Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 18;1-33

18  Ekem Jehovah owụt enye idem+ ke otu ikpọ eto Mamre,+ ke adan̄aemi enye etiede ke enyịnusụn̄ tent ke ufọt uwemeyo.+  Ke ini enye emenerede enyịn,+ enye okụt owo ita ẹdade nsannsan. Ke ini okụtde mmọ, enye oto ke enyịnusụn̄ tent esie efehe okosobo ye mmọ onyụn̄ onụhọ ke isọn̄.+  Ndien enye ọdọhọ ete: “Jehovah, edieke n̄kụtde mfọn ke iso fo, mbọk kûsan̄a ube asan̄autom fo.+  Mbọk yak ẹda ekpri mmọn̄ ẹdiyet mbufo ukot.+ Ẹnyụn̄ ẹsụhọde ẹtetie ke idak eto emi.+  Ẹnyụn̄ ẹyak nda esisịt uyo nsọk mbufo ẹda ẹsụk biọn̄. Ekem mbufo ẹmekeme ndibe koro ntak edi oro mbufo ẹkesan̄ade usụn̄ emi ẹdisobo ye asan̄autom mbufo.” Ndien mmọ ẹdọhọ ẹte: “Ọfọn, nam kpa nte afo ọdọhọde.”  Ndien Abraham awara aka ebịne Sarah ke tent ọkọdọhọ ete: “Wara da seah eti ndomuyo ita buen nyụn̄ nam ekara uyo.”+  Ekem Abraham awara aka otu ufene esie onyụn̄ okosio abak ayara enan̄ oro eyede idem ọnọ asan̄autom esie, ndien enye awara etem enye.+  Ekem enye ada bọta ye mmọn̄eba ye abak ayara enan̄ oro enye eketemde edinịm mmọ ke iso.+ Ndien enye ada ke idak eto oro ebet ke adan̄aemi mmọ ẹdiade udia.+  Ndien mmọ ẹbụp enye ẹte: “Enye Sarah, n̄wan fo?”+ Ntem enye ọbọrọ ete: “Enye do ke tent!”+ 10  Ndien enye ete: “Ke akpanikọ, nyafiak ndise fi ke ukem ini emi isua efen, ndien, sese! Sarah, n̄wan fo ayaman eyeneren.”+ Edi Sarah ke akada ke enyịnusụn̄ tent akpan̄ utọn̄, koro tent okodude ke edem angel oro. 11  Abraham ye Sarah ẹma ẹsọn̄ ẹnyụn̄ ẹwak isua.+ Sarah ikonyụn̄ ikwe aba itieisọn̄.+ 12  Ntem Sarah ọtọn̄ọ ndisak ke esịt esie+ ete: “Ke emi mma n̄kọsọn̄ mi, nte mmekeme ndikop inemesịt, ke emi ọbọn̄ mi ama ọkọsọn̄ n̄ko?”+ 13  Ekem Jehovah obụp Abraham ete: “Ntak emi Sarah asakde, ete, ‘Nte ami ke akpanikọ nyaman eyen ke emi mma n̄kọsọn̄ mi?’+ 14  Nte odu n̄kpọ ekededi oro ọsọn̄de akan Jehovah?+ Ke edikem ini, nyafiak ndise fi ke ukem ini emi isua efen ndien Sarah ayaman eyeneren.” 15  Edi Sarah akan̄, ete: “N̄kasakke-o!” Koro enye ekefehede ndịk. Ntem enye ọdọhọ ete: “Kûkan̄! koro ama asak.”+ 16  Ekem mmọ ẹdaha ẹda ẹnyụn̄ ẹwọn̄ọde iso ẹse Sodom,+ ndien Abraham asan̄a ye mmọ ndida mmọ n̄kayak.+ 17  Ndien Jehovah ọdọhọ ete: “Nte nyedịp Abraham se nyomde ndinam?+ 18  Kamse, Abraham iditreke ndikabade edi akwa ye ọkpọsọn̄ idụt, ndien kpukpru mme idụt isọn̄ ẹyebọ edidiọn̄ ke ntak esie.+ 19  Koro mmemehe ye enye man enye okpowụk nditọ esie ye mbonufọk esie oro ẹditienede enye ete ẹtiene usụn̄ Jehovah ẹnyụn̄ ẹnam edinen ido ye unenikpe;+ man Jehovah akpanam se enye eketịn̄de aban̄a Abraham.”+ 20  Ndien Jehovah ọdọhọ ete: “Mfiori Sodom ye Gomorrah+ omokpon, idiọkn̄kpọ mmọ omonyụn̄ odobi etieti.+ 21  Mmọn̄ nsụhọde n̄kese man mfiọk m̀mê mmọ ẹnam kpa nte uyo mfiori emi esịmde mi, ndien mîdịghe ntre nyọfiọk.”+ 22  Ekem mmọ ẹdaha ke ọtọ oro ẹka Sodom; edi Jehovah+ osụk adada ke iso Abraham.+ 23  Ndien Abraham asan̄a ekpere onyụn̄ obụp ete: “Nte oyosobo ndinen owo ọkọrọ ye mme idiọkowo?+ 24  Nso edieke ndinen owo aba ye duop ẹdude ke obio oro? Nte oyosobo mmọ udunyụn̄ ufenke unọ ebiet oro ke ntak ndinen owo aba ye duop emi?+ 25  Nsa fo-o, udusoboke edinen owo ye idiọkowo, man etie ye edinen owo ukem nte etiede ye idiọkowo!+ Nsa fo-o udunamke ntem.+ Nte Ebiereikpe ofụri ererimbot idinamke se inende?”+ 26  Ekem Jehovah ọdọhọ ete: “Edieke n̄kụtde ndinen owo aba ye duop ke Sodom, nyadahado nnọ ofụri ebiet oro ke ntak mmọ.”+ 27  Edi Abraham ọdọhọ ete: “Mbọk, sese nte ndade ke iso Jehovah ntịn̄ ikọ, ke ini ndide ntan ye ntọn̄.+ 28  Nso edieke okụtde ndinen owo aba ye ition. Nte oyosobo ofụri obio oro ke ntak owo ition oro ẹsụhọde ndikem?” Enye ọbọrọ ete: “Ndisoboke edieke n̄kụtde owo aba ye ition do.”+ 29  Ndien enye afiak ọdọhọ ete: “Nso edieke okụtde owo aba do?” Enye ọbọrọ ete: “Ndisoboke ke ntak owo aba oro.” 30  Ndien enye ọdọhọ ete: “Mbọk, yak Jehovah okûyat esịt,+ yak nsụk mbụp:+ Nso edieke okụtde owo edịp ye duop do?” Enye ọbọrọ ete: “Ndisoboke edieke n̄kụtde owo edịp ye duop do.” 31  Ndien enye ọdọhọ ete: “Mbọk, sese mmada ke iso Jehovah nditịn̄ ikọ:+ Nso edieke okụtde owo edịp do?” Enye ọbọrọ ete: “Ndisoboke ke ntak owo edịp oro.”+ 32  Ke akpatre enye ọdọhọ ete: “Mbọk, yak Jehovah okûyat esịt,+ yak nsụk mbụp ini kiet emi:+ Nso edieke okụtde owo duop do?” Enye ọbọrọ ete: “Ndisoboke ke ntak owo duop oro.”+ 33  Ndien Jehovah+ adaha ke ama okokụre nditịn̄ ikọ ye Abraham, Abraham onyụn̄ afiak ke ebiet esie.

Mme Ikọ Idakisọn̄