Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Ezekiel 34;1-31

34  Ndien uyo Jehovah ọtọn̄ọ ntak esịm mi, ete:  “Eyen owo, tịn̄ ntịn̄nnịm ikọ ban̄a mme ekpemerọn̄ Israel. Tịn̄ ntịn̄nnịm ikọ, nyụn̄ dọhọ mmọ, mme ekpemerọn̄, ete, ‘Ntem ke Jehovah Akakan Ọbọn̄ Andikara ọdọhọ ete: “Mbọm mme ekpemerọn̄ Israel,+ emi ẹkabarede ẹbọk idemmọ!+ Nte idịghe mme erọn̄ ke mme ekpemerọn̄ ẹkpebọk?+  Mbufo ẹmeta ikpọn̄,+ ẹmenyụn̄ ẹsịne idet erọn̄ ke idem. Mbufo ẹmewot+ ufene eke esehede.+ Mbufo inyụn̄ ibọkke mme erọn̄.  Mbufo isọn̄ọke mbon oro idem ememde,+ inyụn̄ ikọkke mbon oro ẹdọn̄ọde, inyụn̄ ibọpke mbon oro ẹbụn̄ọde, inyụn̄ idaha mbon oro ẹkebịnde ẹfep ifiak idi, inyụn̄ iyomke mbon oro ẹkesopde,+ edi mbufo ẹda nsọn̄ido ye ufịk ẹkara mmọ.+  Ndien sụn̄sụn̄ mmọ ẹsuana sia baba ekpemerọn̄ kiet mîdụhe,+ tutu mmọ ẹkabade ẹdi udia kpukpru unam ikọt, mmọ ẹnyụn̄ ẹsuana.+  Mme erọn̄ mi ẹyo ke kpukpru ikpọ obot ye ke kpukpru mme edikon̄ obot;+ mme erọn̄+ mi ẹnyụn̄ ẹsuana ke ofụri iso isọn̄, idụhe baba owo kiet eke oyomde mmọ inyụn̄ idụhe baba owo kiet eke oyomde mmọ okụt.  “‘“Mmọdo, mbufo mme ekpemerọn̄, ẹkop uyo Jehovah,  ‘“Ma uwem mi,” uyo Jehovah Akakan Ọbọn̄ Andikara edi emi, “ke ntak oro mme erọn̄ mi ẹkabarede ẹdi n̄kpọ mbụme, mme erọn̄ mi ẹnyụn̄ ẹdide udia kpukpru unam ikọt, sia baba ekpemerọn̄ kiet mîdụhe, mme ekpemerọn̄ mi mînyụn̄ iyomke mme erọn̄ mi, edi mme ekpemerọn̄ mi ẹbọkde idemmọ,+ mmọ mînyụn̄ ibọkke mme erọn̄ mi,”’  mmọdo, mbufo mme ekpemerọn̄, ẹkop uyo Jehovah. 10  Ntem ke Jehovah Akakan Ọbọn̄ Andikara ọdọhọ ete, ‘Sese ami mmọtọhọ ye mme ekpemerọn̄,+ nyonyụn̄ mbụp mme erọn̄ mi ke ubọk mmọ nnyụn̄ nnam mmọ ẹtre ndibọk mme erọn̄ mi,+ ndien mme ekpemerọn̄ idibọkke aba idemmọ;+ ami nyonyụn̄ nnyan̄a mme erọn̄ mi nsio ke inua mmọ, ndien mmọ ididịghe aba udia mmọ.’”+ 11  “‘Koro ntem ke Jehovah Akakan Ọbọn̄ Andikara ọdọhọ ete: “Se mi mi, ami nyoyom mme erọn̄ mi nnyụn̄ nse mban̄a mmọ.+ 12  Kpa nte owo emi ọbọkde ufene+ esie esede aban̄a mmọ ke usen emi enye odude ke ufọt mme erọn̄ esie emi ẹsuande,+ kpa ntre ke ami ndise mban̄a mme erọn̄ mi; ndien ami nyanyan̄a mmọ nsio ke kpukpru ebiet emi ẹkesuande mmọ ẹdọn̄ ke usen obubịt enyọn̄ ye ọkpọsọn̄ ekịm.+ 13  Ndien ami nyosion̄o+ mmọ ke otu mme owo nnyụn̄ ntan̄ mmọ ke mme idụt mbon ọtọkiet nnyụn̄ nda mmọ ndi isọn̄+ mmọ nnyụn̄ mbọk mmọ ke mme obot Israel, ke mben idịm ye ke kpukpru mme ebietidụn̄ isọn̄.+ 14  Nyada eti mbiet mbọk mmọ, ndien ebietidụn̄ mmọ eyedidu ke mme edikon̄ obot Israel.+ Mmọ ẹyesụhọde ẹna do ke eti ebietidụn̄,+ mmọ ẹyenyụn̄ ẹta mbiet eke esehede ke mme enyọn̄ obot Israel.” 15  “‘“Ami nyọbọk mme erọn̄ mi,+ nyonyụn̄ nnam mmọ ẹsụhọde ẹna,”+ uyo Jehovah Akakan Ọbọn̄ Andikara edi emi. 16  “Nyoyom enye emi okosopde,+ nnyụn̄ nda enye emi ẹkebịnde ẹfep mfiak ndi, nyọbọp enye emi obụn̄ọde nnyụn̄ nsọn̄ọ enye emi ọdọn̄ọde idem, edi nyosobo enye emi okponde ubom+ ye enye emi ọsọn̄de idem. Nyada ubiereikpe mbọk enye.”+ 17  “‘Ndien amaedi mbufo mme erọn̄ mi, ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ n̄kpe ikpe ke ufọt erọn̄ ye erọn̄, ye ke ufọt mme okukịm erọn̄ ye mme okpo ebot.+ 18  Nte edi ekpri n̄kpọ mbufo ndita+ mfọnn̄kan mbiet edi ẹda ikpat mbufo ẹdịghi mbiet mbufo eke ẹsụhọde, ndinyụn̄ n̄n̄wọn̄ edisana mmọn̄ edi ẹdehe se isụhọde ke ndida ikpat mbufo mbiohode mmọ? 19  Ndien nte mme erọn̄ mi ẹkpenyene ndita mbiet ke in̄wan̄ mbiet emi mbufo ẹdịghide ke ikpat mbufo nnyụn̄ n̄n̄wọn̄ mmọn̄ eke mbufo ẹdade ikpat mbufo ẹbiohode ẹnam edehe?” 20  “‘Mmọdo ntem ke Jehovah Akakan Ọbọn̄ Andikara ọdọhọ mmọ ete: “Se mi mi, ami nyonyụn̄ n̄kpe ikpe ke ufọt erọn̄ eke esehede ye ke ufọt erọn̄ eke ọdiọkde idem, 21  ke ntak oro mbufo ẹdade n̄kan̄ ye afara mbufo ẹnụk ẹnyụn̄ ẹdade mme nnụk mbufo ẹberi kpukpru mbon oro idem ememde tutu mbufo ẹsuan mmọ ke an̄wa.+ 22  Ndien ami nyanyan̄a mme erọn̄ mi, mmọ idinyụn̄ idịghe aba n̄kpọ mbụme;+ ndien ami nyekpe ikpe ke ufọt erọn̄ ye erọn̄. 23  Ndien ami nyanam ekpemerọn̄+ kiet adaha ada ọnọ mmọ, enye oyonyụn̄ ọbọk mmọ, ih, David asan̄autom mi.+ Enye ọyọbọk mmọ, enye oyonyụn̄ akabade edi andikpeme mmọ.+ 24  Ndien ami Jehovah nyedi Abasi mmọ,+ David asan̄autom mi oyonyụn̄ edi ọbọn̄ ke ufọt mmọ.+ Ami, Jehovah, ndọhọ. 25  “‘“Ndien ami nyodiomi ediomi emem+ ye mmọ, nyonyụn̄ nnam idiọk unam ikọt etre ndidu ke isọn̄,+ ndien mmọ ẹyedụn̄ ke wilderness ke ifụre ẹnyụn̄ ẹde idap ke akai.+ 26  Ndien ami nyanam mmọ ye n̄kann̄kụk obot mi ẹdi edidiọn̄,+ nyonyụn̄ nnam edịm edep ke ini esie. Edịm edidiọn̄ eyedep.+ 27  Ndien eto in̄wan̄ ọyọnọ mfri esie,+ isọn̄ oyonyụn̄ ọnọ mbun̄wụm+ esie, ndien mmọ ẹyedu ke isọn̄ mmọ ke ifụre.+ Ndien mmọ ẹyefiọk ẹte ke ami ndi Jehovah ke ini mbụn̄de mme eto ọkpọnọ+ mmọ nnyụn̄ nnyan̄ade mmọ nsio ke ubọk mbon oro ẹkekamade mmọ nte ifịn.+ 28  Ndien mmọ ididịghe aba n̄kpọ eke mme idụt ẹbụmede;+ ndien unam ikọt iditaha mmọ, mmọ ẹyenyụn̄ ẹdụn̄ ke ifụre, ididụhe owo eke edinamde mmọ ẹdịghe.+ 29  “‘“Ndien ami nyọtọ in̄wan̄ eke enyenede enyịn̄ nnọ mmọ,+ ndien mmọ ididịghe aba mbon oro akan̄ emende efep ke isọn̄,+ mmọ idinyụn̄ ibiomke aba esuene mme idụt.+ 30  ‘Ndien mmọ ẹyefiọk ẹte, ke ami, Jehovah Abasi mmọ, ndu ye mmọ+ ye nte ke mmọ ẹdi ikọt mi, kpa ufọk Israel,’ uyo Jehovah Akakan Ọbọn̄ Andikara edi emi.”’+ 31  “‘Ndien amaedi mbufo mme erọn̄ mi,+ mme erọn̄ emi ami mbọkde, mbufo ẹdi mme owo. Ami ndi Abasi mbufo,’ uyo Jehovah Akakan Ọbọn̄ Andikara edi emi.”

Mme Ikọ Idakisọn̄