Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 21;1-34

21  Ndien Jehovah eti Sarah kpa nte enye ọkọdọhọde, Jehovah onyụn̄ anam ye Sarah kpa nte enye eketịn̄de.+  Ndien Sarah oyomo+ onyụn̄ aman eyeneren ọnọ Abraham ke ini usọn̄ esie ke edikem ini emi Abasi akasiande enye.+  Ndien Abraham okot eyen esie emi Sarah akamande ọnọ enye, Isaac.+  Abraham onyụn̄ enịm Isaac, eyen esie, mbobi ke ini enye esịmde usen itiaita ke emana, kpa nte Abasi okowụkde enye.+  Abraham ekedi isua ikie ke ini Isaac, eyen esie, amanade ọnọ enye.  Ekem Sarah ọdọhọ ete: “Abasi ọmọnọ mi se ndade nsak imam: kpukpru owo eke ẹkopde ẹyesak ye ami.”+  Enye onyụn̄ ọdọhọ ete: “Anie ekpeketịn̄ ọnọ Abraham ete, ‘Sarah ọyọnọ nditọ eba,’ edi sese, mmaman eyeneren ke ini usọn̄ esie?”  Edi eyen oro ọkọri ẹnyụn̄ ẹsio enye ke eba;+ ndien Abraham anam akwa usọrọ ke usen emi ẹsiode Isaac ke eba.  Ndien Sarah esikụt nte eyen emi Hagar, n̄wan Egypt,+ akamande ọnọ Abraham, asakde Isaac nsahi.+ 10  Ndien enye ọdọhọ Abraham ete: “Bịn ofụn an̄wan emi ye eyen esie fep, koro eyen ofụn an̄wan emi iditieneke Isaac, eyen mi, idi ada udeme nnyene!”+ 11  Edi ikọ oro ayat Abraham esịt etieti ke ntak eyen+ esie. 12  Ekem Abasi ọdọhọ Abraham ete: “Kûyat esịt ke se Sarah eyịrede etịn̄ ye afo aban̄a ekpri eyeneren oro ye eka esie. Kop uyo esie, koro se ẹdikotde mfri fo edito Isaac.+ 13  Edi amaedi eyen ofụn an̄wan emi,+ nyanam enye edi idụt n̄ko, koro enye edide eyen fo.”+ 14  Ndien Abraham abak edemede ke usenubọk ada uyo ye mmọn̄ ke ekpeme ikpa odori Hagar ke afara,+ omụm eyen+ oro ọnọ enye, onyụn̄ osio enye unyọn̄. Ndien enye ọnyọn̄ onyụn̄ okoyo ke wilderness Beer-sheba.+ 15  Ke akpatre mmọn̄ okụre+ ke ekpeme ikpa oro ndien enye otop+ eyen oro enịm ke idak eto kiet. 16  Ekem enye aka okosụhọde etetie, ke n̄kpọ nte ubọk iyụrọ kiet, koro enye ọkọdọhọde ete: “Nyomke ndikụt ini emi eyen oro edikpade.”+ Ntem enye etie nsannsan onyụn̄ ọtọn̄ọ ndimenede uyo esie ntua eyet.+ 17  Ndien Abasi okop uyo eyen oro,+ angel Abasi onyụn̄ etie ke enyọn̄ okot Hagar ete:+ “Hagar, nso inam fi? Kûfehe ndịk koro Abasi omokop uyo eyen oro ke ebiet emi enye odude. 18  Daha ke enyọn̄, menede eyen oro nyụn̄ da ubọk fo mụm enye kama, koro nyanam enye edi akamba idụt.”+ 19  Ekem Abasi atat enye enyịn, enye onyụn̄ okụt obube mmọn̄;+ ndien enye aka okokoi mmọn̄ ọyọhọ ekpeme ikpa oro onyụn̄ ọnọ eyen oro ọn̄wọn̄. 20  Ndien Abasi odu ye eyen oro,+ enye onyụn̄ ọkọri onyụn̄ odụn̄ ke wilderness; enye onyụn̄ akabade edi otop utịgha.+ 21  Enye onyụn̄ odụn̄ ke wilderness Paran,+ eka esie onyụn̄ ada n̄wan ke isọn̄ Egypt ọnọ enye. 22  Edikem ke ini oro Abimelech ye Phicol, etubom mbonekọn̄ esie, ẹdọhọ Abraham ẹte: “Abasi odu ye afo ke kpukpru se afo anamde.+ 23  Da enyịn̄ Abasi n̄wọn̄ọ+ nọ mi ete ke udubian̄ake mi ye nditọ mi ye nditọ nditọ mi;+ nte ke afo ayada ima-nsọn̄ọnda oro mmade fi+ anam n̄kpọ ye ami ye isọn̄ emi afo odụn̄de nte esenowo.”+ 24  Ntre Abraham ọdọhọ ete: “Nyọn̄wọn̄ọ.”+ 25  Ke ini Abraham ọkọsọn̄ọde asua ọnọ Abimelech aban̄a obube mmọn̄ oro mme asan̄autom Abimelech ẹkebọde ke n̄kanubọk,+ 26  Abimelech ọdọhọ ete: “Ndiọn̄ọke owo emi akanamde n̄kpọ emi, afo ukunyụn̄ usianke mi, ami n̄konyụn̄ n̄kopke ibọhọke mfịn emi.”+ 27  Ndien Abraham ọnọ Abimelech erọn̄ ye enan̄,+ ndien mmọ mbiba ẹnam ediomi.+ 28  Ke ini Abraham osiode uman erọn̄ itiaba enịm n̄kan̄ kiet, 29  Abimelech obụp Abraham ete: “Uman erọn̄ itiaba emi afo osiode enịm n̄kan̄ kiet edi kaban̄a nso?” 30  Enye ọbọrọ ete: “Afo enyene ndibọ mi uman erọn̄ itiaba emi, man edi ntiense+ nte ke ami n̄ketịbi obube mmọn̄ emi.” 31  Ntak edi oro enye okotde ebiet oro Beer-sheba,+ koro do ke mmọ mbiba ẹkeda un̄wọn̄ọ. 32  Ntem mmọ ẹnam ediomi+ ke Beer-sheba, ndien ekem Abimelech ye Phicol, etubom mbonekọn̄ esie, ẹfiak ẹnyọn̄ọ isọn̄ mbon Philistia.+ 33  Ndien enye ọtọ eto tamarisk ke Beer-sheba onyụn̄ okot enyịn̄ Jehovah+ do, kpa nsinsi Abasi.+ 34  Ndien Abraham odụn̄ nte esenowo ke isọn̄ mbon Philistia ke ediwak usen.+

Mme Ikọ Idakisọn̄