Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 39;1-29

39  “Ndien afo, O eyen owo, tịn̄ ntịn̄nnịm ikọ ban̄a Gog,+ nyụn̄ dọhọ ete, ‘Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nnam ikọ ye afo, O Gog, afo ọbọn̄ Meshech+ ye Tubal.+  Ndien ami nyanam fi afiak edem nnyụn̄ nda fi usụn̄+ nnyụn̄ nnam fi oto ata nsannsan ikpehe edem edere+ ọdọk edi nnyụn̄ nda fi ndi mme obot Israel.  Ndien ami nyamia utịgha fo nsio fi ke ubọk ufien, nnyụn̄ nnam mme idan̄ fo ẹwọrọ fi ke ubọk nnasia ẹduọn̄ọ.  Afo ọyọduọ ke mme obot Israel,+ afo ye kpukpru mme udịmekọn̄ fo ye mbon oro ẹdidude ye afo. Nyada fi nnọ mme inuen utaokpo ye mme inuen kpukpru orụk mba ye mme unam ikọt nte udia.”’+  “‘Afo ọyọduọ ke iso isọn̄,+ koro ami ndọhọ,’ uyo Jehovah Akakan Ọbọn̄ Andikara edi emi.  “‘Ndien ami nyọdọn̄ ikan̄ akata Magog+ ye mbon oro ẹdụn̄de ke mme isuo ke ifụre;+ ndien mme owo ẹyefiọk ẹte ke ami ndi Jehovah.  Ndien ami nyanam ẹfiọk edisana enyịn̄ mi ke ufọt ikọt mi Israel, ndinyụn̄ nyakke ẹsabade+ aba enyịn̄ mi; ndien mme idụt ẹyefiọk ẹte ke ami ndi Jehovah,+ kpa Edisana Abasi ke Israel.’+  “‘Sese! Enye eyedi, ẹyenyụn̄ ẹnam enye osu,’+ uyo Jehovah Akakan Ọbọn̄ Andikara edi emi. ‘Emi edi usen oro n̄kọdọhọde.+  Ndien mme andidụn̄ mme obio Israel ẹyewọrọ ẹka ẹkefọp ẹnyụn̄ ẹda mme n̄kpọekọn̄ ye n̄kpri otuekọn̄ ye ikpọ otuekọn̄ ẹbara ikan̄,—ọkọrọ ye utịgha ye idan̄ ye usam ye eduat; mmọ ẹyenyụn̄ ẹda mmọ ẹbara ikan̄+ ke isua itiaba. 10  Mmọ iditan̄ke eto ke ikọt idi, idinyụn̄ itan̄ke ifia ke mme akai, koro mmọ ẹdidade mme n̄kpọekọn̄ ẹbara ikan̄.’ “‘Mmọ ẹyenyụn̄ ẹbụme mbon oro ẹkebụmede mmọ,+ ẹnyụn̄ ẹwo mbon oro ẹkewode mmọ,’ uyo Jehovah Akakan Ọbọn̄ Andikara edi emi. 11  “‘Ndien ama ekem ke usen oro, ami nyọnọ Gog+ itie do, itie ubụkowo ke Israel, kpa itịghede mbon oro ẹsan̄ade ẹbe emi odude ke n̄kan̄ edem usiahautịn inyan̄, ndien enye ọyọbiọn̄ọ mbon oro ẹsan̄ade ẹbe. Ndien do ke mmọ ẹdibụk Gog ye ofụri otuowo esie, ndien mmọ ẹdikot itie oro Itịghede Otuowo Gog.+ 12  Ndien mbon ufọk Israel ẹyebụk mmọ ke ọfiọn̄ itiaba, man ẹnam isọn̄ asana.+ 13  Ndien kpukpru mbio obio ẹdibụk mmọ, emi oyonyụn̄ akabade edi n̄kpọ etop ọnọ mmọ ke usen oro nnọde idemmi ubọn̄,’+ uyo Jehovah Akakan Ọbọn̄ Andikara edi emi. 14  “‘Ndien mme owo ẹyedu emi mmọ ẹdibaharede ẹnịm man ẹnam utom kpukpru ini, mmọ ẹyesan̄a ke isọn̄ ẹbe, ẹdiana ye mbon oro ẹsan̄ade ẹbe, ẹbụk mbon oro ẹsụhọde ke iso isọn̄, man ẹnam isọn̄ asana. Mmọ ẹyesan̄a ẹyom tutu esịm utịt ọfiọn̄ itiaba. 15  Ndien mbon oro ẹsan̄ade ẹbe ẹnyene ndisan̄a mbe ke isọn̄, ndien edieke owo okụtde ọkpọ owo, enye ẹyenịm idiọn̄ọ ekpere enye, tutu mbon oro ẹnamde utom edibụk ẹdimen enye ẹkebụk ke Itịghede Otuowo Gog.+ 16  Ndien obio oro edikere n̄ko Hamonah. Ndien mmọ ẹyenam isọn̄ oro asana.’+ 17  “Ndien afo O eyen owo, ntem ke Jehovah Akakan Ọbọn̄ Andikara ọdọhọ ete, ‘Dọhọ inuen kpukpru orụk mba ye kpukpru unam ikọt ete:+ “Mbufo ẹsop idem ọtọkiet ẹnyụn̄ ẹdi. Ẹsop idem ọtọkiet ẹkanade uwa mi, emi n̄wade nnọ mbufo, kpa akamba uwa ke mme obot Israel.+ Ndien mbufo ẹyeta obụk ẹnyụn̄ ẹn̄wọn̄ iyịp.+ 18  Mbufo ẹyeta obụk n̄kpọsọn̄ owo,+ ẹnyụn̄ ẹn̄wọn̄ iyịp mbọn̄ isọn̄, mme okukịm erọn̄ ye mme abak nyara erọn̄+ ye mme okpo ebot ye mme abak nyara enan̄+ ye mme unam Bashan emi ẹnyenede isek kpukpru mmọ.+ 19  Ndien mbufo ẹyeta ikpọn̄ uwa ẹyụhọ+ ẹnyụn̄ ẹn̄wọn̄ iyịp uwa emi ami ndiwade nnọ mbufo, ẹyụhọ.”’ 20  “‘Ndien mbufo ẹyeta enan̄-mbakara ye mme awat chariot, n̄kpọsọn̄ owo ye kpukpru orụk mbonekọn̄, ke okpokoro mi ẹyụhọ,’ uyo Jehovah Akakan Ọbọn̄ Andikara edi emi.+ 21  “‘Ndien ami nyenịm ubọn̄ mi ke otu mme idụt; kpukpru mme idụt ẹyenyụn̄ ẹkụt ubiereikpe mi emi mbierede+ ye ubọk mi emi ndoride mmọ.+ 22  Ndien mbon ufọk Israel ẹyefiọk ẹte ke ami ndi Jehovah Abasi mmọ toto ke usen oro ka iso.+ 23  Ndien mme idụt ẹyefiọk ẹte ke ntak ndudue mmọ ke mmọ, kpa ufọk Israel, ẹkeka ntan̄mfep,+ ke ntak emi mmọ mîkanamke akpanikọ inọ mi, tutu ami ndịp mmọ+ iso mi nnyụn̄ nyak mmọ nsịn mme asua mmọ ke ubọk, ndien kpukpru mmọ ẹduọn̄ọ ke akan̄kan̄.+ 24  Koro n̄kanamde ye mmọ nte ekemde ye ndek mmọ ye mme ubiatibet mmọ,+ ndien ndịp mmọ iso mi.’ 25  “Mmọdo ntem ke Jehovah Akakan Ọbọn̄ Andikara ọdọhọ ete, ‘Ini edi emi ami ndida nditọ Jacob+ oro ẹkemụmde nte mbuotekọn̄ mfiak ndi nnyụn̄ ntua ofụri ufọk Israel mbọm;+ ndien ami nyefịbe ufụp mban̄a edisana enyịn̄ mi.+ 26  Ndien mmọ ẹyebiom esuene+ mmọ ye kpukpru unana edinam akpanikọ mmọ emi mmọ ẹnamde ye ami,+ ke ini mmọ ẹdụn̄de ke isọn̄ mmọ ke ifụre,+ owo idinamke mmọ ẹdịghe.+ 27  Ke ini ndade mmọ ke otu mme owo mfiak ndi nnyụn̄ ntan̄de mmọ ke otu mme idụt mme asua mmọ mbon ọtọkiet,+ ami n̄ko nyanam idemmi asana ke otu mmọ ke iso ediwak mme idụt.’+ 28  “‘Ndien mmọ ẹyefiọk ẹte ke ami ndi Jehovah Abasi mmọ, ke ini ndọn̄de mmọ ẹka ntan̄mfep ke otu mme idụt nnyụn̄ mfiakde ntan̄ mmọ mbon ọtọkiet ke isọn̄ mmọ,+ mbak nditọn̄ọ aba ntak nyak baba mmọ kiet ẹsụhọ do.+ 29  Ndien ami ndidịpke mmọ iso mi aba,+ koro nyan̄wan̄a spirit mi nduọk ufọk Israel ke idem,’+ uyo Jehovah Akakan Ọbọn̄ Andikara edi emi.”

Mme Ikọ Idakisọn̄