Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 29;1-21

29  Ke ọyọhọ isua duop, ke ọyọhọ ọfiọn̄ duop, ke ọyọhọ usen duopeba ke ọfiọn̄ oro, uyo Jehovah esịm mi, ete:  “Eyen owo, wụk iso fo se Pharaoh edidem Egypt+ nyụn̄ tịn̄ ntịn̄nnịm ikọ ban̄a enye ye ofụri Egypt.+  Tịn̄, nyụn̄ dọhọ ete, ‘Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nnam ikọ ye afo, O Pharaoh, edidem Egypt,+ kpa akamba unam mmọn̄+ emi anyanarede ana ke ufọt mme edịk Nile esie,+ emi ọdọhọde ete, ‘Akpa Nile mi enyene mi, ndien ami nnam enye nnọ idemmi.’+  Ndien ami nyesịn fi uwam ke mban̄+ nnyụn̄ nnam mme iyak edịk Nile fo ẹsọn̄ọ ẹyịre fi ke ikpọk. Ami nyonyụn̄ nsio fi ke ufọt mme edịk Nile fo ndọk ọkọrọ ye kpukpru iyak ke mme edịk Nile fo emi ẹsọn̄ọde ẹyịre fi ke ikpọk.  Ndien ami nyọkpọn̄ fi ke wilderness, afo ye kpukpru iyak ke mme edịk Nile fo.+ Afo ọyọduọ ke iso isọn̄.+ Owo iditan̄ke fi idinyụn̄ imenke fi ibon ọtọkiet. Nyada fi nnọ mme unam ikọt ke isọn̄ ye mme edibotn̄kpọ emi ẹfede ke enyọn̄ nte udia.+  Ndien kpukpru mme andidụn̄ Egypt ẹyefiọk ẹte ke ami ndi Jehovah,+ ke ntak emi mmọ ẹkedide nnyanyan̄a, ẹtie nte ibetedem, ẹnọ ufọk Israel.+  Ke ini mmọ ẹkemụmde fi ubọk, afo ama obụn̄ọ,+ afo ama onyụn̄ anam ofụri afara mmọ asiaha. Ndien ke ini mmọ ẹkeberede fi ke idem, afo ama obụn̄ọ,+ afo ama onyụn̄ anam ofụri isịn mmọ ẹfebede.”+  “‘Mmọdo ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nda akan̄kan̄ ntiene fi,+ ndien nyesịbe owo ye ufene mfep ke esịt fo.+  Ndien isọn̄ Egypt ayakabade ndon ye n̄wụre ebiet;+ ndien mmọ ẹyefiọk ẹte ke ami ndi Jehovah, ke ntak emi enye ọdọhọde ete, ‘Akpa Nile enyene mi, ami nnyụn̄ nnam enye.’+ 10  Mmọdo sese ami mmọn̄ nnam ikọ ye afo ye mme edịk Nile fo,+ ami nyonyụn̄ nnam isọn̄ Egypt edi n̄wụre ebiet ye edisat ebiet ye ndon,+ ọtọn̄ọde ke Migdol+ tutu esịm Syene+ onyụn̄ esịm adan̄a Ethiopia. 11  Ikpat owo idisan̄ake ibe ke esịt esie,+ ikpat ufene idinyụn̄ isan̄ake ibe ke enye,+ ndien owo ididụn̄ke ke enye ke isua aba.+ 12  Ndien ami nyanam isọn̄ Egypt edi ndon ke otu mme idụt emi ẹnade ndon;+ mme obio esie ẹyenyụn̄ ẹkabade ndon ke otu mme obio emi ẹwụrede ke isua aba;+ ndien ami nyasuan nditọ Egypt ndọn̄ ke otu mme idụt nnyụn̄ mbịn mmọ ndọn̄ ke otu mme obio.”+ 13  “‘Koro ntem ke Jehovah Akakan Ọbọn̄ Andikara ọdọhọ ete: “Ke utịt isua aba+ ami nyatan̄ nditọ Egypt ke otu mme owo oro ẹdisuande mmọ ẹdọn̄ mbon ọtọkiet,+ 14  ndien ami nyada otu nditọ Egypt oro ẹkemụmde nte mbuotekọn̄ mfiak ndi; ami nyonyụn̄ nda mmọ mfiak ndi isọn̄ Pathros,+ nda ndi isọn̄ emana mmọ, ndien do ke mmọ ẹdikabade ẹdi usụhọde obio ubọn̄. 15  Enye oyosụhọde akan mme obio ubọn̄ eken, idinyụn̄ itọn̄ọke aba ntak imenede idemesie ke enyọn̄ ikan mme idụt eken,+ ndien ami nyanam enye enen̄ede ekpri ke ibat mbak edikeme ndikara mme idụt eken.+ 16  Ndien enye iditọn̄ọke aba ntak idi ibetedem ufọk Israel,+ anamde ẹti ndudue mmọ ke mmọ ndiwọn̄ọde ntiene mmọ.+ Ndien mmọ ẹyefiọk ẹte ke ami ndi Jehovah Akakan Ọbọn̄ Andikara.”’” 17  Edikem ke ọyọhọ isua edịp ye itiaba, ke akpa ọfiọn̄, ke akpa usen ke ọfiọn̄ oro, uyo Jehovah esịm mi, ete: 18  “Eyen owo, Nebuchadrezzar,+ kpa edidem Babylon, ama anam udịmekọn̄ esie ẹnam akwa utom ẹban̄a Tyre.+ Ẹma ẹnam kpukpru ibuot ẹkwọhọ ibọ, kpukpru afara ẹma ẹnyụn̄ ẹyan̄ade.+ Edi amaedi n̄kpọ eyenutom,+ baba kiet ikodụhe inọ enye ye udịmekọn̄ esie ke Tyre ke utom oro enye akanamde aban̄a enye. 19  “Mmọdo ntem ke Jehovah Akakan Ọbọn̄ Andikara ọdọhọ ete, ‘Sese ami mmọn̄ nda isọn̄ Egypt nnọ Nebuchadrezzar edidem Babylon,+ ndien enye ayatan̄ inyene esie onyụn̄ obụme ediwak n̄kpọ esie+ onyụn̄ owo ediwak n̄kpọ esie; ndien emi edidi n̄kpọ eyenutom udịmekọn̄ esie.’ 20  “‘Ndien ami mmọnọ enye isọn̄ Egypt nte utịp utom emi enye akanamde aban̄a enye, koro mmọ ẹkenamde ẹnọ mi,’+ uyo Jehovah Akakan Ọbọn̄ Andikara edi emi. 21  “Ke usen oro ami nyanam nnụk etịbe ọnọ ufọk Israel,+ nyonyụn̄ nnọ fi ifet nditat inua ke otu mmọ;+ ndien mmọ ẹyefiọk ẹte ke ami ndi Jehovah.”

Mme Ikọ Idakisọn̄