Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Genesis 46;1-34

46  Edikem Israel ye ofụri ikọtufọk esie ẹdaha isan̄ ẹnyụn̄ ẹdisịm Beer-sheba,+ ndien enye awa uwa ọnọ Abasi ete esie Isaac.+  Ndien Abasi ọdọhọ Israel ke n̄kukụt ke okoneyo ete:+ “Jacob, Jacob!” ndien enye ọdọhọ ete: “Se mi mi!”+  Ndien enye ọdọhọ ete: “Ami ndi ata Abasi,+ Abasi usọ.+ Kûfehe ndịk ndisụhọde n̄ka Egypt, koro nyanam fi akabade edi akamba idụt do.+  Ami nyasan̄a ye afo nsụhọde n̄ka Egypt, ndinyụn̄ ntreke ndida fi n̄ko ndọk ndi;+ ndien Joseph ayada ubọk esie ekịbi fi enyịn.”+  Ekem Jacob ọwọrọ ke Beer-sheba, ndien nditọiren Israel ẹmen Jacob, ete mmọ, ye n̄kpri nditọ mmọ ye iban mmọ ke ukpatn̄kpọ oro Pharaoh ọkọnọde ete ẹda ẹdimen enye.+  Mmọ ẹnyụn̄ ẹtan̄ ufene ye inyene oro mmọ ẹkenyenede ke isọn̄ Canaan.+ Ekem Jacob ye kpukpru mbonufọk esie ẹdisịm Egypt.  Enye akasan̄a ye nditọiren esie ye nditọiban esie ye nditọ nditọ esie iren ye iban, kpukpru mbonufọk esie ẹnyụn̄ ẹsan̄a ye enye ẹdi Egypt.+  Mmọ emi ẹdi enyịn̄ nditọiren Israel emi ẹkedide Egypt:+ Jacob ye nditọiren esie: Akpan Jacob ekedi Reuben.+  Ndien nditọiren Reuben ẹkedi Hanoch ye Pallu ye Hezron ye Carmi.+ 10  Ndien nditọiren Simeon+ ẹkedi Jemuel ye Jamin ye Ohad ye Jachin+ ye Zohar ye Shaul+ emi eyen Canaan akamande. 11  Ndien nditọiren Levi+ ẹkedi Gershon+ ye Kohath+ ye Merari.+ 12  Ndien nditọiren Judah+ ẹkedi Er+ ye Onan+ ye Shelah+ ye Perez+ ye Zerah.+ Edi Er ye Onan ẹma ẹkpan̄a ke isọn̄ Canaan.+ Ndien nditọiren Perez ẹkedi Hezron+ ye Hamul.+ 13  Ndien nditọiren Issachar+ ẹkedi Tola+ ye Puvah+ ye Iob ye Shimron.+ 14  Ndien nditọiren Zebulun+ ẹkedi Sered ye Elon ye Jahleel.+ 15  Mmọ emi ẹdi nditọiren Leah,+ emi enye akamande ọnọ Jacob ke Paddan-aram, ọkọrọ ye Dinah,+ adiaha esie. Kpukpru nditọiren ye nditọiban esie ẹkedi ukpọn̄ edịp ye duopeta. 16  Ndien nditọiren Gad+ ẹkedi Ziphion ye Haggi, Shuni ye Ezbon, Eri ye Arodi ye Areli.+ 17  Ndien nditọiren Asher+ ẹkedi Imnah ye Ishvah ye Ishvi ye Beriah+ ye Serah, eyeneka mmọ an̄wan. Ndien nditọiren Beriah ẹkedi Heber ye Malchiel.+ 18  Mmọ emi ẹdi nditọiren Zilpah,+ emi Laban ekemende ọnọ Leah, adiaha esie. Enye onyụn̄ aman mmọ ọnọ Jacob: ukpọn̄ efịtekiet. 19  Nditọiren Rachel,+ n̄wan Jacob, ẹkedi Joseph+ ye Benjamin.+ 20  Ekem Asenath,+ eyen Potiphera, oku On, aman Manasseh+ ye Ephraim+ ọnọ Joseph ke isọn̄ Egypt. 21  Ndien nditọiren Benjamin ẹkedi Bela+ ye Becher+ ye Ashbel, Gera+ ye Naaman,+ Ehi ye Rosh, Muppim+ ye Huppim+ ye Ard. 22  Mmọ emi ẹdi nditọiren Rachel emi ẹkemanade ẹnọ Jacob. Kpukpru mmọ ẹkedi ukpọn̄ duopenan̄. 23  Ndien nditọiren Dan:+ Hushim.+ 24  Ndien nditọiren Naphtali+ ẹkedi Jahzeel ye Guni+ ye Jezer ye Shillem.+ 25  Mmọ emi ẹdi nditọiren Bilhah,+ emi Laban ekemende ọnọ Rachel, udun̄wan esie. Ekem enye aman mmọ emi ọnọ Jacob; kpukpru mmọ ẹkedi ukpọn̄ itiaba. 26  Kpukpru ukpọn̄ emi ẹkesan̄ade ye Jacob ẹka Egypt, ke ẹsiode iban nditọiren esie ẹfep, ẹkewọn̄ọ Jacob ke n̄kpatian̄ ukot.+ Kpukpru mmọ ẹkedi ukpọn̄ ata ye itiokiet. 27  Ndien nditọiren Joseph emi ẹkemanade ẹnọ enye ke Egypt ẹkedi ukpọn̄ iba. Kpukpru ukpọn̄ ufọk Jacob emi ẹkedide Egypt ẹkedi ata ye duop.+ 28  Ndien enye osio Judah+ ọdọn̄ ebem enye iso okosobo ye Joseph onyụn̄ ọdọhọ ke imọ ke idi Goshen. Ekem mmọ ẹdisịm isọn̄ Goshen.+ 29  Ndien Joseph etịm chariot esie onyụn̄ aka ndikosobo ye Israel, ete esie, ke Goshen.+ Ke ini enye esịmde ete esie, enye inikiet inikiet awan̄a enye ke itọn̄ onyụn̄ atua eyet ke itọn̄ esie ndien ndien.+ 30  Ekem Israel ọdọhọ Joseph ete: “Ke emi mma n̄kokụt fi iso nte ke afo ke osụk ododu ke uwem, mmenyịme ndikpa ndien.”+ 31  Ekem Joseph ọdọhọ nditọete esie ye mbonufọk ete esie ete: “Yak mi ndọk n̄ka n̄kasian Pharaoh nte,+ ‘Nditọete mi ye mbonufọk ete mi emi ẹkedude ke isọn̄ Canaan ẹmeto ẹdi ndidu mi ye ami.+ 32  Ndien irenowo mmọ ẹdi mme ekpemerọn̄,+ koro mmọ ẹbọkde mme ufene;+ ndien mmọ ẹma ẹda erọn̄ mmọ ye enan̄ mmọ ye kpukpru se mmọ ẹnyenede ẹdi mi.’+ 33  Ntem ke ini Pharaoh edikotde mbufo obụp ete, ‘Nso idi ubọkutom mbufo?’ 34  Mbufo ẹdọhọ ẹte, ‘Mme asan̄autom fo ẹdi mme ọbọk ufene toto ke uyen tutu esịm emi, nnyịn ye mme ete ete nnyịn,’+ man mbufo ẹkpedụn̄ ke isọn̄ Goshen,+ koro kpukpru mme ekpemerọn̄ ẹdide mbubiam n̄kpọ ẹnọ Egypt.”+

Mme Ikọ Idakisọn̄