Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 19;1-38

19  Edikem angel iba oro ẹsịm Sodom ke mbubreyo, ndien Lot etie ke inuaotop Sodom.+ Ke ini Lot okụtde mmọ, enye aka okosobo ye mmọ onyụn̄ onụhọ ọnọ mmọ, ekịbi iso esie ke isọn̄.+  Ndien enye ọdọhọ ete: “Mbọk mbọn̄ mi, ẹkpọn̄ ọtọ emi, mbọk, ẹdi ke ufọk ofụn mbufo ẹdidu okoneyo emi man ẹyet mbufo ukot.+ Ndien mbufo ẹyebak ẹnyọn̄ọ ke usenubọk.”+ Edi mmọ ẹdọhọ ẹte: “Baba, nnyịn ididan̄ ke an̄wa obio ke okoneyo emi.”+  Edi enye enen̄ede eyịre mmọ+ tutu mmọ ẹdaha ẹtiene enye ẹkedụk ufọk esie. Ndien enye anam udia ọnọ mmọ,+ onyụn̄ asan̄ uyo eke leaven mîdụhe,+ ndien mmọ ẹdia n̄kpọ.  Edi mbemiso mmọ ẹsụhọrede ẹna, irenowo Sodom ẹdi ẹdikan ufọk oro ẹkụk,+ ọtọn̄ọde ke ekpri eyeneren tutu esịm akani eren, kpukpru owo ẹwọrọ ẹdi nte otu kiet.+  Ndien mmọ ẹfiori ẹkot Lot ẹte: “Iren oro ẹkedide ufọk fo okoneyo emi? Sion̄o mmọ sọk nnyịn man idan̄ mmọ.”+  Ekem Lot ọwọrọ etiene mmọ ke enyịnusụn̄ onyụn̄ eberi usụn̄.  Ndien enye ọdọhọ ete: “Mbọk, nditọete mi, ẹkûnam utọ idiọkn̄kpọ emi.+  Mbọk, sese mmenyene nditọiban iba emi akanam mînyeneke ebuana ye erenowo.+ Mbọk, ẹyak nda mmọ nsọk mbufo. Ndien ẹnam ye mmọ nte ọfọnde mbufo ke enyịn.+ Edi mbufo ẹkûnam iren emi n̄kpọ ndomokiet,+ koro emi esịn mmọ ẹdụk ke idak ọkọm mi.”+  Edi mmọ ẹdọhọ ẹte: “Daha ke usụn̄!” Ẹnyụn̄ ẹdian do ẹte: “Ikpọn̄ owo emi ekedidu mi nte esenowo,+ edi idahaemi enye oyom ndidi ebiereikpe nnyịn.+ Nnyịn iyakam idiọk ye afo ikan nte idiọkde ye mmọ.” Ndien mmọ ẹnen̄ede ẹberi Lot+ tutu ẹkpere ndibụn̄ usụn̄ ndụk.+ 10  Ntre mbon oro ẹnyan ubọk ẹmụm Lot ẹsịn ke ufọk ẹnyụn̄ ẹberi usụn̄. 11  Edi mmọ ẹnam enyịn ekịm mbon oro ẹkedude ke enyịnusụn̄,+ ọtọn̄ọde ke n̄kpri-n̄kan tutu esịm n̄kponn̄kan,+ ndien mmọ ẹyom enyịnusụn̄ tutu ẹkpa mba.+ 12  Ekem mbon oro ẹdọhọ Lot ẹte: “Nte emenyene owo efen ekededi ke obio emi? Ukot fo ye nditọiren fo ye nditọiban fo ye kpukpru se idide okwo ke obio emi, da mmọ wọrọ ke ebiet emi!+ 13  Koro nnyịn imọn̄ isobo ebiet emi, koro mfiori mmọ omokpon ke iso Jehovah,+ tutu Jehovah ọdọn̄ nnyịn ete idisobo obio emi.”+ 14  Ntem Lot aka ọkọdọhọ mme ukot esie emi ẹkeyomde ndidọ nditọiban esie, ete: “Mbufo ẹdaha ke enyọn̄! Ẹwọn̄ọ ke ebiet emi, koro Jehovah ọmọn̄ osobo obio emi!”+ Edi enye etie nte owo mbubru+ ke enyịn mme ukot esie. 15  Edi ke eyo esierede, mme angel oro ẹnyịk Lot, ẹte: “Daha ke enyọn̄! Da n̄wan fo ye nditọiban fo iba emi ẹdude mi,+ mbak ẹdisobo fi ke ntak ndudue obio emi!”+ 16  Ntem ke enye osụk abiatde ini,+ mbon oro ẹmụm enye ye n̄wan esie ye nditọiban esie mbiba ubọk, ke ntak mbọm Jehovah,+ ẹwọrọ ẹkeyak ke edem obio.+ 17  Ekem, ke ndondo oro mmọ ẹdade mmọ ẹwọrọ ẹkeyak ke edem obio, enye ọdọhọ ete: “Fehe bọhọ ye ukpọn̄ fo!+ Kûse edem+ kûnyụn̄ utuak uda ke ofụri Ikpehe emi!+ Fehe ka ikpehe emi etiede obot obot mbak ẹdisobo fi!”+ 18  Ekem Lot ọdọhọ mmọ ete: “Mbọk, Jehovah, kûyak edi ntre! 19  Mbọk, sese, asan̄autom fo omokụt mfọn ke iso fo,+ afo omonyụn̄ anam ima-mfọnido+ emi afo owụtde mi okpon ke ndinịm ukpọn̄ mi uwem,+ edi ami n̄kemeke ndifehe n̄ka ikpehe emi etiede obot obot mbak afanikọn̄ edisịm mi, ndien ami n̄kpa.+ 20  Mbọk, sese, obio emi odu ekpere ndifehe n̄ka, enye onyụn̄ edi ekpri n̄kpọ.+ Mbọk, yak mfehe n̄ka do—nte oro idịghe ekpri n̄kpọ?—ndien ukpọn̄ mi oyodu uwem.”+ 21  Ntem enye ọdọhọ enye ete: “Mmekere mban̄a fi ke n̄kpọ emi n̄ko,+ ke nditre ndisobo obio oro afo etịn̄de aban̄a.+ 22  Wawara! Fehe ka do, koro n̄kemeke ndinam baba n̄kpọ kiet tutu afo esịm do!”+ Ntak edi oro enye okotde obio oro Zoar.+ 23  Utịn ama asiaha ke isọn̄ oro ke ini Lot esịmde Zoar.+ 24  Ekem Jehovah anam sulphur ye ikan̄ oto Jehovah ke enyọn̄ ẹdep ke Sodom ye Gomorrah.+ 25  Ntem ke enye osobo mme obio oro, ọkọrọ ye ofụri Ikpehe esie ye kpukpru mme andidụn̄ obio oro ye se itịbede ke isọn̄.+ 26  Ndien n̄wan esie, emi etienede enye ke edem, ọtọn̄ọ ndiwọn̄ọde enyịn nse edem, onyụn̄ akabade adaha inụn̄.+ 27  Ekem Abraham abak adaha ke usenubọk aka ebiet oro enye akadade ke iso Jehovah.+ 28  Ndien enye owụk enyịn ese Sodom ye Gomorrah ye ofụri isọn̄ Ikpehe oro onyụn̄ okụt, ndien, sese, nsụn̄ikan̄ oto ke idụt oro ọdọk nte nsụn̄ikan̄ itie ufọp kọrikọri!+ 29  Ekem ke ini Abasi osobode mme obio Ikpehe oro, Abasi eti Abraham ke ndimen Lot nsio ke ini enye osobode mme obio oro Lot okodụn̄de.+ 30  Ekem Lot asan̄a ye nditọiban esie iba ọwọrọ+ ke Zoar okodụn̄ ke ikpehe emi etiede obot obot, koro enye efehede ndịk ndidụn̄ ke Zoar.+ Ntre enye ye nditọiban esie iba ẹdụn̄ ke abaitiat. 31  Ekem adiaha ọdọhọ udun̄wan ete: “Ete nnyịn ọmọsọn̄, erenowo ndomokiet inyụn̄ idụhe ke idụt emi ndinyene ebuana ye nnyịn nte ido ofụri ererimbot edide.+ 32  Di, yak inọ ete nnyịn wine ọn̄wọn̄,+ inyụn̄ idan̄ ye enye man iman nditọ eke ẹtode ete nnyịn.”+ 33  Ntem mmọ ẹnọ ete mmọ wine ọn̄wọn̄ okoneyo oro;+ ekem adiaha odụk akadan̄ ye ete esie, edi ete esie ifiọkke ini emi enye odụkde edina ye ini emi enye adahade ada. 34  Edikem ke ndan̄nsiere adiaha ọdọhọ udun̄wan ete: “Sese mma ndan̄ ye ete nnyịn n̄kpọn̄. Yak inọ enye wine ọn̄wọn̄ okoneyo emi n̄ko. Ndien afo ayaka akadan̄ ye enye, ndien nnyịn iyaman nditọ eke ẹtode ete nnyịn.” 35  Ntem mmọ ẹnọ ete mmọ wine ndien ndien ọn̄wọn̄ okoneyo oro n̄ko; ekem udun̄wan aka akadan̄ ye enye, edi ete esie ifiọkke ini emi enye odụkde edina ye ini emi enye adahade ada. 36  Ndien nditọiban Lot mbiba ẹyomo ẹnọ ete mmọ.+ 37  Ekem adiaha aman eyeneren onyụn̄ osio enye enyịn̄ Moab.+ Enye edi ete Moab tutu esịm mfịn emi.+ 38  Udun̄wan n̄ko aman eyeneren onyụn̄ osio enye enyịn̄ Ben-ammi. Enye edi ete Ammon+ tutu esịm mfịn emi.

Mme Ikọ Idakisọn̄