Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 35;1-29

35  Ekem Abasi ọdọhọ Jacob ete: “Daha ke enyọn̄, dọk ka Bethel kodụn̄ do,+ nyụn̄ nam itieuwa do nọ ata Abasi emi okowụtde fi idem ke ini afo ekefehede ọbọhọ Esau, eyenuka.”+  Ndien Jacob ọdọhọ mbonufọk esie ye kpukpru mmọ oro ẹkedude ye enye ete: “Ẹsion̄o isen abasi ke otu mbufo ẹfep+ ẹnyụn̄ ẹnam idem mbufo asana ẹnyụn̄ ẹkpụhọ ọfọn̄ mbufo,+  ẹnyụn̄ ẹyak nnyịn idọk ika Bethel. Ndien nyanam itieuwa do nnọ ata Abasi emi ekeyerede mi ke usen nnanenyịn+ koro enye okodude ye ami ke usụn̄ emi n̄kakade.”+  Ntre mmọ ẹnọ Jacob kpukpru isen abasi+ oro mmọ ẹkenyenede ye mme n̄kpanuen utọn̄ emi mmọ ẹkesịnede, ndien Jacob edịp+ mmọ ke idak akamba eto oro okodude ekpere Shechem.  Ekem mmọ ẹkpọn̄ do, ndịk Abasi onyụn̄ anam mme obio oro ẹkekande mmọ ẹkụk,+ tutu mmọ ikemeke ndibịne nditọ Jacob.  Ke akpatre, Jacob ye kpukpru owo oro ẹkesan̄ade ye enye ẹdisịm Luz,+ emi odude ke isọn̄ Canaan, oro edi, Bethel.  Ndien enye anam itieuwa do onyụn̄ okot ebiet oro El-bethel, koro do ke ata Abasi akayarade idem ọnọ enye ke ini emi enye ekefehede ọbọhọ eyeneka esie.+  Ekem Deborah,+ edep Rebekah, akpa ndien ẹbụk enye ke usụk usụk Bethel ke idak akamba eto kiet. Ntem enye okot ebiet oro Allon-bacuth.  Ndien Abasi ọtọn̄ọ ntak owụt Jacob idem ke ini enye otode Paddan-aram+ edi onyụn̄ ọdiọn̄ enye.+ 10  Ndien Abasi ọdọhọ enye ete: “Afo ekere Jacob.+ Udukereke aba Jacob, edi edikere Israel.” Ndien enye osio enye enyịn̄, Israel.+ 11  Ndien Abasi ọdọhọ enye ete: “Ami ndi Ata Ọkpọsọn̄ Abasi.+ Tọt nyụn̄ wak. Mme idụt ye esop ediwak idụt ẹyeto fi ẹwọn̄ọ, ndidem ẹyenyụn̄ ẹto fi ke isịn ẹwọn̄ọ.+ 12  Nyada isọn̄ oro n̄kọnọde Abraham ye Isaac nnọ fi, nyonyụn̄ nda isọn̄+ emi nnọ mfri+ emi editienede fi.” 13  Ekem Abasi ọdọk ọkpọn̄ enye ke ebiet oro enye eketịn̄de ikọ ye Jacob.+ 14  Ekem Jacob owụk adaha itiat ke ebiet oro Abasi eketịn̄de ikọ ye enye,+ onyụn̄ ọtọhọ edin̄wọn̄ uwa ye aran ọduọk ke adaha oro.+ 15  Ndien Jacob osụk okot ebiet oro Abasi eketịn̄de ikọ ye enye, Bethel.+ 16  Ekem mmọ ẹwọn̄ọ ẹkpọn̄ Bethel. Ndien ke adan̄aemi usụn̄ osụk oyomde ndisan̄a nsịm Ephrath,+ uman otụk Rachel, uman onyụn̄ ọsọn̄ etieti.+ 17  Edikem ke ini uman ọsọn̄de, omụm-uman ọdọhọ enye ete: “Kûfehe ndịk, koro afo ayaman eyeneren emi n̄ko.”+ 18  Edi nte ukpọn̄+ esie oyomde ndibe mfep (koro enye akpade)+ enye osio eyen oro enyịn̄ Ben-oni; edi ete esie okot enye Benjamin.+ 19  Ntem Rachel akpa ndien ẹbụk enye ke usụn̄ emi akade Ephrath, oro edi, Bethlehem.+ 20  Ndien Jacob owụk adaha ke udi esie. Emi edi adaha udi Rachel tutu esịm mfịn emi.+ 21  Ekem Israel ọkpọn̄ do okowụk tent esie ke ebiet emi oyomde usụn̄ ọkpọn̄ tọwa Eder.+ 22  Edikem ke adan̄aemi Israel odụn̄de+ ke idụt oro, Reuben aka akadan̄ ye Bilhah, n̄wanesa ete esie, ndien Israel okop n̄kpọ emi.+ Nditọiren Jacob ẹkedi duopeba. 23  Nditọiren Leah ẹkedi Reuben,+ akpan Jacob, ye Simeon ye Levi ye Judah ye Issachar ye Zebulun. 24  Nditọiren Rachel ẹkedi Joseph ye Benjamin. 25  Ndien nditọiren Bilhah, ofụn an̄wan Rachel, ẹkedi Dan ye Naphtali. 26  Ndien nditọiren Zilpah, ofụn an̄wan Leah, ẹkedi Gad ye Asher. Mmọ emi ẹkedi nditọiren Jacob, emi ẹkemanade ẹnọ enye ke Paddan-aram. 27  Ekem Jacob edisịm Isaac, ete esie, ke Mamre,+ Kiriath-arba,+ oro edi, Hebron, ke ebiet emi Abraham ye Isaac ẹkedụn̄de nte isenowo.+ 28  Ndien ofụri ini uwem Isaac edi isua ikie ye anan̄.+ 29  Ekem Isaac ọduọk akpatre ibifịk onyụn̄ akpa, etiene orụk esie, ke ama ọkọsọn̄ onyụn̄ oyụhọ usen,+ ndien Esau ye Jacob, nditọiren esie, ẹbụk enye.+

Mme Ikọ Idakisọn̄