Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Ezekiel 37;1-28

37  Ubọk Jehovah odoro mi ke idem,+ ntre enye ada mi ke spirit Jehovah+ ọwọrọ onyụn̄ osụhọde mi esịn ke ufọt unaisọn̄ itịghede, mme ọkpọ ẹnyụn̄ ẹyọhọ ke esịt.+  Ndien enye anam mi nsan̄a mbe mmọ n̄kanade, ndien, sese! ata ediwak mmọ ẹdu ke unaisọn̄ itịghede ndien, sese! mmọ ẹsat etieti.+  Ndien enye obụp mi ete: “Eyen owo, nte mme ọkpọ emi ẹkeme ndifiak ndu uwem?” Ntem ami mbọrọ nte: “Jehovah Akakan Ọbọn̄ Andikara, afo emetịm ọfiọk.”+  Ndien enye ọdọhọ mi ete: “Tịn̄ ntịn̄nnịm ikọ ban̄a mme ọkpọ emi, nyụn̄ dọhọ mmọ ete, ‘O mbufo mme nsat ọkpọ, ẹkop uyo Jehovah:  “‘Ntem ke Jehovah Akakan Ọbọn̄ Andikara ọdọhọ mme ọkpọ emi ete: “Sese ami mmọn̄ nsịn mbufo ibifịk ke idem, ndien mbufo ẹyefiak ẹdidu uwem.+  Ndien ami nyesịn mbufo mme esịp nnyụn̄ nnam obụk ọkọri mbufo ke idem, nyonyụn̄ mfọri mbufo ikpa ke idem nnyụn̄ nsịn mbufo ibifịk ke idem, ndien mbufo ẹyefiak ẹdidu uwem;+ ndien mbufo ẹyefiọk ẹte ke ami ndi Jehovah.”’”+  Ndien ami ntịn̄ ntịn̄nnịm ikọ kpa nte ẹkewụkde mi.+ Ndien uyom ọtọn̄ọ ke ndondo oro ntịn̄de ntịn̄nnịm ikọ, ndien sese n̄kop uyom emi mme ọkpọ ẹtuahade ye ọkpọ, mme ọkpọ ẹnyụn̄ ẹtọn̄ọ ndisan̄a n̄kpere, ọkpọ adiana ye ọkpọ.  Ndien ami n̄kụt, ndien, sese! ẹsịn mmọ esịp, obụk onyụn̄ ọkọri ẹnyụn̄ ẹfọri mmọ ikpa ke idem. Edi ibifịk idụhe mmọ ke idem.  Ndien enye ọdọhọ mi ete: “Tịn̄ ntịn̄nnịm ikọ nọ ofụm. O eyen owo, tịn̄ ntịn̄nnịm ikọ, nyụn̄ dọhọ ofụm ete, ‘Ntem ke Jehovah Akakan Ọbọn̄ Andikara ọdọhọ ete: “O ofụm, to ke ikpehe ofụm mbinan̄ di, nyụn̄ difụme ke idem mbon oro ẹkewotde,+ man mmọ ẹkpefiak ẹdu uwem.”’”+ 10  Ndien ami ntịn̄ ntịn̄nnịm ikọ kpa nte enye okowụkde mi, ibifịk onyụn̄ edi edidụk mmọ ke idem, ndien mmọ ẹtọn̄ọ ndidu uwem ẹnyụn̄ ẹdaha ẹda ke ikpat mmọ,+ ata akwa udịmekọn̄. 11  Ndien enye ọdọhọ mi ete: “Eyen owo, amaedi mme ọkpọ emi, mmọ ẹdi ofụri ufọk Israel.+ Sese mmọ ke ẹdọhọ ẹte, ‘Mme ọkpọ nnyịn ẹmesat, idotenyịn nnyịn omonyụn̄ atak.+ Ẹmenyụn̄ ẹsịbe nnyịn ẹfep ofụri ofụri.’ 12  Mmọdo tịn̄ ntịn̄nnịm ikọ, nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ n̄kụbọde mme udi mbufo,+ nyonyụn̄ nsion̄o mbufo ke mme udi mbufo, O ikọt mi, nyonyụn̄ nda mbufo ndi isọn̄ Israel.+ 13  Ndien mbufo ẹyefiọk ẹte ke ami ndi Jehovah ke ini n̄kụbọrede mme udi mbufo ye ke ini nsion̄ode mbufo ke mme udi mbufo, O ikọt mi.”’+ 14  ‘Ndien ami nyesịn mbufo spirit mi ke idem, mbufo ẹyenyụn̄ ẹfiak ẹdidu uwem,+ ami nyonyụn̄ nnam mbufo ẹdidụn̄ ke isọn̄ mbufo; ndien mbufo ẹyefiọk ẹte ke ami, Jehovah, ndọhọ nnyụn̄ nnam,’ uyo Jehovah edi emi.”+ 15  Ndien uyo Jehovah ọtọn̄ọ ntak esịm mi, ete: 16  “Ndien afo, O eyen owo, da eto+ nyụn̄ wet ke enye ete, ‘Eke Judah ye eke nditọ Israel mme nsan̄a esie.’+ Ndien da eto en̄wen nyụn̄ wet ke enye ete, ‘Eke Joseph, eto Ephraim,+ ye ofụri ufọk Israel mme nsan̄a esie.’+ 17  Ndien da mmọ dian kiet man ẹkabade ẹdi eto kiet, ndien mmọ ẹyekabade ẹdi eto kiet ke ubọk fo.+ 18  Ndien ke ini nditọ orụk fo ẹbụpde fi ẹte, ‘Nte afo udusianke nnyịn se mme n̄kpọ emi ẹwọrọde ẹnọ fi?’+ 19  bọrọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nda eto Joseph, emi odude ke ubọk Ephraim, ye mme esien Israel mme nsan̄a esie, nyonyụn̄ nda mmọ ndori ke enye, oro edi, ke eto Judah, nyonyụn̄ nnam mmọ ẹdi eto kiet,+ ndien mmọ ẹyekabade ẹdi eto kiet ke ubọk mi.”’ 20  Ndien mme eto emi afo ewetde n̄kpọ ẹnyene ndidu fi ke ubọk ke iso mmọ.+ 21  “Ndien dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nsion̄o nditọ Israel ke otu mme idụt emi mmọ ẹkade, nyonyụn̄ ntan̄ mmọ ke kpukpru edem mbon ọtọkiet nnyụn̄ nda mmọ ndi isọn̄ mmọ.+ 22  Ndien nyanam mmọ ẹdi idụt kiet ke isọn̄,+ ke mme obot Israel, ndien edidem kiet eyedi edidem ọnọ kpukpru mmọ,+ mmọ idinyụn̄ ikaha aba iso idi idụt iba, owo idinyụn̄ ibahakede aba mmọ idọn̄ ke obio ubọn̄ iba.+ 23  Ndien mmọ ididaha aba mme mbubiam mbiet mmọ ye mme mbubiam n̄kpọ mmọ ye kpukpru ubiatibet mmọ isabade idemmọ;+ ndien ami nyanyan̄a mmọ nsio ke kpukpru mme ebietidụn̄ mmọ emi mmọ ẹnamde idiọkn̄kpọ, nyonyụn̄ nnam mmọ ẹsana,+ ndien mmọ ẹyedi ikọt mi, ami nyonyụn̄ ndi Abasi mmọ.+ 24  “‘“Ndien David asan̄autom mi eyedi edidem mmọ,+ kpukpru mmọ ẹyenyụn̄ ẹnyene ekpemerọn̄ kiet;+ ndien mmọ ẹyesan̄a ke mme ubiereikpe mi,+ ẹnyụn̄ ẹnịm mme ewụhọ mi,+ ẹnyụn̄ ẹnam mmọ.+ 25  Ndien mmọ ẹyedụn̄ ke isọn̄ oro n̄kọnọde Jacob asan̄autom mi, emi mme ete ete mbufo ẹkedụn̄de,+ mmọ ẹyenyụn̄ ẹdụn̄ ke esịt,+ mmọ ye nditọ mmọ ye nditọ nditọ mmọ, ke nsinsi,+ ndien David asan̄autom mi edidi ọbọn̄ mmọ ke nsinsi.+ 26  “‘“Ndien nyodiomi ediomi emem+ ye mmọ; ediomi oro ebịghide ke nsinsi oyodu ye mmọ.+ Ndien ami nyọnọ mmọ itie nnyụn̄ nnam mmọ+ ẹwak nnyụn̄ n̄wụk temple mi ke ufọt mmọ ke nsinsi.+ 27  Ndien tent mi oyofụk mmọ,+ ndien ami nyedi Abasi mmọ, mmọ ẹyenyụn̄ ẹdi ikọt mi.+ 28  Ndien mme idụt ẹyefiọk ẹte ke ami, Jehovah,+ nnam Israel ẹsana ke ini temple mi edide edidu ke ufọt mmọ ke nsinsi.”’”+

Mme Ikọ Idakisọn̄