Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 22;1-24

22  Edikem ke n̄kpọ emi ama ekebe, ata Abasi odomo+ Abraham ese. Ndien okot enye: “Abraham!” enye ọbọrọ ete: “Se mi mi!”+  Ndien enye ọdọhọ ete: “Mbọk, da eyen fo, ikpọn̄-ikpọn̄ eyen fo, Isaac,+ emi afo enen̄erede ama,+ ka isọn̄ Moriah+ kawa enye do nte edifọp uwa ke obot kiet emi ndiwụtde fi.”+  Ntem Abraham abak edemede ke usenubọk onyụn̄ ọbọp ikpa itie ke edem ass esie ndien ada asan̄autom esie iba ọkọrọ ye Isaac eyen esie;+ enye onyụn̄ asiak ifia edifọp uwa. Ekem enye adaha ke enyọn̄ ọtọn̄ọ isan̄ ndika ebiet emi ata Abasi eketemede enye.  Ke ọyọhọ usen ita ke Abraham ekemenede enyịn ke akpa ini ada okụt ebiet oro nsannsan.  Ndien Abraham ọdọhọ mme asan̄autom esie ete:+ “Mbufo ẹdu mi ye ass, edi ami ye eyen emi iyọdọk ika ko ikatuak ibuot+ ekem iyafiak itiene mbufo.”  Ndien Abraham emen ifia edifọp uwa oro ọnọ Isaac eyen esie obiom+ onyụn̄ akama ikan̄ ye ikwa ke ubọk, ndien mmọ mbiba ẹsan̄a kiet ẹdaha.+  Ekem Isaac okot Abraham ete esie ete: “Ete mi!”+ Ndien enye ọbọrọ ete: “Eyen mi, se mi mi!”+ Ntre enye obụp ete: “Se ikan̄ ye ifia mi, edi enye erọn̄ uwa?”+  Abraham ọbọrọ ete: “Eyen mi, Abasi oyoyom erọn̄ uwa+ ọnọ idemesie.” Ndien mmọ mbiba ẹsụk ẹsan̄a kiet ẹka.  Ekem mmọ ẹdisịm ebiet emi ata Abasi eketemede enye, ndien Abraham anam itieuwa+ do, etịm ifia obon onyụn̄ ọbọp eyen esie Isaac ubọk ye ukot odori ke itieuwa ke enyọn̄ ifia oro+. 10  Ndien Abraham anyan ubọk esie emen ikwa oyom ndiwot eyen esie.+ 11  Edi angel Jehovah etie ke enyọn̄ okot enye ete:+ “Abraham, Abraham!” ndien enye ọbọrọ ete: “Se mi mi!” 12  Ndien enye ọdọhọ ete: “Kûda ubọk fo unam eyen oro idiọk, kûnyụn̄ unam enye baba n̄kpọ kiet,+ koro ke emi mmọfiọk nte ke afo amabak Abasi sia mûsịnke ndinọ mi ikpọn̄-ikpọn̄ eyen fo.”+ 13  Ndien Abraham emenede enyịn okụt okukịm erọn̄ emi nnụk esie ọkọmọde ke ọtọwọk ikọt. Abraham onyụn̄ aka okomụm okukịm erọn̄ oro onyụn̄ awa enye nte edifọp uwa ke itie eyen esie.+ 14  Ndien Abraham osio ebiet oro enyịn̄ Jehovah-jireh. Ntak edi oro ẹsidọhọde mfịn ẹte: “Ẹyenọ ke obot Jehovah.”+ 15  Ndien angel Jehovah etie ke enyọn̄ okot Abraham ọyọhọ utịm ikaba 16  onyụn̄ ọdọhọ ete: “Jehovah ọdọhọ ete,+ ‘Mmotomo idemmi, nte, koro afo akanamde n̄kpọ emi mûkonyụn̄ usịnke ndinọ mi ikpọn̄-ikpọn̄ eyen fo,+ 17  ke akpanikọ nyọdiọn̄ fi ndinyụn̄ ntreke ndinam mfri fo awak nte ntantaọfiọn̄ ke ikpaenyọn̄ ye nte ntan mbeninyan̄;+ ndien mfri fo ayada inuaotop mme asua esie enyene.+ 18  Kpukpru mme idụt isọn̄ ẹyebọ edidiọn̄ eke otode mfri+ fo koro afo okokopde uyo mi.’”+ 19  Ekem Abraham afiak etiene mme asan̄autom esie, ndien mmọ ẹdaha ke enyọn̄ ẹsan̄a ọtọkiet ẹka Beer-sheba;+ Abraham onyụn̄ odụn̄ ke Beer-sheba. 20  Edikem ke n̄kpọ emi ama ekebe etop edisịm Abraham ete: “Sese Milcah+ aman nditọiren ọnọ Nahor+ eyenuka: 21  Uz akpan esie ye Buz+ eyeneka esie ye Kemuel ete Aram, 22  ye Chesed ye Hazo ye Pildash ye Jidlaph ye Bethuel.”+ 23  Ndien Bethuel obon Rebekah.+ Nditọiren itiaita emi ke Milcah akaman ọnọ Nahor eyeneka Abraham. 24  Enye ama enyene n̄wanesa n̄ko emi ekekerede Reumah. Ekem enye n̄ko aman Tebah ye Gaham ye Tahash ye Maacah.+

Mme Ikọ Idakisọn̄