Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Ezekiel 43;1-27

43  Ekem enye anam mi n̄ka inuaotop, kpa inuaotop emi esede edem usiahautịn.+  Ndien, sese! ubọn̄+ Abasi Israel oto n̄kan̄ edem usiahautịn edi,+ uyo esie onyụn̄ ebiet uyom akamba mmọn̄;+ ndien isọn̄ ayama ke ntak ubọn̄+ esie.  Ndien enye ebiet n̄kukụt oro n̄kokụtde,+ ebiet n̄kukụt oro n̄kokụtde ke ini n̄kedide ndisobo+ obio; ndien mme n̄kukụt eke ẹbietde n̄kukụt oro n̄kokụtde ke mben Akpa Chebar+ ẹdu, ndien ami nduọ n̄kịbi iso ke isọn̄.  Ndien ubọn̄+ Jehovah oto usụn̄ inuaotop emi iso esede n̄kan̄ edem usiahautịn odụk Ufọk.+  Ndien spirit emenede mi ọdọk+ onyụn̄ ada mi edi okụre emi odude ke esịt esịt, ndien, sese! ubọn̄ Jehovah ọyọhọ Ufọk oro.+  Ndien ami n̄kop owo esịnede ke Ufọk+ oro etịn̄ ikọ ye ami, ndien owo oro edi edida mi ke n̄kan̄.+  Ndien enye ọdọhọ mi ete: “Eyen owo, emi edi ebiet ebekpo+ mi ye ebiet ekaikpat+ mi, emi ndidụn̄de ke ufọt nditọ Israel ke nsinsi;+ ndien mmọ, ufọk Israel, iditọn̄ọke aba ntak isabade edisana enyịn̄+ mi, mmọ ye ndidem mmọ,+ ke use mmọ ye ke mme okpo+ ndidem mmọ ke ini mmọ ẹkpan̄ade,  ke mmọ ndinịm asan̄udọk mmọ ndiana asan̄udọk mi nnyụn̄ nnịm obubọk enyịnusụn̄ mmọ ke n̄kan̄ obubọk enyịnusụn̄ mi, ye ibibene ke ufọt mi ye mmọ.+ Ndien mmọ ẹsabade edisana enyịn̄ mi ke mme mbubiam n̄kpọ emi mmọ ẹnamde,+ tutu ami nsobo mmọ mfep ke iyatesịt mi.+  Ke emi yak mmọ ẹmen use+ mmọ ye mme okpo ndidem mmọ ẹkpọn̄ mi ẹnịm anyan ebiet,+ ndien ami nyodụn̄ ke ufọt mmọ ke nsinsi.+ 10  “Amaedi afo, O eyen owo, sian ufọk Israel ban̄a Ufọk+ oro, man mmọ ẹkpedia esuene ke ntak mme ndudue mmọ,+ ndien mmọ ẹnyene ndidomo nte enye etiede. 11  Ndien edieke mmọ ẹdiade esuene ke ntak kpukpru se mmọ ẹnamde, nam mmọ ẹfiọk, nyụn̄ da ke iso mmọ wet mbuwed isọn̄ Ufọk oro,+ ye ndutịm esie ye mme usụn̄ esie oro ẹsan̄ade ẹwọrọ ye mme usụn̄ esie oro ẹsan̄ade ẹdụk, ye kpukpru mbuwed isọn̄ esie ye kpukpru se anade ẹnam ketket, ye kpukpru mbuwed isọn̄ esie ye kpukpru mme ibet esie, man mmọ ẹkpekụt kpukpru mbuwed isọn̄ esie ye kpukpru se anade ẹnam ketket, ẹkpenyụn̄ ẹnam mmọ.+ 12  Emi edi ibet Ufọk oro. Ofụri ikpehe esie emi akande okụk ke enyọn̄ obot edi ata edisana.+ Sese! Emi edi ibet Ufọk oro. 13  “Ndien mmọ emi ẹdi mme udomo itieuwa ke cubit ke cubit,+ cubit edi cubit kiet ye ubara ekaubọk kiet.+ Ndien isọn̄ esie edi cubit kiet. Ubom onyụn̄ edi cubit kiet. Ndien mben esie odu ke enyọn̄ inua esie akanade, udomo ubọk* kiet. Ndien emi edi ukot itieuwa. 14  Ndien ọtọn̄ọde ke idak emi anade ke isọn̄ tutu esịm mben oro odude ke isọn̄ akanade edi cubit iba, ubom onyụn̄ edi cubit kiet. Ndien ọtọn̄ọde ke ekpri mben oro odude akanade tutu esịm akamba mben oro odude akanade edi cubit inan̄, ubom esie onyụn̄ edi cubit kiet. 15  Ndien otụn̄ikan̄ itieuwa edi cubit inan̄, nnụk+ inan̄ ẹnyụn̄ ẹwọrọ ke otụn̄ikan̄ itieuwa oro ẹse enyọn̄. 16  Ndien otụn̄ikan̄ itieuwa edi cubit duopeba ke uniọn̄, ubom onyụn̄ edi cubit duopeba,+ ukem ukem ke n̄kan̄ mbinan̄.+ 17  Ndien mben oro odude akanade edi cubit duopenan̄ ke uniọn̄, ye cubit duopenan̄ ke ubom, ke n̄kan̄ mbinan̄; ndien mben oro odude akanade enye edi ubak cubit, idak esie onyụn̄ edi cubit kiet akan okụk. “Ndien udịghiukot esie ese edem usiahautịn.” 18  Ndien enye ọdọhọ mi ete: “Eyen owo, ntem ke Jehovah Akakan Ọbọn̄ Andikara ọdọhọ ete, ‘Mmọ emi ẹdi mme ewụhọ itieuwa ke usen emi ẹnamde enye, man ẹwa ofụri edifọp uwa+ ke enye ẹnyụn̄ ẹsịme iyịp+ ke enyọn̄ esie.’ 19  “‘Ndien afo enyene ndida abak ayara enan̄, kpa ayara eyen enan̄, nte uwa idiọkn̄kpọ,+ nnọ mme oku emi ẹtode ubon Levi,+ emi ẹdide nditọ Zadok,+ kpa mmọ emi ẹsan̄ade ẹkpere mi,+ ndisan̄a utom nnọ mi,’ uyo Jehovah Akakan Ọbọn̄ Andikara edi emi. 20  ‘Ndien afo enyene ndida ndusụk iyịp esie nyet ke nnụk esie mbinan̄ ye ke inụk mben mbinan̄ oro ẹkande ẹkụk ye ke mben oro odude akanade, nyụn̄ nam enye asana ọbọhọ idiọkn̄kpọ+ nyụn̄ sio isop nọ enye.+ 21  Afo onyụn̄ enyene ndida abak ayara enan̄, kpa uwa idiọkn̄kpọ, ndien owo enyene ndifọp enye ke ebiet oro ẹkemekde ẹnịm ke Ufọk oro, ke an̄wa edisana ebiet.+ 22  Ndien ke ọyọhọ usen iba afo ayada mme okpo ebot, eke ẹyede idem, asan̄a ekpere nte uwa idiọkn̄kpọ; ndien mmọ ẹnyene ndinam itieuwa asana ọbọhọ idiọkn̄kpọ kpa nte mmọ ẹkedade abak ayara enan̄ ẹnam enye asana ọbọhọ idiọkn̄kpọ.’ 23  “‘Ke okụrede ndinam enye asana ọbọhọ idiọkn̄kpọ, afo ayada abak ayara enan̄, kpa ayara eyen enan̄, emi eyede idem, ye okukịm erọn̄ ke otuerọn̄, emi eyede idem, asan̄a ekpere. 24  Ndien afo enyene ndida mmọ nsan̄a n̄kpere ke iso Jehovah, mme oku ẹnyụn̄ ẹnyene ndiduọk inụn̄ ke mmọ nnyụn̄ n̄wa mmọ+ nte ofụri edifọp uwa nnọ Jehovah. 25  Afo ayawa okpo ebot kiet kpukpru usen ke usen itiaba nte uwa idiọkn̄kpọ;+ ndien mmọ ẹyewa abak ayara enan̄, kpa ayara eyen enan̄, ye okukịm erọn̄ emi ẹsiode ke otuerọn̄, kpa mbon oro ẹfọnde ẹma. 26  Mmọ ẹyesio isop+ ẹnọ itieuwa ke usen itiaba, mmọ ẹnyụn̄ ẹnyene ndinam enye asana man ẹtọn̄ọ ndida enye n̄wa uwa. 27  Ndien mmọ ẹyeda mme usen emi ẹkesịm utịt. Ndien ama ekem ọtọn̄ọde ke ọyọhọ usen itiaita+ ka iso, mme oku ẹyewa ofụri edifọp uwa mbufo ye mme uwa ebuana mbufo ke itieuwa; ndien mbufo ẹyenam mi n̄kop inemesịt,’+ uyo Jehovah Akakan Ọbọn̄ Andikara edi emi.”

Mme Ikọ Idakisọn̄

“Udomo ubọk” edi uniọn̄ emi ọtọn̄ọde ke ibuot akpan nnuenubọk esịm ibuot akpatre nnuenubọk ke ini ẹtian̄arede ofụri nnuenubọk.