹnyụn̄ ẹwak etieti.+ 28  Ndien Jacob odụn̄ ke isọn̄ Egypt ke isua efịteba, ntre ofụri isua uwem Jacob edi isua ikie ye aba ye itiaba.+ 29  Edikem ini n̄kpa+ Israel asan̄a ekpere. Ntre enye okot Joseph, eyen esie, ọdọhọ enye ete: “Edieke n̄kụtde mfọn ke iso fo, mbọk, sịn ubọk fo ke idak ifụhi mi,+ nyụn̄ wụt mi ima-mfọnido ye ibetedem.+ (Mbọk, kûbụk mi ke Egypt.)+ 30  Nnyene ndibụhọ ye mme ete mi,+ ndien afo enyene ndimen mi nsio ke Egypt n̄kobụk ke udi mmọ.”+ Ntre enye ọdọhọ ete: “Nyanam nte afo ọdọhọde.” 31  Ekem enye ọdọhọ ete: “N̄wọn̄ọ nọ mi.” Ntre enye ọn̄wọn̄ọ ọnọ enye.+ Ndien Israel anyanade okụbọ ke ibuot n̄kpana.+

Mme Ikọ Idakisọn̄

Eyedi wheat m̀mê barley.