Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 25;1-17

25  Ndien uyo Jehovah ọtọn̄ọ ntak esịm mi, ete:  “Eyen owo, wụk iso fo se nditọ Ammon nyụn̄ tịn̄ ntịn̄nnịm ikọ ban̄a mmọ.+  Afo nyụn̄ dọhọ ban̄a nditọ Ammon ete, ‘Ẹkop uyo Jehovah Akakan Ọbọn̄ Andikara. Ntem ke Jehovah Akakan Ọbọn̄ Andikara ọdọhọ ete: “Ke ntak emi afo ọdọhọde Aha! aban̄a edisana ebiet mi, koro ẹsabarede enye, onyụn̄ ọdọhọde aban̄a isọn̄ Israel, koro ẹnamde enye edi ndon, onyụn̄ ọdọhọde aban̄a ufọk Judah, koro mmọ ẹkade ntan̄mfep,+  mmọdo, sese ami mmọn̄ nyak fi nnọ mbon Edem Usiahautịn nte ẹda ẹnyene,+ ndien mmọ ẹyebọp itienna mmọ oro ẹbọpde ibibene ẹkanade ke esịt fo ẹyenyụn̄ ẹwụk tent mmọ ke esịt fo. Mmọ ẹyedia mbun̄wụm fo, ẹnyụn̄ ẹn̄wọn̄ mmọn̄eba fo.+  Ndien ami nyanam Rabbah+ edi in̄wan̄ mbiet mme camel, nnyụn̄ nnam nditọ Ammon ẹdi ebiet nduọkodudu ẹnọ otuerọn̄;+ ndien mbufo ẹyefiọk ẹte ke ami ndi Jehovah.”’”+  “Koro ntem ke Jehovah Akakan Ọbọn̄ Andikara ọdọhọ ete, ‘Ke ntak emi afo akakwakde ubọk+ onyụn̄ amiade ikpat onyụn̄ adatde esịt onyụn̄ asakde nsahi ke esịt esie aban̄a isọn̄ Israel,+  mmọdo, sese, ami mmanyanade ubọk mi mmia fi,+ ndien ami nyayak fi nnọ mme idụt nte n̄kpọ mbụme; ami nyonyụn̄ nsịbe fi mfep ke otu mme owo nnyụn̄ nsobo fi mfep ke isọn̄.+ Nyosobo fi mfep,+ ndien afo ọyọfiọk ete ke ami ndi Jehovah.’  “Ntem ke Jehovah Akakan Ọbọn̄ Andikara ọdọhọ ete, ‘Ke ntak emi Moab+ ye Seir+ ẹdọhọde ẹte: “Sese! Ufọk Judah etie nte kpukpru mme idụt eken,”+  mmọdo sese ami mmọn̄ mberede usụhọde obot Moab ke mme obio, ke mme obio esie emi ẹdude ke adan̄a esie, kpa n̄kpọmbana isọn̄ oro, Beth-jeshimoth,+ Baal-meon,+ idem tutu esịm Kiriathaim,+ 10  nnọ mbon Edem Usiahautịn,+ ọkọrọ ye nditọ Ammon;+ ndien nyanam ẹda enye ẹnyene, mbak ẹditi enye,+ oro edi, nditọ Ammon, ke otu mme idụt. 11  Ndien ami nyebiere ikpe nnọ Moab;+ ndien mmọ ẹyefiọk ẹte ke ami ndi Jehovah.’+ 12  “Ntem ke Jehovah Akakan Ọbọn̄ Andikara ọdọhọ ete, ‘Ke ntak emi Edom anamde n̄kpọ ndisio ufọk Judah usiene, mmọ ẹnyụn̄ ẹnamde akpakịp idiọkn̄kpọ ẹnyụn̄ ẹsiode mmọ usiene,+ 13  mmọdo ntem ke Jehovah Akakan Ọbọn̄ Andikara ọdọhọ ete: “Ami nyanyanade ubọk n̄ko mmia Edom+ nnyụn̄ nsịbe owo ye ufene mfep ke esịt esie,+ ndien ami nyanam enye edi n̄wụre ebiet ọtọn̄ọde ke Teman,+ idem tutu esịm Dedan.+ Mmọ ẹyeduọn̄ọ ke akan̄kan̄. 14  ‘Ndien nyada ubọk ikọt mi Israel nsio Edom usiene;+ ndien mmọ ẹyenam ke Edom nte ekemde ye iyatesịt mi ye ifụtesịt mi; ndien mmọ ẹyefiọk se usiene mi edide,’+ uyo Jehovah Akakan Ọbọn̄ Andikara edi emi.”’ 15  “Ntem ke Jehovah Akakan Ọbọn̄ Andikara ọdọhọ ete, ‘Ke ntak emi mbon Philistia ẹnamde n̄kpọ ke usiene,+ ẹnyụn̄ ẹsiode usiene ye nsahi ke ukpọn̄ mmọ, man ẹsobo+ ke ntak enyenede nsinsi usua,+ 16  mmọdo ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ nnyanade ubọk mi mmia mbon Philistia,+ nyonyụn̄ nsịbe mme Cherethite+ mfep nnyụn̄ nsobo mbon eken oro ẹsụhọde ke mbeninyan̄.+ 17  Ndien ami nyosio mmọ ikpọ usiene, nnyụn̄ nsua nnọ mmọ ke ifụtesịt;+ ndien mmọ ẹyefiọk ẹte ke ami ndi Jehovah ke ini nsiode mmọ usiene.”’”+

Mme Ikọ Idakisọn̄