Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 27;1-46

27  Edikem ke Isaac ama ọkọsọn̄, enyịn esie onyụn̄ enen̄ede ekịm tutu enye ikwe aba usụn̄,+ enye okot Esau akpan esie onyụn̄ ọdọhọ enye ete:+ “Eyen mi!” ndien enye ọbọrọ ete: “Se mi mi!”  Ndien enye ọdọhọ ete: “Sese, mmọsọn̄.+ Mfiọkke usen eke ndikpade.+  Mbọk, da mme n̄kpọ utop fo idahaemi, odịp-idan̄ ye utịgha fo, dụk ikọt kowot unam nọ mi.+  Ndien tem utọ edinem udia emi nsimade da sọk mi, ndien ami nyadia, man ukpọn̄ mi ọkpọdiọn̄ fi mbemiso n̄kpade.”+  Edi Rebekah ke akakpan̄ utọn̄ okop se Isaac etịn̄de ye Esau eyen esie. Ndien Esau adaha odụk ikọt aka nditop unam nda ndi.+  Ndien Rebekah ọdọhọ Jacob eyen esie ete:+ “Sese, mmokop nte usọ ọdọhọde Esau eyenuka, ete,  ‘Da unam sọk mi nyụn̄ tem edinem udia nọ mi ndia, man n̄kpọdiọn̄ fi ke iso Jehovah mbemiso n̄kpade.’+  Ndien ke emi, eyen mi, kop uyo mi nyụn̄ nam se nditemede fi.+  Mbọk, ka ke otu ufene kosio nditọ ebot iba eke ẹyede idem sọk mi, man nda ntem edinem udia nnọ usọ, utọ emi enye esimade. 10  Ndien afo ayada enye ọsọk usọ man enye adia onyụn̄ ọdiọn̄ fi mbemiso enye akpade.” 11  Ndien Jacob ọdọhọ Rebekah, eka esie, ete: “Esau eyeneka mi etie idem idet idet edi ami nnyeneke idet ke idem.+ 12  Nso edieke ete mi ọfiọn̄ọde mi ese?+ Do ami nyakabade ntie ke enyịn esie nte owo abian̄a,+ ndien ami nyọbọ isụn̄i utu ke edidiọn̄.”+ 13  Edi eka esie ọdọhọ enye ete: “Eyen mi, yak isụn̄i fo odoro mi ke idem.+ Kam kop uyo mi nyụn̄ ka kada mmọ sọk mi.”+ 14  Ntem ke enye aka akada mmọ ọsọk eka esie, ndien eka esie ada mmọ etem edinem udia emi ete esie esimade. 15  Ekem Rebekah emen ọfọn̄ Esau, akpan esie,+ ata mfọnn̄kan ọfọn̄idem oro okodude ye enye ke ufọk,+ esịne Jacob udọ esie.+ 16  Ndien enye ada ikpa nditọ ebot oro ofụk enye ke ubọk ye ke itọn̄ esie emi idet mîdụhe.+ 17  Ekem enye emen edinem udia oro ye uyo emi enye akanamde esịn Jacob, eyen esie, ke ubọk.+ 18  Ntre enye aka ebịne ete esie ọkọdọhọ ete: “Ete mi!” ndien ete esie ọbọrọ ete: “Se mi mi! Afo edi anie, eyen mi?” 19  Ndien Jacob ọbọrọ ete esie ete: “Ami ndi Esau, akpan fo.+ Mmanam kpa nte ọkọdọhọde. Mbọk, daha ke enyọn̄. Tetie nyụn̄ ta unam emi n̄wotde man ukpọn̄ fo ọkpọdiọn̄ mi.”+ 20  Edi Isaac ọdọhọ eyen esie ete: “Eyen mi, afo anam didie ọsọp okụt unam ntem?” Ndien enye ọdọhọ ete: “Koro Jehovah Abasi fo akadade enye ọsọk mi.” 21  Ekem Isaac ọdọhọ Jacob ete: “Mbọk, eyen mi, san̄a di mfiọn̄ọ fi, man mfiọk m̀mê afo edi eyen mi Esau m̀mê udịghe.”+ 22  Ntre Jacob asan̄a ekpere ete esie Isaac, ndien enye ọfiọn̄ọ enye, onyụn̄ ọdọhọ ete: “Uyo fo edi uyo Jacob, edi ubọk edi ubọk Esau.”+ 23  Edi ete esie idiọn̄ọke enye, koro ubọk esie ẹtiede idet idet nte ubọk Esau eyeneka esie. Ntem ete esie ọdiọn̄ enye.+ 24  Ekem ete esie obụp ete: “Nte afo ke akpanikọ edi Esau, eyen mi?” ndien enye ọbọrọ ete: “Ih.”+ 25  Ekem enye ọdọhọ ete: “Da enye sọk mi man nta unam emi eyen mi owotde, man ukpọn̄ mi ọkpọdiọn̄ fi.”+ Ndien Jacob ada ọsọk enye, enye onyụn̄ ata, ekem ada wine ọsọk enye ndien enye ọn̄wọn̄. 26  Ndien Isaac ete esie ọdọhọ enye ete: “Mbọk, eyen mi, san̄a kpere nyụn̄ tịm mi inua.”+ 27  Ntem enye asan̄a ekpere eketịm enye inua, ndien enye okop utebe ọfọn̄idem esie.+ Ndien enye ọdiọn̄ enye onyụn̄ ọdọhọ ete: “Sese, utebe eyen mi etie nte utebe isọn̄ emi Jehovah ọdiọn̄de. 28  Ata Abasi akpakam ọnọ fi mbara eke otode ke enyọn̄+ ye eti isọn̄+ ye ediwak wheat* ye obufa wine.+ 29  Mme owo ẹyesan̄a utom ẹnọ fi, mme idụt ẹyenyụn̄ ẹnụhọ ẹnọ fi.+ Ndien afo ayakabade edi etubom ọnọ nditọuka, mmọ eke eka fo amande ẹyenyụn̄ ẹnụhọ ẹnọ fi.+ Isụn̄i eyesịm mmọ eke ẹsụn̄ide fi, oyonyụn̄ ọfọn ọnọ mmọ eke ẹdiọn̄de fi.”+ 30  Edikem nte Isaac osụk okụrede ndidiọn̄ Jacob, kpa ke idem idahaoro Jacob otode iso Isaac, ete esie, ọwọrọ, Esau eyeneka esie ọnyọn̄ utop+ edi. 31  Enye n̄ko etem edinem udia. Ekem enye ada ọsọk ete esie onyụn̄ ọdọhọ ete esie ete: “Yak ete mi adaha ke enyọn̄ ata unam emi eyen esie owotde, man ukpọn̄ fo ọkpọdiọn̄ mi.”+ 32  Ntem ete esie, Isaac, obụp enye ete: “Afo edi anie?” enye ete: “Ami ndi eyen fo, akpan fo, Esau.”+ 33  Ndien idem enyek Isaac etieti, enye onyụn̄ ọdọhọ ete: “Anie, ndien, okowot unam ada ọsọk mi, ndien nta kpukpru nnyụn̄ ndiọn̄ enye mbemiso afo edide edisịm? Ke akpan ẹyediọn̄ enye!”+ 34  Ke ini Esau okopde ikọ ete esie enye eseme ke ata ọkpọsọn̄ uyo onyụn̄ ọdọhọ ete esie ete:+ “Diọn̄ mi n̄ko, ete mi!”+ 35  Edi enye ọdọhọ ete: “Eyenuka ama ada abian̄a edibọ edidiọn̄ oro akanade ọnọ fi.”+ 36  Ntem enye ọdọhọ ete: “Nte idịghe emi anam ẹkot enye Jacob, koro enye ọbọde mi itie utịm ikaba emi?+ Enye ama ọbọbọ mi unen itie akpan,+ ndien sese idahaemi enye ọmọbọ edidiọn̄ mi!”+ Ndien enye adian do ete: “Nte usụk usụhọke edidiọn̄ ndomokiet unọ mi?” 37  Edi Isaac ọbọrọ Esau ete: “Sese, mmanam enye edi etubom fo,+ mmonyụn̄ nnam kpukpru nditọete esie ẹdi mme asan̄autom esie,+ nnyụn̄ nnọ enye wheat ye obufa wine ke udia,+ ntre eyen mi, nso ke n̄keme ndinam nnọ fi?” 38  Ekem Esau obụp ete esie ete: “Ete mi, nte afo enyene edidiọn̄ kiet kpọt? Diọn̄ mi n̄ko, ete mi!”+ Ndien Esau emenede uyo esie atua eyet.+ 39  Ntem Isaac ete esie ọbọrọ enye ete: “Sese, ebietidụn̄ fo ididụhe ke eti isọn̄, mbara enyọn̄ idinyụn̄ iduọhọke do.+ 40  Akan̄kan̄ ke afo edida odu uwem,+ ndien afo ayasan̄a utom ọnọ eyenuka.+ Edi ke ini mûdukemeke ndiyọ aba, afo oyobụn̄ ọkpọnọ esie ke itọn̄ fo efep.”+ 41  Ndien Esau asua Jacob ke ntak oro ete esie ọkọdiọn̄de enye,+ ndien Esau esidọhọ ke esịt+ esie ete: “Ini oro ẹdituade ete mi ke asan̄a ekpere.+ Ke oro ebede, nyowot Jacob eyeneka mi.”+ 42  Ke ini ẹsiande Rebekah se Esau, akpan esie eketịn̄de, enye awara ọdọn̄ ẹkekot Jacob, udọ esie, onyụn̄ ọdọhọ enye ete: “Sese! Esau eyenuka ke ọdọn̄ idemesie esịt aban̄a fi—ndiwot fi.+ 43  Ntem, eyen mi, kop uyo mi+ nyụn̄ daha ke enyọn̄ fehe ka edem Laban eyeneka mi, ke Haran.+ 44  Ndien dụn̄ ye enye ke ndusụk usen tutu esịt osụhọ+ eyenuka, 45  tutu iyatesịt eyenuka ọwọn̄ọde ọkpọn̄ fi, enye onyụn̄ efre se afo akanamde enye.+ Ndien ami nyọdọn̄ ẹdikot fi do. Ntak emi nditabade mbufo mbiba usen kiet?” 46  Ekem Rebekah eyịre etịn̄ ye Isaac ete: “Uwem odorode mi ke ntak nditọiban Heth emi.+ Edieke Jacob ọdọde n̄wan ke otu nditọiban Heth, nte mmọ emi, emi ẹtode ke otu nditọiban idụt emi, uwem mi ọfọn ke nso?”+

Mme Ikọ Idakisọn̄

Mîdịghe, emi ekeme ndidi “barley.”