Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Genesis 14;1-24

14  Edikem ke eyo Amraphel edidem Shinar,+ Arioch edidem Ellasar, Chedorlaomer+ edidem Elam,+ ye Tidal edidem Goiim,+  mmọ emi ẹn̄wana ekọn̄ ye Bera edidem Sodom+ ye Birsha edidem Gomorrah+ ye Shinab edidem Admah+ ye Shemeber edidem Zeboiim+ ye edidem Bela (oro edi, Zoar).+  Kpukpru mmọ ẹsan̄a nte otu kiet+ ẹka Unaisọn̄ Itịghede Siddim,+ oro edi, Inyan̄ Inụn̄.+  Mmọ ẹkesan̄a utom ẹnọ Chedorlaomer ke isua duopeba, edi ke ọyọhọ isua duopeta mmọ ẹsọn̄ ibuot.  Ndien ke ọyọhọ isua duopenan̄, Chedorlaomer ye ndidem emi ẹdude ye enye ẹdi ẹdin̄wana ẹnyụn̄ ẹkan mme Rephaim ke Ashteroth-karnaim+ ye mme Zuzim ke Ham ye mme Emim+ ke Shaveh-kiriathaim,  ye mme Horite+ ke obot mmọ, ke Seir,+ ẹnyụn̄ ẹsụhọde ẹsịm El-paran,+ emi odude ke wilderness.  Ekem mmọ ẹfiak ẹdi En-mishpat, oro edi, Kadesh,+ ẹnyụn̄ ẹdin̄wana ẹkan ofụri isọn̄ mbon Amalek+ ye mme Amorite+ n̄ko emi ẹkedụn̄de ke Hazazon-tamar.+  Ndien edidem Sodom ye edidem Gomorrah ye edidem Admah ye edidem Zeboiim ye edidem Bela (oro edi Zoar), ẹwọn̄ọ ẹka Unaisọn̄ Itịghede Siddim+ ndikan̄wana ye mmọ,  ndikan̄wana ye Chedorlaomer edidem Elam ye Tidal edidem Goiim ye Amraphel edidem Shinar ye Arioch edidem Ellasar;+ ndidem inan̄ ẹn̄wana ye ndidem ition. 10  Mme obube itai+ ẹkeyọyọhọ Unaisọn̄ Itịghede Siddim;+ ndien ndidem Sodom ye Gomorrah+ ẹfen̄e ẹkeduọn̄ọ ẹdọn̄ọ do, ndien mbon oro ẹkesụhọde ẹfen̄e ẹka mme ikpehe oro ẹtiede obot obot.+ 11  Ekem mme andikan ẹbụme kpukpru inyene ye udia mbon Sodom ye Gomorrah ẹda ẹnyọn̄ọ.+ 12  Mmọ n̄ko ẹda Lot eyen eyeneka Abram ye inyene esie ẹnyọn̄ọ. Enye okodụn̄ ke Sodom+ ini oro. 13  Ekem owo kiet emi ọkọbọhọde edi editịn̄ ọnọ Abram eyen Hebrew.+ Enye okodụn̄ ke ufọt ikpọ eto Mamre eyen Amorite,+ eyeneka Eshcol ye eyeneka Aner;+ mmọ ẹma ẹnyụn̄ ẹdụk ediomi ndidi ufan Abram. 14  Ntem ke Abram okop ke ẹma ẹmụm eyeneka imọ ẹnyọn̄.+ Ndien enye okot irenowo esie emi ẹma ẹkebọ ukpep,+ ifịn ikie ita ye efịteta emi ẹmanade ke ufọk esie,+ onyụn̄ ebịne mmọ tutu esịm Dan.+ 15  Ndien ke okoneyo enye abahade mbonekọn̄+ esie esịn ke udịm iba, enye ye ifịn esie, ẹn̄wana ye mmọ, ẹkan mmọ ẹnyụn̄ ẹbịne mmọ tutu ekesịm Hobah, emi edide edem edere Damascus. 16  Ndien enye ọbọ kpukpru inyene,+ onyụn̄ ọbọ Lot eyeneka esie ye inyene esie ye iban ọkọrọ ye mme owo eken.+ 17  Ekem edidem Sodom ọwọrọ aka ndikosobo ye enye ke ini enye ọnyọn̄de edi ke ama akakan Chedorlaomer ye ndidem oro ẹkedude ye enye ke Unaisọn̄ Itịghede Shaveh, oro edi, Unaisọn̄ Itịghede edidem.+ 18  Ndien Melchizedek+ edidem Salem+ ada uyo ye wine+ edi, enye okonyụn̄ edi oku Ata Edikon̄ Abasi.+ 19  Ndien enye ọdiọn̄ Abram onyụn̄ ọdọhọ ete: “Yak Ata Edikon̄ Abasi,+ Andinam enyọn̄ ye isọn̄,+ ọdiọn̄ Abram; 20  Yak itoro onyụn̄ enyene Ata Edikon̄ Abasi,+ Emi akayakde mbon oro ẹfịkde fi esịn fi ke ubọk!”+ Ndien Abram osio ubak kiet ke itie duop ke otu kpukpru n̄kpọ ọnọ enye.+ 21  Ekem edidem Sodom ọdọhọ Abram ete: “Yak mme ukpọn̄+ kpọt nọ mi, edi da inyene.” 22  Edi Abram ọdọhọ edidem Sodom ete: “Mmemenede ubọk mi ke enyọn̄ n̄n̄wọn̄ọ+ nnọ Jehovah Ata Edikon̄ Abasi, Andinam enyọn̄ ye isọn̄, 23  nte ke ndibọhọ n̄kpọ ndomokiet eke enyenede fi+ ọtọn̄ọde ke ndidi tutu esịm urụk ikpaukot, mbak afo ududọhọ ete, ‘Ami n̄kanam Abram oforo.’ 24  Nyomke ndomo n̄kpọ kiet!+ Ke mîbọhọke se n̄kparawa ẹma ẹkedadia, ye udeme mbon oro ẹkesan̄ade ye ami, Aner ye Eshcol ye Mamre+—yak mmọ ẹbọ se idide udeme mmọ.”+

Mme Ikọ Idakisọn̄