Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 44;1-34

44  Ekem enye ọdọhọ owo oro esede aban̄a ufọk esie ete:+ “Dọn̄ udia ke ekpat mmọ yọhọ nte mmọ ẹkemede ndikama nyụn̄ sịn okụk mmọ ke ekpat mmọ.+  Edi sịn cup silver mi ke ekpat ekperedem eyenete mmọ ye okụk wheat esie.” Ntem enye anam kpa nte Joseph ọkọdọhọde.+  Ke eyo esierede, ẹsio mmọ ye mme ass mmọ unyọn̄.+  Ndien mmọ ẹkpọn̄ obio oro. Ke ini mmọ mîkam isan̄ake oyom usụn̄, Joseph ọdọhọ owo oro esede aban̄a ufọk esie ete: “Daha ke enyọn̄! Bịne mmọ ndien ke ini esịmde mmọ dọhọ mmọ ete, ‘Ntak emi mbufo ẹdade idiọk ẹsio mi usiene eti?+  Nte idịghe cup emi ke eteufọk mi esida ọn̄wọn̄ mmọn̄ onyụn̄ omụm ndomo?+ Se mbufo ẹnamde ifọnke.’”  Ndien enye ekesịm mmọ onyụn̄ etịn̄ ikọ emi ye mmọ.  Edi mmọ ẹdọhọ enye ẹte: “Ntak emi ọbọn̄ mi etịn̄de ikọ ntem? N̄wan̄ansa-o! mme asan̄autom fo ikemeke ndinam n̄kpọ eke etiede ntem.  Kamse, nnyịn ima ifiak ida okụk oro ikokụtde ke ekpat nnyịn ito isọn̄ Canaan isọk fi.+ Nnyịn ikpasan̄a didie iyịp silver m̀mê gold ke ufọk eteufọk fo?+  Yak owo ekededi ke otu ifịn fo oro ẹkụtde enye cup emi ke ubọk okûtre ndikpa ndien yak nnyịn n̄ko ikabade idi ifịn ọbọn̄ mi.”+ 10  Ntre enye ọdọhọ ete: “Yak edi kpa nte mbufo ẹdọhọde.+ Owo eke ẹdikụtde enye cup emi ke ubọk ayakabade edi ofụn mi,+ edi mbufo eken ẹyebọhọ ubiomikpe.” 11  Ntem mmọ ẹsọsọp ẹdorode ekpat mmọ ẹnịm ke isọn̄ ẹnyụn̄ ẹtat ekpat mmọ. 12  Ndien enye etịm oyom. Enye ọtọn̄ọ ye akpan tutu esịm ekperedem. Ke akpatre ẹkụt cup oro ke ekpat Benjamin.+ 13  Ndien mmọ ẹwak ọfọn̄+ mmọ ẹnyụn̄ ẹmen mbiomo mmọ ẹdori ke ass ẹfiak ẹka obio. 14  Ndien Judah+ ye nditọete esie ẹka ufọk Joseph, koro enye okosụk odude do; ndien mmọ ẹduọ ke isọn̄ ke iso esie.+ 15  Joseph onyụn̄ ọdọhọ mmọ ete: “Nso n̄kpọ ke mbufo ẹnam ntem? Nte mbufo ifiọkke ite ke owo nte ami mmekeme nditịm mmụm ndomo?”+ 16  Ntem Judah eseme ete: “Nso ke nnyịn ididọhọ ọbọn̄ mi? Nso ke nnyịn iditịn̄? Didie ke nnyịn ikeme ndiwụt ke nnyịn idi ndinen owo?+ Ata Abasi amayarade ndudue ifịn fo.+ Sese, nnyịn ye enye emi ẹkekụtde cup emi ke ubọk iyedi ifịn ọbọn̄ mi!”+ 17  Edi enye ọdọhọ ete: “N̄wan̄ansa-o! Ndinamke utọ n̄kpọ emi!+ Owo oro ẹkekụtde enye cup emi ke ubọk edidi ofụn mi.+ Amaedi mbufo mbon eken, ẹnyọn̄ọ ẹtiene ete mbufo ke emem.”+ 18  Ekem Judah asan̄a ekpere ọkọdọhọ enye ete: “Mmekpe fi ubọk, ọbọn̄ mi, mbọk, yak ofụn fo etịn̄ ikọ kiet esịn ọbọn̄ mi ke utọn̄,+ esịt okûnyụn̄ ayat fi+ aban̄a ofụn fo, koro afo etiede nte Pharaoh.+ 19  Ọbọn̄ mi okobụp ifịn esie ete, ‘Nte mbufo ẹmenyene ete m̀mê eyenete?’ 20  Ntre nnyịn ima ibọrọ ọbọn̄ mi ite, ‘Nnyịn imenyene akani eren ete ye eyen ini usọn̄ esie emi edide ekperedem eyen.+ Edi eyeneka esie ama akpa ndien enye ikpọn̄ osụhọ ke idịbi eka esie,+ ndien ete esie ama enye.’ 21  Ekem afo ọdọhọ ifịn fo ete, ‘Ẹda enye ẹsụhọde ẹdi man n̄kụt enye.’+ 22  Edi nnyịn idọhọ ọbọn̄ mi ite, ‘Eyen oro ikemeke ndidaha n̄kpọn̄ ete esie. Edieke enye ọkpọn̄de, ete esie iditreke ndikpa.’+ 23  Ekem afo ọdọhọ ifịn fo ete, ‘Ibọhọke mbufo ẹda ekperedem eyenete mbufo ẹdi, mbufo idikemeke ndikụt mi iso aba.’+ 24  “Ndien nnyịn inyọn̄ itiene ofụn fo, kpa ete mi, ikasian enye se ọbọn̄ mi ọkọdọhọde. 25  Ekem ete nnyịn ọdọhọ ete, ‘Ẹfiak ẹkedep ekpri udia ẹsọk nnyịn.’+ 26  Edi nnyịn idọhọ ite, ‘Nnyịn ikemeke ndisụhọde n̄ka do. Edieke ekperedem eyenete nnyịn edidide nnyịn iyaka, koro nnyịn idikemeke ndikụt owo oro iso edieke ekperedem eyenete nnyịn mîtieneke nnyịn.’+ 27  Edi ofụn fo, kpa ete nnyịn, ọdọhọ nnyịn ete, ‘Mbufo ẹmetịm ẹfiọk ẹte ke n̄wan mi akaman nditọiren iba ọnọ mi.+ 28  Ekem kiet ọwọrọ ọkpọn̄ mi ndien ami mfiori nte: “O! Ke akpanikọ idiọk unam amawai enye mbai mbai!”+ ndien ami n̄kwe enye aba tutu esịm emi. 29  Edieke mbufo ẹdimende enye emi n̄ko ẹkpọn̄ mi ndien unọmọ esịm enye, mbufo iditreke ndinam iwat mi osụhọde ke Udi*+ ke afanikọn̄.’ 30  “Ndien edieke eyen emi mîsan̄ake ye nnyịn inyọn̄ itiene ofụn fo, kpa ete nnyịn, sia ukpọn̄ esie eyịrede ye ukpọn̄ eyen emi,+ 31  ntem ke adan̄aemi enye edikụtde ke eyen oro idụhe, enye ayakpa, ndien ifịn fo ẹyenam iwat ofụn fo, ete nnyịn, osụhọde ke Udi* ke mfụhọ. 32  Koro ofụn fo eketie ubiọn̄+ ke ibuot eyen emi ke ini enye ọkpọn̄de ete esie, ete, ‘Edieke mmemfiakke nda enye nsọk fi, nyanam idiọkn̄kpọ ndue ete mi ke nsinsi.’+ 33  Ntre, mbọk, yak ami ndi ofụn fo utu ke eyen emi, man enye akpasan̄a ye nditọete esie ọnyọn̄.+ 34  Koro n̄keme didie ndinyọn̄ ntiene ete mi ndien eyen emi isan̄ake ye ami, mbak ndikụt idiọkn̄kpọ eke ediwọrọde ete mi?”+

Mme Ikọ Idakisọn̄

Heb., “Sheol.”
Heb., “Sheol.”