Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Galatia 3;1-29

3  O mme anana-ibuot mbon Galatia, anie akada mbufo edisịn ke idak idiọk odudu,+ kpa mbufo emi ẹkewụtde Jesus Christ an̄wan̄wa ke iso mbufo nte owo emi ẹkọn̄de ke eto?+  Emi kpọt ke nyom ndifiọk nto mbufo: Ndi mbufo ẹkebọ spirit+ oto ke mme utom ibet+ m̀mê ẹkebọ oto ke edibuọt idem ke se mbufo ẹkekopde?+  Nte mbufo ẹnana ibuot ntre? Ke ẹma ẹketọn̄ọ ke spirit+ nte mbufo ẹyom ndisịm utịt ke obụkidem?+  Ndi mbufo ẹkekụt ata ediwak ukụt ntre ke ikpîkpu?+ N̄kereke ke ekedi ke ikpîkpu.  Ke ntre, enye emi ọnọde mbufo spirit+ onyụn̄ anamde mme utom odudu+ ke otu mbufo, nte enye anam emi oto ke mme utom ibet m̀mê oto ke edibuọt idem ke se enye okokopde?  Kpa nte Abraham “ọkọbuọtde idem ye Jehovah, ndien ẹbat oro ẹnọ enye ke edinen ido.”+  Ke akpanikọ mbufo ẹmefiọk ẹte ke mbon oro ẹsọn̄ọde ẹyịre ke mbuọtidem+ ẹdi nditọ Abraham.+  Edi sia N̄wed Abasi ekebemde iso okụt ete Abasi ayabat mbon idụt ke edinen oto ke mbuọtidem, enye ama ebem iso atan̄a eti mbụk ọnọ Abraham, ete: “Oto ke afo ẹyediọn̄ kpukpru mme idụt.”+  Mmọdo ẹdiọn̄+ mbon oro ẹsọn̄ọde ẹyịre ke mbuọtidem kpa nte ẹkediọn̄de anam-akpanikọ Abraham.+ 10  Koro kpukpru owo eke ẹberide edem ke mme utom ibet ẹdu ke idak isụn̄i; koro ẹwet ntem ẹte: “Ọdọdiọk ọnọ owo ekededi eke mîsọn̄ọke ida ke kpukpru n̄kpọ oro ẹwetde ke n̄wed Ibet man anam mmọ.”+ 11  Akan oro, ana in̄wan̄-in̄wan̄ nte ke Abasi ibatke baba owo kiet ke edinen+ oto ke ibet, koro “edinen owo edidu uwem oto ke mbuọtidem.”+ 12  Edi Ibet isan̄ake n̄kpọ ye mbuọtidem, edi “owo eke anamde mmọ edida mmọ odu uwem.”+ 13  Christ ama edep+ nnyịn osio+ ke isụn̄i Ibet ke ndikabade ndi n̄kpọ isụn̄i+ ke ibuot nnyịn, koro ẹwet ntem ẹte: “Owo eke ẹyịride ke eto edi n̄kpọ isụn̄i.”+ 14  Emi ekedi man edidiọn̄ Abraham ekpebe ke Jesus Christ esịm mme idụt,+ man nnyịn ikpọbọ spirit+ oro ẹken̄wọn̄ọde oto ke mbuọtidem nnyịn.+ 15  Nditọete, nda uwụtn̄kpọ owo ntịn̄: Owo ndomokiet ibiatke m̀mê ndidian n̄kpọ ke ediomi emi ẹma ẹkesọn̄ọ, okposụkedi edide eke owo.+ 16  Edi ẹken̄wọn̄ọ mme un̄wọn̄ọ ẹnọ Abraham+ ye mfri esie.+ Enye idọhọke: “Mme mfri,” nte n̄kpọ eke edide ediwak, edi nte n̄kpọ eke edide kiet:+ “Mfri fo,”+ emi edide Christ.+ 17  N̄ko-n̄ko, ndọhọ ntem nte: Amaedi ediomi emi Abasi ekebemde iso ọsọn̄ọ,+ Ibet emi ekedide edidu ke n̄kpọ nte isua ikie inan̄ ye edịp ye duop+ ẹma ẹkebe, inamke enye ọwọrọ ikpîkpu, man akpabiat un̄wọn̄ọ oro efep.+ 18  Koro edieke udeme asan̄ade ye ibet, enye isan̄ake ye un̄wọn̄ọ aba;+ edi Abasi ke mfọnido ama ada enye ọnọ Abraham ebe ke un̄wọn̄ọ.+ 19  Nso ndien ikedi ntak Ibet? Ẹkeda enye ẹdidian man anam ubiatibet ayarade,+ tutu mfri emi ẹken̄wọn̄ọde un̄wọn̄ọ ẹnọ edisịm;+ ndien ẹkenọ enye ebe ke mme angel+ ke ubọk esịne-ufọt.+ 20  Edi esịne-ufọt idụhe ke ebiet emi owo kiet kpọt odude, edi Abasi edi kiet kpọt.+ 21  Ndi Ibet, ke ntre, ọbọbiọn̄ọ un̄wọn̄ọ Abasi?+ Idịghe ntre! Koro edieke ẹkenọde ibet oro ekemede ndinam owo odu uwem,+ ke akpanikọ edinen ido okpoto ke ibet oro.+ 22  Edi N̄wed Abasi+ omomụm kpukpru n̄kpọ ọdọn̄ ọtọkiet ke idak idiọkn̄kpọ,+ man ẹkpemen un̄wọn̄ọ emi otode ke edibuọt idem ye Jesus Christ ẹnọ mmọ emi ẹbuọtde idem.+ 23  Nte ededi, mbemiso mbuọtidem ekedide edisịm,+ ẹkenịm nnyịn ke itie ukpeme ke idak ibet,+ ẹkwi nnyịn ẹbaha ke idak ukpeme, nditie mbet mbuọtidem oro ẹdiyararede.+ 24  Mmọdo Ibet ama akabade edi andikpeme nnyịn emi adade esịm Christ,+ man ẹkpebat nnyịn ke edinen+ oto ke mbuọtidem. 25  Edi ke emi mbuọtidem ama ekedisịm,+ nnyịn idụhe aba ke idak andikpeme.+ 26  Ke akpanikọ, kpukpru mbufo ẹdi nditọ+ Abasi oto ke mbuọtidem mbufo ke Christ Jesus. 27  Koro kpukpru mbufo emi ẹkenade baptism ẹdụk ke Christ+ ẹmemen Christ ẹsịne.+ 28  Jew m̀mê Greek* idụhe,+ ofụn m̀mê amanaisọn̄ idụhe,+ eren m̀mê n̄wan idụhe;+ koro kpukpru mbufo ẹdi owo kiet ke Christ Jesus.+ 29  Akan oro, edieke mbufo ẹdide eke Christ, mbufo ke akpanikọ ẹdi mfri Abraham,+ mme ada udeme nnyene nte ekemde ye un̄wọn̄ọ.+

Mme Ikọ Idakisọn̄

Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.