Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezra 6;1-22

6  Adan̄aoro ke Edidem Darius ọkọnọ ewụhọ, ndien mmọ ẹnam ndụn̄ọde ke ufọk emi ẹbonde mme n̄wetnnịm n̄kpọ+ ye mme n̄kpọuto do ke Babylon.  Ndien ẹkụt ikpan̄wed ye etop oro ẹwetde ke esịt ẹban̄a n̄kpọ emi ke Ecbatana ke ebiet ukpeme ke ikpehe obio ukara Media:+  “Ke akpa isua emi Edidem Cyrus akarade,+ Edidem Cyrus ọnọ ewụhọ aban̄a ufọk Abasi ke Jerusalem ete: Yak ẹfiak ẹbọp ufọk oro nte ebiet emi mmọ ẹdiwade mme uwa,+ yak ẹnyụn̄ ẹsịn itiat idakisọn̄ esie, idaha esie edi cubit ata, ubom esie onyụn̄ edi cubit ata,+  yak enye enyene udịm ikpọ itiat+ ita ye udịm eto kiet;+ ndien yak okụk emi ẹbiatde oto ufọk edidem.+  Ndien n̄ko yak ẹfiak ẹtan̄ n̄kpoduoho+ gold ye silver ufọk Abasi oro Nebuchadnezzar+ okosion̄ode ke temple ke Jerusalem ada aka Babylon, ẹfiak ẹka temple ke Jerusalem ke itie esie, ẹkebon mmọ ke ufọk Abasi.+  “Ke emi, Tattenai+ andikara edem Akpa+ oko, Shethar-bozenai+ ye mme nsan̄a mmọ, n̄kpri mme andikara+ edem Akpa oko, mbufo ẹkûsan̄a ẹkpere ebiet oro.+  Ẹsion̄o idem ẹkpọn̄ utom ufọk Abasi oro.+ Edi andikara mme Jew ye mbiowo mme Jew ẹdifiak ẹbọp ufọk Abasi oro ke itie esie.  Ndien ami mmọnọ ewụhọ+ mban̄a se mbufo ẹdinamde ye mbiowo mme Jew emi, man ẹfiak ẹbọp ufọk Abasi emi; amaedi okụk oro ẹbiatde, ẹyesiwara ẹsio ke tax ufọk ubon inyene+ edidem ke edem Akpa oko ẹnọ+ irenowo emi ye unana editre.+  Ndien amaedi se ẹyomde, nditọ nyara enan̄+ ọkọrọ ye mme okukịm+ erọn̄ ye nditọerọn̄+ ndida n̄wa edifọp uwa nnọ Abasi enyọn̄, wheat,+ inụn̄,+ wine+ ye aran,+ kpa nte mme oku ke Jerusalem ẹdọhọde, yak ẹkûtre ndika iso nnọ mmọ ke usen ke usen; 10  man mmọ ẹka iso+ ẹwa edinem uwa+ ẹnọ Abasi enyọn̄ ẹnyụn̄ ẹbọn̄ akam ẹban̄a uwem edidem ye nditọ esie.+ 11  Ndien ami mmọnọ ewụhọ nte, amaedi owo ekededi eke abiatde+ ewụhọ emi, ẹyedụri eto+ ẹsio ke ufọk esie ẹnyụn̄ ẹkọn̄+ enye ke eto oro ẹwot, ndien ufọk esie ayakabade edi ufọk ekwe mbio obio ke ntak emi.+ 12  Ndien Abasi emi anamde enyịn̄+ esie odu do akpakam osobo edidem ekededi ye mbio obio eke ẹdomode ndibiat ewụhọ emi ẹnyụn̄ ẹwụride+ ufọk Abasi emi odude ke Jerusalem. Ami, Darius, nnọ ewụhọ emi. Yak ẹnam enye iwiwa.” 13  Ekem Tattenai andikara edem Akpa+ oko, Shethar-bozenai+ ye mme nsan̄a mmọ ẹwara ẹnam kpa nte Edidem Darius okowụkde. 14  Ndien mbiowo+ mme Jew ẹbọp,+ utom onyụn̄ aka iso nte ekemde ye ntịn̄nnịm ikọ prọfet Haggai+ ye Zechariah+ eyeyen Iddo,+ ndien mmọ ẹbọp ẹnyụn̄ ẹkụre ke ewụhọ Abasi Israel+ ye ke ewụhọ Cyrus+ ye Darius+ ye Artaxerxes+ edidem Persia. 15  Ndien mmọ ẹbọp ufọk emi ẹkụre ke ọyọhọ usen ita ke ọfiọn̄ enyọn̄ Adar,+ oro edi, ke ọyọhọ isua itiokiet emi Edidem Darius akarade. 16  Ndien nditọ Israel, mme oku ye nditọ Levi+ ye n̄kani mbon ntan̄mfep+ eken ẹnịm usọrọ ediyak+ ufọk Abasi emi nnọ ye idatesịt. 17  Ndien ke usọrọ ediyak ufọk Abasi emi nnọ, mmọ ẹnọ nyara enan̄ ikie, okukịm erọn̄ ikie iba, nditọerọn̄ ikie inan̄ ẹnyụn̄ ẹnọ okpo ebot duopeba ke uwa idiọkn̄kpọ ofụri Israel, nte ibat esien Israel edide.+ 18  Ndien mmọ ẹmek mme oku ke mme otu mmọ ye nditọ Levi ke mme otu+ mmọ man ẹnam utom Abasi ke Jerusalem, nte ẹketemede ke n̄wed Moses.+ 19  Ndien n̄kani mbon ntan̄mfep ẹnịm passover+ ke ọyọhọ usen duopenan̄ ke akpa ọfiọn̄.+ 20  Sia mme oku ye nditọ Levi ẹma ẹkenam idem asana+ nte otu kiet, kpukpru mmọ ẹma ẹsana, mmọ ẹnyụn̄ ẹwot unam+ passover ẹnọ kpukpru n̄kani mbon ntan̄mfep ye nditọete mmọ kpa mme oku ye idemmọ. 21  Ndien nditọ Israel emi ẹkenyọn̄de Ntan̄mfep ẹdi ẹta,+ ọkọrọ ye kpukpru owo oro ẹkedian̄arede idem ẹkpọn̄ ndedehe+ n̄kpọ mme idụt isọn̄ oro ẹda ye mmọ, man ẹyom Jehovah Abasi Israel.+ 22  Ndien mmọ ẹnịm usọrọ uyo eke leaven mîdụhe+ ke usen itiaba ye idatesịt; koro Jehovah akanamde mmọ ẹdat esịt, enye okonyụn̄ ọwọn̄ọrede+ esịt edidem Assyria ọnọ mmọ man ọsọn̄ọ mmọ ubọk ke utom ufọk ata Abasi, kpa Abasi Israel.

Mme Ikọ Idakisọn̄