Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 45;1-28

45  Ntem Joseph ikemeke ndimụm idem aba n̄kama ke iso kpukpru mbon oro ẹdude ye enye.+ Ntre enye ofiori ete: “Ẹnam kpukpru owo ẹwọn̄ọ ẹkpọn̄ mi!” Ndien owo ndomokiet ikodụhe ye enye ke ini Joseph ayararede idem ọnọ nditọete esie.+  Ndien enye ọtọn̄ọ ndimenede uyo ntua,+ nditọ Egypt ye mbon ufọk Pharaoh ẹnyụn̄ ẹkop.  Ekem Joseph ọdọhọ nditọete esie ete: “Ami ndi Joseph. Nte ete mi ke osụk ododu ke uwem?” Edi nditọete esie ikemeke ndibọrọ enye n̄kpọ ndomokiet, koro esịt eketịmerede mmọ ke ntak esie.+  Ntre Joseph ọdọhọ nditọete esie ete: “Mbọk, ẹsan̄a ẹkpere mi.” Ndien mmọ ẹsan̄a ẹkpere enye. Ekem enye ọdọhọ ete: “Ami ndi Joseph, eyenete mbufo, emi mbufo ẹkenyamde ẹnọ ẹka Egypt.+  Edi ẹkûfụhọ, ẹkûnyụn̄ ẹyat idem mbufo esịt,+ koro ẹkenyamde mi ẹnọ ndi mi; koro Abasi ọkọdọn̄ mi ete mbem mbufo iso ndi man ẹkpenịm mbufo uwem.+  Koro ọyọhọ isua iba edi emi nte akan̄ okodu ke isọn̄,+ ndien isua ition ke ẹsụk ẹsosụhọ emi utọ m̀mê ukpen̄e mîdidụhe.+  Edi Abasi ọkọdọn̄ mi mbem mbufo iso ndi man ndinam nsụhọ+ odu ọnọ mbufo ke isọn̄ nnyụn̄ nda akwa edinyan̄a nnịm mbufo uwem.  Ntem idịghe mbufo ẹkedọn̄ mi ndi mi,+ edi ata Abasi ọkọdọn̄ mi ndi, man enye ekpemek mi ete ndi ete+ nnọ Pharaoh ye ọbọn̄ ofụri ufọk esie ye nte andikara ofụri isọn̄ Egypt.  “Ẹsọp ẹdọk ẹtiene ete mi ẹnyụn̄ ẹkedọhọ enye ẹte, ‘Eyen fo Joseph ọdọhọ ete: “Abasi emek mi nte ọbọn̄ ofụri Egypt.+ Sụhọde tiene mi. Kûbiat ini. 10  Ndien afo oyodụn̄ ke isọn̄ Goshen,+ oyonyụn̄ odu ekpere mi, afo ye nditọ fo ye nditọ nditọ fo ye erọn̄ fo ye enan̄ fo ye kpukpru se afo enyenede. 11  Ndien nyọnọ fi udia do, koro isua akan̄ ition ke ẹsụk ẹsosụhọ;+ mbak unana edisịm fi ye ufọk fo ye kpukpru se afo enyenede.”’ 12  Ndien mbufo ye Benjamin, eyeneka mi, ẹmekụt ke ami ntịn̄ ikọ emi nnọ mbufo.+ 13  Ntre mbufo ẹsian ete mi ofụri ubọn̄ mi ke Egypt ye kpukpru se mbufo ẹkụtde; mbufo ẹnyụn̄ ẹsọp ẹkeda ete mi ẹsụhọde ẹdi mi.” 14  Ekem enye awan̄a Benjamin, eyeneka esie, ke itọn̄ atua, Benjamin onyụn̄ atua eyet ke itọn̄ esie.+ 15  Ndien enye etịm kpukpru nditọete esie inua onyụn̄ awan̄a mmọ ke itọn̄ atua,+ ekem nditọete esie ẹneme nneme ye enye. 16  Ndien mbụk emi ekesịm ufọk Pharaoh, ete: “Nditọete Joseph ẹmedi!” Ndien n̄kpọ emi enem Pharaoh ye mme asan̄autom esie esịt.+ 17  Ndien Pharaoh ọdọhọ Joseph ete: “Dọhọ nditọusọ ete, ‘Se mbufo ẹdinamde edi emi: Mbufo ẹbọp mbiomo ke unam mbiomo mbufo ẹnyụn̄ ẹka ke isọn̄ Canaan,+ 18  ẹnyụn̄ ẹkeda ete mbufo ye mbonufọk mbufo ẹdidụn̄ mi ye ami, man n̄kpọnọ mbufo eti itie ke isọn̄ Egypt; ẹnyụn̄ ẹdia isek isọn̄ emi.+ 19  Mmonyụn̄ n̄wụk fi nte:+ “Nam ntem: Ẹda ukpatn̄kpọ+ ke isọn̄ Egypt ẹkemen n̄kpri nditọ mbufo ye iban mbufo, ẹnyụn̄ ẹda kiet ẹmen ete mbufo ẹdi mi.+ 20  Edi ẹkûkere n̄kpọ ndụn̄ufọk mbufo,+ koro nti n̄kpọ ke ofụri isọn̄ Egypt ẹnyene mbufo.”’”+ 21  Ndien nditọiren Israel ẹnam kpasụk ntre, ndien Joseph ọnọ mmọ ukpatn̄kpọ kpa nte Pharaoh okowụkde onyụn̄ ọnọ mmọ udia+ emi mmọ ẹdidiade ke usụn̄. 22  Enye ọnọ mmọ ọfọn̄ kiet kiet,+ edi ọnọ Benjamin mbak silver ikie ita ye ọfọn̄ ition.+ 23  Ndien enye ọnọ mme n̄kpọ emi ẹsọk ete esie: ass duop emi ẹbiomde nti n̄kpọ Egypt ye uman ass duop emi ẹbiomde wheat ye uyo ye udia emi ete esie edidiade ke usụn̄. 24  Ntem ke enye osio nditọete esie unyọn̄, mmọ ẹnyụn̄ ẹdaha isan̄. Edi enye ọdọhọ mmọ ete: “Ẹkûtọhọ ye kiet eken ke usụn̄.”+ 25  Ndien mmọ ẹwọn̄ọ ke Egypt ẹdọk ndien ekem ẹdisịm Jacob, ete mmọ, ke isọn̄ Canaan. 26  Ndien mmọ ẹdọhọ enye ẹte: “Joseph ke osụk ododu ke uwem, enye onyụn̄ akara ofụri isọn̄ Egypt!”+ Edi esịt Jacob odoro ibikpai, koro enye ikenịmke ikọ mmọ ke akpanikọ.+ 27  Edi ke ini mmọ ẹsiande enye ofụri se Joseph eketịn̄de ọnọ mmọ, enye onyụn̄ okụtde ukpatn̄kpọ oro Joseph ọkọnọde ete ẹda ẹdimen imọ, spirit Jacob, ete mmọ, edemede.+ 28  Ndien Israel ofiori ete: “Ekem adan̄aoro! Joseph, eyen mi, ke osụk ododu ke uwem! Yak n̄ka n̄kokụt enye mbemiso n̄kpade!”+

Mme Ikọ Idakisọn̄