Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 32;1-32

32  Ekem Jacob adaha isan̄, ndien mme angel Abasi ẹdi ẹdisobo ye enye.+  Ndien ke ini Jacob okụtde mmọ, enye ọsọsọp ọdọhọ ete: “Emi edi ebietidụn̄ Abasi!”+ Ntem enye okot ebiet oro Mahanaim.+  Ekem Jacob ọdọn̄ mme isụn̄utom+ ẹbem enye iso ẹka ke ọtọ Esau, eyeneka esie, ke idụt Seir,+ ke isọn̄ Edom,+  ndien enye owụk mmọ ete: “Ntem ke mbufo ẹdidọhọ ọbọn̄ mi+ Esau, ẹte, ‘Asan̄autom fo, Jacob, ọdọhọ ete: “Mmodụn̄ ye Laban nte esenowo mmonyụn̄ nnen̄ede mbịghi tutu esịm emi.+  Mmonyụn̄ nnyene nyara enan̄ ye mme ass ye mme erọn̄ ye ifịn iren ye ifịn iban,+ ndien n̄kpama ndidọn̄ ẹdisian ọbọn̄ mi, man n̄kpokụt mfọn ke iso fo.”’”+  Ekem mme isụn̄utom oro ẹfiak ẹnyọn̄ọ ẹtiene Jacob ẹdidọhọ ẹte: “Nnyịn ima ikokụt Esau, eyeneka fo, ndien enye n̄ko ke asan̄a ye owo ikie inan̄ edi ndisobo ye afo.”+  Ndien ndịk anam Jacob etieti, esịt onyụn̄ etịmede enye.+ Ntre enye abahade ikọt esie ye mme ebot ye mme erọn̄ ye mme enan̄ ye mme camel esie esịn ke udịm iba,+  onyụn̄ ọdọhọ ete: “Edieke Esau edide edin̄wana ye udịm kiet, udịm kiet emi osụhọde ọyọbọhọ efehe.”+  Ekem Jacob ọdọhọ ete: “O Abasi ete mi Abraham ye Abasi ete mi Isaac,+ O Jehovah, afo emi ọdọhọde mi ete, ‘Fiak nyọn̄ idụt fo nyụn̄ tiene iman fo ndien nyọfọn ido ye afo,’+ 10  asan̄autom fo idotke kpukpru ima-mfọnido emi, inyụn̄ idotke kpukpru akpanikọ emi afo anamde ọnọ enye,+ n̄kọm n̄kebe Jordan emi ye esan̄ mi kpọt edi idahaemi mmakabade ndi udịm iba.+ 11  Mbọk nyan̄a mi+ sio Esau, eyeneka mi, ke ubọk, koro mfefehe enye mbak enye edidi edin̄wana ye ami,+ owot eka ye nditọ. 12  Edi afo ọkọdọhọ mi ete, ‘Nditreke ndifọn ido ye afo nnyụn̄ nnam mfri fo awak nte ntan inyan̄ emi owo mîkemeke ndibat.’”+ 13  Ndien enye osụk odu do okoneyo oro. Ekem enye ada se idụkde enye ubọk ke otu inyene esie enịm ọnọ Esau eyeneka esie:+ 14  uman ebot ikie iba, ye okpo ebot edịp ye uman erọn̄ ikie iba ye okukịm erọn̄ edịp, 15  ye camel edịp ye duop oro ẹnọde nditọ eba ye nditọ mmọ, ye uman enan̄ aba ye nyara enan̄ duop ye uman ass edịp ye nyara ass duop emi ẹkponide ẹwọrọ.+ 16  Ekem enye ayak otu ufene kiet kiet esịn mme asan̄autom esie ke ubọk onyụn̄ ọdọhọ mme asan̄autom esie ndien ndien ete: “Ẹbem mi iso ẹka, ẹnyụn̄ ẹnịm ufan̄ ke ufọt otu ufene kiet ye eken.”+ 17  Ndien enye ọdọhọ akpa asan̄autom ete: “Edieke Esau eyeneka mi osobode ye afo onyụn̄ obụpde fi ete, ‘Afo edi asan̄autom anie, aka m̀mọ̀n̄, anie onyụn̄ enyene mme otu ufene emi?’ 18  afo ọyọdọhọ ete, ‘Ndi asan̄autom Jacob. Mmọ emi ẹnyụn̄ ẹdi mme n̄kpọ oro enye ọnọde+ ẹsọk Esau, ọbọn̄ mi,+ ndien sese! enye n̄ko ke edi ke edem.’” 19  Ndien enye ọdọhọ ọyọhọ asan̄autom iba ye ọyọhọ ita ye kpukpru mbon oro ẹtienede mme otu ufene ete: “Ke ini mbufo ẹsobode ye Esau, ẹtịn̄ ntre.+ 20  Mbufo ẹdọhọ n̄ko ẹte, ‘Asan̄autom fo Jacob ke edi ke edem.’”+ Koro enye ọdọhọde ete: “Man n̄kpada mme enọ oro ẹdude ke iso nnem enye esịt,+ ndien ekem nyokụt iso esie. M̀mê enye eyenem esịt ndikụt mi.”+ 21  Ntre ẹda mme enọ oro ẹbem enye iso ẹka, edi enye adan̄ ke itienna ke okoneyo oro.+ 22  Ekem enye adaha ke enyọn̄ ke okoneyo oro, ada iban esie iba,+ ye ifịn iban esie iba,+ ye nditọiren esie duopekiet+ onyụn̄ asan̄a ebiet ube mmọn̄ Jabbok+ ebe. 23  Ntre enye ada mmọ ye kpukpru se enye ekenyenede ebe itịghede mmọn̄ oro.+ 24  Ekem Jacob odu ikpọn̄. Ndien eren kiet an̄wana ye enye tutu eyo esiere.+ 25  Ke ini eren oro okụtde ete imọ ikanke enye,+ enye atuak enye ọkpọ ekikoi, ndien ọkpọ ekikoi Jacob efebede ke ini enye an̄wanade ye eren oro.+ 26  Ekem eren oro ọdọhọ ete: “Yak mi nnyọn̄ ke eyo esiere.” Edi enye ọbọrọ ete: “Ndiyakke fi ọnyọn̄ ibọhọke afo ọdiọn̄ mi.”+ 27  Ntre eren oro obụp enye ete: “Afo ekere didie?” enye ọbọrọ ete: “N̄kere Jacob.” 28  Ndien eren oro ọdọhọ ete: “Afo udukereke aba Jacob edi edikere Israel,+ koro afo aman̄wana+ ye Abasi onyụn̄ an̄wana ye owo onyụn̄ akan ke akpatre.” 29  Ntre Jacob ọdọhọ ete: “Mbọk, siak enyịn̄ fo nọ mi.” Edi, eren oro ete: “Ntak obụpde enyịn̄ mi?”+ Ntre eren oro ọdiọn̄ enye ke ebiet oro. 30  Ntem Jacob okot ebiet oro Peniel,+ koro ke nditịn̄ nte enye eketịn̄de, “Mma n̄kụt Abasi iso ye iso edi ẹma ẹnyan̄a ukpọn̄ mi.”+ 31  Ndien utịn asiaha otụk enye nte enye ebede Penuel, edi enye ọkọsọsọk isan̄ ke ntak ekikoi esie.+ 32  Oro edi ntak nditọ Israel mîsitaha esịp ekikoi, emi odude ke ọkpọ ekikoi, tutu esịm mfịn emi, koro eren oro akatuakde Jacob esịp ekikoi emi odude ke ọkpọ ekikoi esie.+

Mme Ikọ Idakisọn̄