Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 40;1-49

40  Ke ọyọhọ isua edịp ye ition oro nnyịn idude ke ntan̄mfep,+ ke ntọn̄ọ ntọn̄ọ isua oro, ke ọyọhọ usen duop ke ọfiọn̄, ke ọyọhọ isua duopenan̄ ke ẹma ẹkesobo obio,+ kpa ke usen emi ubọk Jehovah odoro mi ke idem,+ ntre enye ada mi edi ebiet oro.+  Enye ada mi ke n̄kukụt Abasi edi isọn̄ Israel ndien enye osụhọde mi sụn̄sụn̄ odori ke ata edikon̄ obot,+ emi n̄kpọ eke ebietde obio odorode ke enyọn̄ esie ke n̄kan̄ edem usụk.+  Ndien enye ada mi edi do, ndien, sese! owo kiet odu do. Nte enye etiede ekebiet okpoho,+ urụk flax onyụn̄ odu enye ke ubọk, ọkọrọ ye nnyanyan̄a udomon̄kpọ,+ enye onyụn̄ ada ke inuaotop.  Ndien owo oro ọdọhọ mi ete: “Eyen owo,+ da enyịn fo se, nyụn̄ da utọn̄ fo kop, nyụn̄ wụk esịt fo ke kpukpru se ami n̄wụtde fi, koro ke ntak emi ke ẹda fi ẹdi mi man ami n̄wụt fi. Sian ufọk Israel kpukpru se afo okụtde.”+  Ndien, sese! ibibene odu ke an̄wa akan ufọk oro okụk. Ndien nnyanyan̄a udomon̄kpọ emi ọniọn̄de cubit itiokiet odu owo oro ke ubọk, uniọn̄ cubit edi cubit kiet ye ubara ekaubọk kiet. Ndien enye odomo ubom ibibene, nnyanyan̄a kiet; enye onyụn̄ okon̄ nnyanyan̄a kiet.  Ekem enye edi inuaotop, emi iso esie esede n̄kan̄ edem usiahautịn,+ enye onyụn̄ asan̄a ke mme udịghiukot esie ọdọk. Ndien enye odomo asan̄udọk inuaotop,+ nnyanyan̄a kiet ke ubom, onyụn̄ odomo asan̄udọk eken, nnyanyan̄a kiet ke ubom.  Ndien ubet mbon ukpeme edi nnyanyan̄a kiet ke uniọn̄ ye nnyanyan̄a kiet ke ubom, ufan̄ oro odude ke ufọt mme ubet mbon ukpeme+ edi cubit ition; ndien asan̄udọk inuaotop emi odude ekpere etehe inuaotop ke n̄kan̄ esịt esịt edi nnyanyan̄a kiet.  Ndien enye odomo etehe inuaotop n̄kan̄ esịt esịt, nnyanyan̄a kiet.+  Ntre enye odomo etehe inuaotop, cubit itiaita; mme adaha mben esie, cubit iba; ndien etehe inuaotop okodu ke n̄kan̄ esịt esịt. 10  Ndien mme ubet mbon ukpeme ke inuaotop emi esede n̄kan̄ edem usiahautịn ẹdi ita ke n̄kan̄ emi ye ita ke n̄kan̄ eken. Mmọ mbita ẹdi ukem udomo, mme adaha mben ẹdi ukem udomo, ke n̄kan̄ emi ye ke n̄kan̄ eken. 11  Ekem enye odomo ubom enyịnusụn̄ inuaotop, cubit duop; uniọn̄ inuaotop, cubit duopeta. 12  Ndien ebiet emi ẹsịnde ọkọ ẹkanade ke iso mme ubet mbon ukpeme edi cubit kiet, ndien ebiet emi ẹsịnde ọkọ ẹkanade, emi edide cubit kiet, odu ke n̄kan̄ mbiba. Ndien ubet mbon ukpeme edi cubit itiokiet ke n̄kan̄ emi ye cubit itiokiet ke n̄kan̄ eken. 13  Ndien enye odomo inuaotop ọtọn̄ọde ke ọkọm ubet mbon ukpeme kiet tutu esịm ọkọm ubet mbon ukpeme eken, ubom edi cubit edịp ye ition;+ enyịnusụn̄ kiet asak iso ese enyịnusụn̄ eken. 14  Ekem enye anam mme adaha mben ẹdi cubit ata, tutu esịm mme adaha mben okụre ke inuaotop, akan okụk. 15  Ndien ọtọn̄ọde ke iso inuaotop emi ẹsan̄ade ẹdụk tutu esịm iso etehe inuaotop emi odude ke esịt esịt, edi cubit aba ye duop. 16  Ndien mme ubet mbon ukpeme ye mme adaha mben mmọ emi ẹkperede esịt inuaotop ẹnyene mme window emi itịm ẹtarade ke esịtufọk ẹnyụn̄ ẹkpride ke an̄wa,+ ẹkan ẹkụk, ntem ke onyụn̄ edi ye mme etehe. Ndien mme window ẹdu ke esịt ẹkan ẹkụk, mme ndise eyop+ ẹnyụn̄ ẹdu ke mme adaha mben. 17  Ndien enye ada mi sụn̄sụn̄ edi okụre an̄wa, ndien, sese! mme ubet udia+ ẹdu do, ye mbot emi ẹbotde ẹkanade okụre oro. Ubet udia edịp ye duop ẹdu ke enyọn̄ mbot oro.+ 18  Ndien mbot oro odude ke n̄kan̄ mme inuaotop edi ukem nte uniọn̄ mme inuaotop—usụk usụk mbot. 19  Ndien enye odomo ubom ọtọn̄ọde ke iso usụk usụk inuaotop tutu esịm iso okụre emi odude ke esịt esịt. Enye edi cubit ikie ke an̄wa, ke n̄kan̄ edem usiahautịn ye ke n̄kan̄ edem edere. 20  Ndien okụre an̄wa enyene inuaotop emi iso esede n̄kan̄ edem edere. Enye odomo uniọn̄ esie ye ubom esie. 21  Ndien mme ubet mbon ukpeme esie ẹdi ita ke n̄kan̄ emi ye ita ke n̄kan̄ eken. Mme adaha mben esie ye etehe esie ẹdi ukem udomo ye akpa inuaotop. Uniọn̄ esie edi cubit aba ye duop, ubom esie onyụn̄ edi cubit edịp ye ition. 22  Ndien mme window esie ye etehe esie ye mme ndise eyop+ esie ẹdi ukem udomo ye eke inuaotop emi iso esie esede edem usiahautịn. Enye onyụn̄ enyene udịghiukot itiaba emi mme owo ẹsisan̄ade ẹdọk, ndien etehe esie odu ke iso mmọ. 23  Ndien inuaotop okụre emi odude ke esịt esịt asak iso ese inuaotop edem edere; n̄ko ye enye oro odude ke n̄kan̄ edem usiahautịn. Ndien enye ọtọn̄ọ ke inuaotop odomo esịm inuaotop, cubit ikie. 24  Ndien enye ada mi sụn̄sụn̄ edi n̄kan̄ edem usụk, ndien, sese! inuaotop odu ke n̄kan̄ edem usụk,+ ndien enye odomo mme adaha mben esie ye etehe esie ukem udomo nte mmọ emi. 25  Ndien enye ye etehe esie ẹnyene mme window ẹkan ẹkụk, nte mme window mmọ emi. Uniọn̄ edi cubit aba ye duop, ubom onyụn̄ edi cubit edịp ye ition. 26  Ndien udịghiukot itiaba ẹdu oro ẹsisan̄ade ẹdọk,+ etehe esie onyụn̄ odu ke iso mmọ. Enye onyụn̄ enyene mme ndise eyop, kiet ke n̄kan̄ emi ye kiet ke n̄kan̄ eken ke mme adaha mben esie. 27  Ndien okụre emi odude ke esịt esịt enyene inuaotop emi esede n̄kan̄ edem usụk. Ndien enye ọtọn̄ọ ke inuaotop odomo esịm inuaotop ke n̄kan̄ edem usụk, cubit ikie. 28  Ndien enye ada mi sụn̄sụn̄ edi okụre oro odude ke esịt esịt, emi ekperede inuaotop edem usụk. Ndien enye odomo inuaotop edem usụk ukem udomo nte mmọ emi. 29  Ndien mme ubet mbon ukpeme esie ye mme adaha mben esie ye etehe esie ẹdi ukem udomo nte mmọ emi. Ndien enye ye etehe esie ẹnyene mme window ẹkan ẹkụk. Uniọn̄ edi cubit aba ye duop, ubom onyụn̄ edi cubit edịp ye ition.+ 30  Ndien mme etehe ẹdu ẹkan ẹkụk; uniọn̄ edi cubit edịp ye ition, ubom onyụn̄ edi cubit ition. 31  Ndien etehe esie odu ke okụre an̄wa, mme ndise eyop ẹnyụn̄ ẹdu ke mme adaha mben+ esie, ndien usụn̄ esie emi ẹsisan̄ade ẹdọk enyene udịghiukot itiaita.+ 32  Ndien enye ada mi sụn̄sụn̄ asan̄a usụn̄ edem usiahautịn edi okụre oro odude ke esịt esịt, enye onyụn̄ odomo inuaotop ukem udomo nte mmọ emi. 33  Ndien mme ubet mbon ukpeme esie ye mme adaha mben esie ye etehe esie ẹdi ukem udomo nte mmọ emi, ndien enye ye etehe esie ẹnyene mme window ẹkan ẹkụk. Uniọn̄ edi cubit aba ye duop, ubom onyụn̄ edi cubit edịp ye ition. 34  Ndien etehe esie odu ke okụre an̄wa, mme ndise eyop ẹnyụn̄ ẹdu ke mme adaha mben esie ke n̄kan̄ emi ye ke n̄kan̄ eken. Ndien usụn̄ esie emi ẹsisan̄ade ẹdọk enyene udịghiukot itiaita. 35  Ndien enye ada mi edi inuaotop edem edere,+ onyụn̄ odomo enye, ye ukem udomo nte mmọ emi,+ 36  mme ubet mbon ukpeme esie, mme adaha mben esie ye etehe esie. Enye onyụn̄ enyene mme window akan okụk. Uniọn̄ edi cubit aba ye duop, ubom onyụn̄ edi cubit edịp ye ition. 37  Ndien mme adaha mben esie ẹdu ke okụre an̄wa, mme ndise eyop ẹnyụn̄ ẹdu ke mme adaha mben esie ke n̄kan̄ emi ye ke n̄kan̄ eken.+ Ndien usụn̄ esie emi ẹsisan̄ade ẹdọk enyene udịghiukot itiaita. 38  Ndien ubet udia ye enyịnusụn̄ esie odu ekpere mme adaha mben inuaotop. Do ke ẹsidarade ofụri edifọp uwa.+ 39  Ndien ke etehe inuaotop, okpokoro iba ẹdu ke n̄kan̄ emi, okpokoro iba ẹnyụn̄ ẹdu ke n̄kan̄ eken, ndida ndori ofụri edifọp uwa+ ye uwa idiọkn̄kpọ+ ye uwa ubiomikpe+ n̄wot. 40  Ndien ke n̄kan̄ an̄wa, nte owo ọdọkde aka enyịnusụn̄ inuaotop edem edere, okpokoro iba ẹdu. Ndien ke n̄kan̄ enye eken emi odude ke etehe inuaotop, okpokoro iba ẹdu. 41  Okpokoro inan̄ ẹdu ke n̄kan̄ emi, okpokoro inan̄ ẹnyụn̄ ẹdu ke n̄kan̄ eken ke n̄kan̄ inuaotop—okpokoro itiaita, emi mmọ ẹsidoride unam ẹwot. 42  Itiat eke ẹsọide-sọi ke ẹda ẹnam okpokoro mbinan̄ oro ẹsidoride ofụri edifọp uwa. Uniọn̄ esie edi cubit kiet ye ubak, ubom onyụn̄ edi cubit kiet ye ubak, enye onyụn̄ okon̄ cubit kiet. Do ke mmọ ẹsidori n̄ko mme n̄kpọ oro mmọ ẹsidade ẹwot ofụri edifọp uwa ye uwa. 43  Ndien mme udorin̄kpọ emi ẹdide ubara ekaubọk kiet ẹdu, ẹnyụn̄ ẹsọn̄ọ ẹdian mmọ ke esịt esịt ẹkan ẹkụk; ndien mmọ ẹsidori unam uwa enọ ke mme okpokoro oro.+ 44  Ndien ke an̄wa inuaotop emi odude ke esịt esịt, mme ubet udia mme ọkwọikwọ+ ẹdu, ke okụre emi odude ke esịt esịt, ke n̄kan̄ inuaotop edem edere. Ndien iso mmọ ẹse n̄kan̄ edem usụk. Kiet odu ke n̄kan̄ inuaotop edem usiahautịn. Iso ese n̄kan̄ edem edere. 45  Ndien enye ọdọhọ mi ete: “Enye emi, kpa ubet udia emi iso esede n̄kan̄ edem usụk, enyene mme oku emi ẹsede ẹban̄a se ẹnyenede ndinam ke ufọk.+ 46  Ndien ubet udia emi iso esede n̄kan̄ edem edere enyene mme oku emi ẹsede ẹban̄a se ẹnyenede ndinam ke itieuwa.+ Mmọ ẹdi nditọ Zadok,+ emi ẹtode ke otu nditọ Levi ẹsan̄a ẹkpere Jehovah ndinam n̄kpọ nnọ enye.”+ 47  Ndien enye odomo okụre emi odude ke esịt esịt. Uniọn̄ esie edi cubit ikie, ubom onyụn̄ edi cubit ikie, ke n̄kan̄ mbinan̄. Ndien itieuwa odu ke iso ufọk. 48  Ndien enye ada mi edi etehe ufọk,+ enye onyụn̄ odomo adaha mben etehe, cubit ition ke n̄kan̄ emi ye cubit ition ke n̄kan̄ eken. Ubom inuaotop onyụn̄ edi cubit ita ke n̄kan̄ emi ye cubit ita ke n̄kan̄ eken. 49  Uniọn̄ etehe edi cubit edịp, ubom onyụn̄ edi cubit duopekiet. Ndien mmọ ẹsisan̄a udịghiukot ẹdọk enye. Ndien mme adaha ẹdu ẹkpere mme obubọk, kiet ke n̄kan̄ emi ye kiet ke n̄kan̄ eken.+

Mme Ikọ Idakisọn̄