Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 33;1-33

33  Ndien uyo Jehovah esịm mi, ete:  “Eyen owo, tịn̄ nọ nditọ orụk fo,+ nyụn̄ dọhọ mmọ ete, “‘Edieke ndade akan̄kan̄+ ntiene obio ndien mbio obio oro, ye esịt kiet, ẹda owo kiet ẹnịm nte owo ukpeme+ mmọ,  ndien enye okụt akan̄kan̄ edide etiene obio oro ndien enye efri nnụk onyụn̄ ọtọt mme owo,+  ndien andikop okop uyom nnụk oro edi inamke baba n̄kpọ kiet iban̄a ntọt oro,+ ndien akan̄kan̄ edi edimen enye efep, iyịp esie oyodoro enye ke ibuot.+  Enye ama okop uyom nnụk oro, edi inamke n̄kpọ iban̄a ntọt oro. Iyịp esie ọyọkọbọ enye. Ndien edieke enye akpakanamde ntọt oro, ukpọn̄ esie ọkpọkọbọhọ.+  “‘Ndien amaedi owo ukpeme oro, edieke enye okụtde akan̄kan̄ edide ndien enye ifrike nnụk,+ mme owo inyụn̄ ibọhọ baba ntọt kiet ndien akan̄kan̄ edi edimen ukpọn̄ efep ke otu mmọ, koro ẹyemen enye ẹfep ke ntak ndudue esie,+ edi nyobụp iyịp esie ke ubọk owo ukpeme oro.’+  “Ndien afo, O eyen owo, mmenịm fi ke owo ukpeme nnọ ufọk Israel,+ afo nyụn̄ kop ikọ eke otode mi inua nyụn̄ dụri mmọ utọn̄ nọ mi.+  Ke ini ndọhọde idiọkowo nte, ‘O idiọkowo, afo udutreke ndikpa!’+ edi afo mûtịn̄ke man odụri idiọkowo oro utọn̄ ete enye ọkpọn̄ usụn̄ esie,+ nte idiọkowo, enye ayakpa ke ndudue esie,+ edi nyobụp iyịp esie ke ubọk fo.  Edi amaedi afo, edieke afo odụride idiọkowo utọn̄ ete enye ọkpọn̄ usụn̄ esie man enye ọwọn̄ọde ọkpọn̄ enye edi enye iwọn̄ọkede ikpọn̄ usụn̄ esie, enye ayakpa ke ndudue esie,+ edi afo ayanyan̄a ukpọn̄ fo.+ 10  “Ndien afo, O eyen owo, dọhọ ufọk Israel ete, ‘Ntem ke mbufo ẹdọhọ ẹte: “Sia nsọn̄ibuot nnyịn ye mme idiọkn̄kpọ nnyịn ẹdorode nnyịn ke idem, mmọ ẹnyụn̄ ẹnam nnyịn iyemede,+ didie ndien ke nnyịn ididu uwem?”’+ 11  Dọhọ mmọ ete, ‘“Ma uwem mi,” uyo Jehovah Akakan Ọbọn̄ Andikara edi emi, “Ami ndatke esịt ke n̄kpa idiọkowo,+ edi ndat esịt ke idiọkowo ndiwọn̄ọde+ n̄kpọn̄ usụn̄ esie nnyụn̄ ndu uwem.+ Mbufo ẹfiak edem, ẹfiak edem ẹkpọn̄ mme idiọk usụn̄ mbufo,+ koro ntak emi mbufo ẹkpekpan̄ade, O ufọk Israel?”’+ 12  “Ndien afo, O eyen owo, dọhọ nditọ orụk fo ete, ‘Edinen ido edinen owo idinyan̄ake enye ke usen nsọn̄ibuot esie.+ Edi amaedi idiọkido idiọkowo, owo idinamke enye atuak ukot ke enye ọduọ ke usen eke enye ọwọn̄ọrede ọkpọn̄ idiọkido esie.+ Edinen ido owo ekededi idinyụn̄ ikemeke ndinam enye odu uwem ke usen eke enye anamde idiọk.+ 13  Ke ini ndọhọde edinen owo nte: “Afo udutreke ndidu uwem,” ndien enye ọbuọt idem ke edinen ido esie onyụn̄ anam se ikwan̄ade,+ owo iditịghi kpukpru ndinen edinam esie, edi enye ayakpa ke ntak emi enye anamde se ikwan̄ade.+ 14  “‘Ndien ke ini ndọhọde idiọkowo nte: “Afo udutreke ndikpa,”+ ndien enye ọwọn̄ọde ọkpọn̄ idiọkn̄kpọ+ esie onyụn̄ anam unenikpe ye edinen ido,+ 15  ndien idiọkowo oro afiak ayak se enye ọkọbọde ke ubiọn̄ ọnọ,+ ayak mme n̄kpọ emi enye ọkọbọde ke n̄wo ọnọ,+ onyụn̄ asan̄a ke mme ewụhọ uwem ke nditre ndinam se ikwan̄ade,+ enye iditreke ndidu uwem.+ Enye idikpaha. 16  Owo iditịghi baba idiọkn̄kpọ esie kiet emi enye akanamde.+ Enye amanam unenikpe ye edinen ido. Enye iditreke ndidu uwem.’+ 17  “Ndien nditọ orụk fo ẹdọhọ ẹte, ‘Owo inen̄ekede usụn̄ Jehovah enen,’+ edi, akam edi usụn̄ mmọ ke owo mînen̄ekede enen. 18  “Ke ini edinen owo ọwọn̄ọrede ọkpọn̄ edinen ido esie onyụn̄ anamde se ikwan̄ade, enye enyene ndikpa n̄ko ke ntak mmọ.+ 19  Ndien ke ini idiọkowo ọwọn̄ọrede ọkpọn̄ idiọkido esie onyụn̄ anamde unenikpe ye edinen ido, edidi ke ntak mmọ ke enye edidu uwem.+ 20  “Ndien mbufo ẹdọhọ ẹte, ‘Owo inen̄ekede usụn̄ Jehovah enen.’+ O ufọk Israel, ami nyekpe ikpe nnọ owo mbufo kiet kiet,+ nte ekemde ye mme usụn̄ esie.” 21  Edikem ke ọyọhọ isua duopeba, ke ọyọhọ ọfiọn̄ duop, ke ọyọhọ usen ition ke ọfiọn̄ oro nnyịn idude ke ntan̄mfep, owo kiet emi otode Jerusalem efehe ọbọhọ,+ edi ebịne mi edidọhọ, ete: “Ẹmesobo obio!”+ 22  Ndien ubọk Jehovah odoro mi ke idem ke mbubreyo mbemiso owo oro ekefehede ọbọhọ edide,+ Enye onyụn̄ atat mi inua mbemiso owo oro edide ebịne mi ke usenubọk, inua mi onyụn̄ atara, ami nnyụn̄ ndịghe aba imụm.+ 23  Ndien uyo Jehovah esịm mi, ete: 24  “Eyen owo, mme andidụn̄ ke mme n̄wụre ebiet+ emi ẹdọhọ ẹban̄a isọn̄ Israel ẹte, ‘Abraham ekedi ikpọn̄ ndien kpa ye oro enye ama ada isọn̄ oro enyene.+ Ndien nnyịn imawak; ẹmenọ nnyịn isọn̄ oro ndida nnyene.’+ 25  “Mmọdo dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Mbufo ke ẹta unam ye iyịp,+ ke ẹnyụn̄ ẹmenede enyịn mbufo ẹse mme mbubiam mbiet+ mbufo, ẹnyụn̄ ẹduọk iyịp.+ Ntre nte mbufo ẹkpeda isọn̄ oro ẹnyene?+ 26  Mbufo ẹberi edem ke akan̄kan̄ mbufo.+ Mbufo ẹmenam mbubiam n̄kpọ,+ owo mbufo kiet kiet omonyụn̄ asabade n̄wan nsan̄a esie.+ Ntre nte mbufo ẹkpeda isọn̄ oro ẹnyene?”’+ 27  “Ntem ke afo edidọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Ma uwem mi, mbon emi ẹdude ke mme n̄wụre ebiet iditreke ndiduọn̄ọ ke akan̄kan̄;+ ndien nyada enye emi odude ke iso isọn̄ nnọ idiọk unam nte udia;+ ndien mbon oro ẹdude ke n̄kpọsọn̄ ebiet ye ke mme abaitiat+ ẹyekpan̄a ke idiọk udọn̄ọ. 28  Ndien ami nyanam isọn̄ edi ndon,+ ye n̄wụre ebiet, ndien ẹyenam ntan̄idem odudu esie etre,+ ẹyenyụn̄ ẹsobo mme obot Israel,+ baba owo kiet idinyụn̄ isan̄ake ibe. 29  Ndien mmọ ẹyefiọk ẹte ke ami ndi Jehovah ke ini nnamde isọn̄ oro edi ndon,+ ye n̄wụre, ke ntak kpukpru mbubiam n̄kpọ oro mmọ ẹnamde.”’+ 30  “Ndien afo, O eyen owo, nditọ orụk fo ke ẹda ẹkpere mme ibibene ke ẹnyụn̄ ẹda ke mme inuaotop ufọk ẹneme ye kiet eken ẹban̄a fi,+ ndien kiet eneme ye kiet, owo kiet kiet ye eyenete esie, ete, ‘Mbọk, mbufo ẹdi, ẹdikop se ikọ eke ọwọrọde Jehovah ke inua edide.’+ 31  Ndien mmọ ẹyedụk ẹdi ẹbịne fi, nte emi mme owo ẹsidụkde ẹdi, ẹdisụhọde ẹtie fi ke iso nte ikọt mi;+ mmọ ẹyenyụn̄ ẹkop ikọ fo edi idinamke mmọ,+ koro mmọ ẹdade inua mmọ ẹtịn̄ ikọ ndiọi udọn̄, esịt mmọ onyụn̄ ebịnede idiọk udori mmọ.+ 32  Ndien, sese! afo etie mmọ nte ikwọ ima, nte owo eke enyenede edinem uyo, onyụn̄ etịmde ebre ndido urụk.+ Ndien mmọ ẹyekop mme ikọ fo, edi baba owo kiet idinamke mmọ.+ 33  Ndien ke ini enye edisude—sese! enye enyene ndisu+—mmọ ẹyefiọk n̄ko ẹte ke prọfet ama odu ke otu mmimọ.”+

Mme Ikọ Idakisọn̄