Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 16;1-16

16  Ndien Sarai, n̄wan Abram, imanke eyen inọ enye;+ edi enye ama enyene ofụn an̄wan, eyen Egypt, emi ekerede Hagar.+  Ntem Sarai ọdọhọ Abram ete: “Mbọk sese! Jehovah iyakke mi mman eyen.+ Mbọk, nyene ebuana ye ofụn an̄wan mi, m̀mê nyenyene nditọ nto enye.”+ Ntem Abram okop uyo Sarai.+  Edikem ke utịt ọyọhọ isua duop tọn̄ọ nte Abram okodụn̄ ke isọn̄ Canaan, Sarai, n̄wan Abram, emen Hagar, ofụn an̄wan esie emi otode Egypt ọnọ Abram ebe esie ọdọ.+  Ndien enye enyene ebuana ye Hagar, enye onyụn̄ oyomo. Ke ini enye ọfiọkde ete imọ imoyomo, enye ọtọn̄ọ ndise ekaufọk esie ke ndek.+  Ndien Sarai ọdọhọ Abram ete: “Yak idiọk oro ẹnamde mi odoro fi ke idem. Ami n̄kanam ofụn an̄wan mi ana fi ke ikpanesịt, edi ke ini enye ọfiọkde ete imọ imoyomo, enye ọtọn̄ọ ndise mi ke ndek. Yak Jehovah ekpe ikpe ke ufọt mi ye afo.”+  Ntem Abram ọdọhọ Sarai+ ete: “Sese! Ofụn an̄wan fo odu fi ke ubọk. Nam se afo amade ye enye.”+ Ekem Sarai ọtọn̄ọ ndifiomo enye tutu n̄wan emi efehe ọkpọn̄ enye.+  Ekem angel+ Jehovah okụt enye ke idịm mmọn̄ kiet ke wilderness, idịm mmọn̄ oro okodu ke usụn̄ Shur.+  Ndien enye ọdọhọ ete: “Hagar, ofụn an̄wan Sarai, afo oto m̀mọ̀n̄ edi onyụn̄ aka m̀mọ̀n̄?” Enye ọbọrọ ete: “Mfehe n̄kpọn̄ Sarai, ekaufọk mi.”  Ndien angel Jehovah ọdọhọ enye ete: “Fiak tiene ukaufọk nyụn̄ kosụhọde idem dụn̄ ye enye.”+ 10  Angel Jehovah onyụn̄ ọdọhọ enye ete: “Nyanam mfri+ fo enen̄ede awak tutu owo ikemeke ndibat.”+ 11  Ekem angel Jehovah ọdọhọ enye ete: “Sese afo omoyomo, oyonyụn̄ aman eyeneren onyụn̄ osio enye enyịn̄ Ishmael;+ koro Jehovah omokụt ukụt+ fo. 12  Enye ayakabade etie nte zebra. Enye ayanam ikọ ye kpukpru owo, kpukpru owo ẹyenyụn̄ ẹnam ikọ ye enye;+ ndien enye oyodụn̄ ke iso kpukpru nditọete esie.”+ 13  Ekem n̄wan oro ọtọn̄ọ ndikot enyịn̄ Jehovah emi eketịn̄de ikọ ye enye, ete: “Afo edi Abasi emi okụtde n̄kpọ,”+ koro enye ọdọhọde ete: “Nte ami mmokụt enye emi okụtde mi?” 14  Ntak edi oro ẹkotde idịm mmọn̄ oro Beer-lahai-roi.+ Enye odu ke ufọt Kadesh ye Bered. 15  Ekem Hagar aman eyeneren ọnọ Abram ndien Abram okot eyen esie emi Hagar akamande Ishmael.+ 16  Ndien Abram ekedi isua anan̄ ye itiokiet ke ini Hagar amande Ishmael ọnọ Abram.

Mme Ikọ Idakisọn̄