Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 23;1-20

23  Ndien Sarah odu uwem isua ikie ye edịp ye itiaba. Emi ekedi isua uwem+ Sarah.  Ekem Sarah akpa ke Kiriath-arba,+ oro edi, Hebron,+ ke isọn̄ Canaan,+ ndien Abraham ofụhọ aban̄a Sarah onyụn̄ atua enye.  Ekem Abraham ọkpọn̄ okpo an̄wan esie aka ọkọdọhọ nditọ Heth,+ ete:  “Ami ndi esenowo ye odudụn̄ ke otu mbufo.+ Ẹnọ mi itie ubụkowo man mmen okpo an̄wan mi mfep ke iso mi n̄kobụk.”+  Ndien nditọ Heth ẹdọhọ Abraham ẹte:  “Ọbọn̄ mi,+ kop ndien uyo nnyịn. Afo edi etubom emi Abasi emekde emi odụn̄de ke otu nnyịn.+ Bụk n̄wan fo ke mfọnn̄kan itie ubụkowo nnyịn.+ Baba owo nnyịn kiet idisịnke ndinọ fi itie ndibụk n̄wan fo.”+  Do Abraham adaha ada onyụn̄ onụhọ ọnọ nditọ obio oro,+ nditọ Heth,+  onyụn̄ ọdọhọ mmọ ete: “Edieke mbufo ẹnyịmede ami mmen okpo an̄wan mi n̄kobụk, ẹkpan̄ utọn̄ ẹnọ mi ẹnyụn̄ ẹdọhọ Ephron eyen Zohar,+  ẹte enye ọnọ mi abaitiat Machpelah+ esie, emi odude ke mben in̄wan̄ esie. Yak enye onyụn̄ anyam ọnọ mi ke iso mbufo ke nnennen ekọmurua silver man nda nnyene nte itie ubụkowo.”+ 10  Nte ededi, Ephron ama etiene odu do ke otu nditọ Heth. Ntre Ephron eyen Hittite+ ọbọrọ Abraham ke iso nditọ Heth ye kpukpru mbon oro ẹdụkde ẹdi inuaotop obio esie, ete:+ 11  “Baba-o, Ọbọn̄ mi! Kop uyo mi. Mmọnọ fi in̄wan̄ oro ye abaitiat emi odude do. Mmayak enye nnọ fi ke iso ikọt nnyịn.+ Bụk n̄wan fo.” 12  Do Abraham onụhọ ọnọ nditọ obio oro 13  onyụn̄ ọdọhọ Ephron ke iso nditọ obio oro ete: “N̄kukụre edieke afo—baba, kpan̄ utọn̄ nọ mi! Nyọnọ fi ekọmurua silver ke in̄wan̄ oro. Bọ mi okụk emi+ man mbụk n̄wan mi do.” 14  Ndien Ephron ọdọhọ Abraham ete: 15  “Ọbọn̄ mi, kpan̄ utọn̄ nọ mi. In̄wan̄ oro akpa shekel silver ikie inan̄, edi nso ke oro edi ke ufọt mi ye afo? Ntre bụk n̄wan fo.”+ 16  Ntem Abraham okop uyo Ephron, Abraham onyụn̄ odomo okụk silver oro Ephron akasiakde ke iso nditọ Heth ọnọ enye, shekel silver ikie inan̄ ke udomo ini oro nte mbonurua ẹsidomode.+ 17  Ntem ke ẹsọn̄ọ+ nte ke in̄wan̄ Ephron emi okodude ke Machpelah, emi onyụn̄ asakde iso ese Mamre, in̄wan̄ oro ye abaitiat esie ye kpukpru eto eke ẹdude ke esịt in̄wan̄+ oro 18  ẹdi inyene Abraham, emi enye ekedepde ke iso nditọ Heth ye kpukpru mbon oro ẹkedụkde inuaotop obio esie.+ 19  Ekem Abraham obụk Sarah n̄wan esie ke abaitiat ke in̄wan̄ Machpelah emi asakde iso ese Mamre, oro edi, Hebron, ke isọn̄ Canaan.+ 20  Ntem ke ẹsọn̄ọ nte ke in̄wan̄ oro ye abaitiat esie ẹdi inyene Abraham emi enye ọkọbọde nditọ Heth edep nte itie ubụkowo.+

Mme Ikọ Idakisọn̄