Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 38;1-30

38  Ekem Judah ọwọrọ ọkpọn̄ nditọete esie osụhọde aka okowụk tent esie ekpere eren kiet, owo Adullam,+ emi ekerede Hirah.  Ndien Judah okụt eyenan̄wan Canaan+ kiet, emi ete esie ekerede Shua. Ntre enye ọdọ eyenan̄wan emi onyụn̄ enyene ebuana ye enye.  Ndien enye oyomo onyụn̄ aman eyeneren, Judah onyụn̄ osio eyen oro enyịn̄ Er.+  Ekem enye afiak oyomo onyụn̄ aman eyeneren ndien osio eyen oro enyịn̄ Onan.  Ndien enye ọtọn̄ọ ntak aman eyeneren onyụn̄ osio eyen oro enyịn̄ Shelah. Enye okodụn̄ ke Achzib ke ini n̄wan emi akamande eyen emi.+  Ekem Judah ọdọ n̄wan emi ekerede Tamar+ ọnọ Er, akpan esie.  Edi Er, akpan Judah, ọdiọk ke enyịn Jehovah;+ ntre Jehovah owot enye.+  Ntem Judah ọdọhọ Onan ete: “Nyene ebuana ye n̄wan eyenuka nyụn̄ nam ido ndọ eyenete ebe ye enye nyụn̄ bon eyen nọ eyenuka.”+  Edi Onan ọfiọk ete ke eyen oro edimanade ididịghe eyen imọ;+ ntem ke ini enye enyenede ebuana ye n̄wan eyeneka esie, enye ọduọk nsene ke isọn̄ mbak edibon eyen ọnọ eyeneka esie.+ 10  Ndien se enye akanamde ọdiọk Jehovah ke enyịn;+ ntem enye owot Onan n̄ko.+ 11  Ntre Judah ọdọhọ Tamar, n̄wan eyen esie, ete: “Ka kodụn̄ ke ufọk usọ nte ebeakpa tutu Shelah, eyen mi, okpon.”+ Koro enye ọdọhọde ke esịt esie ete: “Enye n̄ko ekeme ndikpa nte nditọeka esie.”+ Ntem Tamar aka okodụn̄ ke ufọk ete esie.+ 12  Ntem ke ndusụk ini ebede, eyen Shua, n̄wan Judah,+ akpa; ndien Judah enịm ini eke enye ofụhọde.+ Ekem enye asan̄a ye ufan esie Hirah, owo Adullam,+ aka Timnah+ ndika n̄kese mbon oro ẹfatde mme erọn̄ esie idet. 13  Ndien ẹditịn̄ ẹnọ Tamar ẹte: “Sese ete ebe fo ke ọdọk aka Timnah ndifat mme erọn̄ esie idet.”+ 14  Ntem enye osion̄o ọfọn̄idem itie ebeakpa esie onyụn̄ ada ọfọn̄ awan̄ ke idem onyụn̄ ada ufụhọn̄kpọ ofụk iso esie, ndien osụhọde etetie ke inuaotop Enaim, emi odude ke usụn̄ oro ẹsan̄ade ẹka Timnah. Koro enye okụtde ke Shelah omokpon edi owo imenke imọ inọ enye ọdọ.+ 15  Ke ini Judah adade okụt enye, enye ekere ete edi akpara+ koro enye okofụkde iso esie.+ 16  Ntre enye awaha etiene enye ọkọdọhọ ete: “Mbọk, yak mi nnyene ebuana ye afo.”+ Koro enye ikọfiọkke ite enye edi n̄wan eyen esie.+ Ntem enye obụp ete: “Nso ke edinọ mi man nyak enyene ebuana ye ami?”+ 17  Ndien enye ọbọrọ ete: “Nyosio eyen ebot kiet ke otu ufene mi nnọ ẹsọk fi.” Edi n̄wan oro ete: “Nte ọyọnọ mi n̄kpọ ke ubiọn̄ tutu afo ọnọ enye edi?”+ 18  Ndien enye ọdọhọ ete: “Nso ke ndinọ fi ke ubiọn̄?” ndien enye ete: “N̄kpanuen ufịk idiọn̄ọ+ fo ye urụk ọfọn̄ fo ye esan̄ oro afo akamade ke ubọk.” Ndien enye ayak mmọ ọnọ n̄wan oro onyụn̄ enyene ebuana ye enye, ndien enye oyomo. 19  Ekem enye adaha ke enyọn̄ okofụhọde ufụhọn̄kpọ esie enịm onyụn̄ esịne ọfọn̄idem itie ebeakpa esie.+ 20  Ndien Judah ọnọ owo Adullam,+ ufan esie, eyen ebot man ada ọkọbọ n̄wan oro mme n̄kpọ emi enye ekenịmde ke ubiọn̄, edi enye ikwe n̄wan oro. 21  Ndien enye asan̄a obụp mbon ebiet an̄wan emi ete: “Enye akpara temple oro okodude ke Enaim ke mbenusụn̄?” Edi mmọ ẹte: “Akananam akpara+ temple idụhe ke ebiet emi.” 22  Ndien enye afiak etiene Judah ọkọdọhọ ete: “N̄kwe enye, n̄ko, mbon ebiet oro ẹdọhọ ẹte, ‘Akananam akpara temple idụhe ke ebiet emi.’” 23  Ntre Judah ọdọhọ ete: “Yak enye ada mmọ enyene mbak ẹdisịn nnyịn ke ndek.+ Nte ededi, mmọnọ eyen ebot emi ẹsọk enye, edi afo ukwe enye.” 24  Edikem ke ọfiọn̄ ita ẹbede, ẹditịn̄ ẹnọ Judah ẹte: “Tamar, n̄wan eyen fo ama aka akpara,+ ndien sese enye omoyomo+ oto akpara esie.” Ntem Judah ọdọhọ ete: “Mbufo ẹda enye ẹwọrọ ẹdifọp ke ikan̄.”+ 25  Edi nte ẹsụk ẹdade enye ẹwọrọ ẹdi, enye ọdọn̄ ẹkedọhọ ete ebe esie ete: “Ami nyomo nnọ owo emi enyenede mme n̄kpọ emi.”+ Enye onyụn̄ ọdọhọ ete: “Mbọk, tịm se+ m̀mê anie enyene n̄kpanuen ufịk idiọn̄ọ emi ye urụk ọfọn̄ emi ye esan̄ emi.”+ 26  Ekem Judah etịm ese mmọ onyụn̄ ọdọhọ ete:+ “Enye enen akan mi,+ koro mmen̄kadaha enye nnọ Shelah, eyen mi, ọdọ.”+ Ndien enye ifiakke idan̄ ye enye aba.+ 27  Edikem ke ini uman otụkde enye, sese, nditọ iba ẹdu enye ke idịbi. 28  Ekem ke ini enye amande, eyen kiet osio ubọk anyan, ndien omụm-uman ọsọsọp omụm enye ubọk onyụn̄ etebe enye ididuot urụk, ete: “Enye emi ebem iso ọwọrọ.” 29  Edikem ke ndondo oro enye afiakde odụri ubọk esie esịn, eyeneka esie ọwọrọ edi, ntre omụm-uman ofiori ete: “Nso ke afo anam ntem, asiak uka idem obụmede ọwọrọ?” Ntem ẹsio enye enyịn̄ Perez.+ 30  Ekem eyeneka esie emi ididuot urụk etebede enye ke ubọk ọwọrọ edi ndien ẹsio enye enyịn̄ Zerah.+

Mme Ikọ Idakisọn̄