Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 16;1-63

16  Ndien uyo Jehovah esịm mi, ete:  “Eyen owo, nam Jerusalem ọfiọk+ mme mbubiam n̄kpọ+ esie.  Afo nyụn̄ dọhọ ete, ‘Ntem ke Jehovah Akakan Ọbọn̄ Andikara ọdọhọ Jerusalem ete: “Afo ọkọtọn̄ọ okonyụn̄ amana ke isọn̄ mbon Canaan.+ Usọ ekedi owo Amorite,+ uka okonyụn̄ edi owo Hittite.+  Ndien ke ini emana fo, owo ikesịbeke fi urụk ekop ke usen emi afo akamanade,+ owo ikonyụn̄ idaha mmọn̄ iyet fi asana, owo ikonyụn̄ iyetke fi inụn̄, owo ikonyụn̄ iwan̄ke fi ke ọfọn̄.  Baba enyịn kiet ikatuaha fi mbọm inam kiet ke otu mme n̄kpọ emi inọ fi man ẹtua fi mbọm,+ edi ẹma ẹtop fi ẹduọk ke iso isọn̄ koro ẹkesuade ukpọn̄ fo ke usen emi afo akamanade.  “‘“Ndien ami ndisan̄a mbe fi nnyụn̄ n̄kụt fi amian̄ade ke iyịp fo, ndien ami ndọhọ fi ke ini emi afo odude ke iyịp fo nte, ‘Du uwem!’+ ih, ndọhọ fi ke ini emi odude ke iyịp fo nte, ‘Du uwem!’  Mma nnam fi awak ata etieti nte mbiet in̄wan̄ tutu afo ọkọri okpon+ onyụn̄ odụk edi ye ata ediye mbana.+ Eba fo mbiba ẹma ẹkponi ẹwọrọ, idet fo onyụn̄ ọkọri etieti, ke ini emi afo ekedide iferi.”’  “‘Ndien ami ndisan̄a mbe fi nnyụn̄ n̄kụt fi, ndien, sese! ini fo ekedi ini unam ima.+ Ntre ami ntat isọn̄ọfọn̄ mi mfụk fi nnyụn̄ mfụk fi+ iferi nnyụn̄ n̄n̄wọn̄ọ un̄wọn̄ọ nnọ fi nnyụn̄ ndụk ediomi ye afo,’+ uyo Jehovah Akakan Ọbọn̄ Andikara edi emi, ‘ndien afo ama akabade edi okịm.+  N̄ko-n̄ko, ami mma nda mmọn̄+ nyet fi nnyụn̄ ndarade fi iyịp mfep ke idem nnyụn̄ nyet fi aran.+ 10  Ndien mma nsịne fi ọfọn̄idem emi ẹkịmde ẹdọn̄ fansi+ ye ikpaukot ikpa seal+ nnyụn̄ nda eti linen+ n̄wan̄ fi nnyụn̄ mfụk fi ọsọn̄urua ọfọn̄ ke idem. 11  Ndien mma nda n̄kpọmbana mbana fi idem nnyụn̄ ndọn̄ fi n̄kpọubọk+ ke ubọk nnyụn̄ n̄kọn̄ fi n̄kpọitọn̄+ ke itọn̄. 12  N̄ko-n̄ko, ami nsịne fi n̄kpanuen ibuo+ ke ibuo ye n̄kpanuen utọn̄ ke utọn̄+ nnyụn̄ nyara fi ediye anyanya ke ibuot.+ 13  Ndien afo ada gold ye silver abana idem, edisịnen̄kpọ fo ekedi eti linen ye ọsọn̄urua ọfọn̄ ye ọfọn̄idem emi ẹkịmde ẹdọn̄ fansi.+ Afo akadia eti ndomuyo ye aranọkwọk ye aran,+ ndien afo ama ọkọri eye ata etieti, ndien sụn̄sụn̄ afo odot ndinyene itie ubọn̄.’”+ 14  “‘Ndien enyịn̄ fo ọwọrọ etop ke otu mme idụt ke ntak uyai fo, koro enye ama ọfọn ama ke ntak ubọn̄ mi oro n̄kodoride fi ke idem,’+ uyo Jehovah Akakan Ọbọn̄ Andikara edi emi.” 15  “‘Edi afo ọtọn̄ọ ndibuọt idem ke uyai+ fo onyụn̄ akabade akpara ke ntak enyịn̄+ fo onyụn̄ an̄wan̄a mme edinam usan̄a akpara fo ọduọk ke idem kpukpru owo oro ẹsan̄ade ẹbe;+ uyai fo akabade edi eke mmọ. 16  Ndien afo ada ndusụk ọfọn̄idem fo anam nsio nsio uduot edikon̄ ebiet+ ọnọ idemfo onyụn̄ anam akpara ke enyọn̄ mmọ+—mme utọ n̄kpọ oro ikpodụkke idi, ikponyụn̄ itịbeke. 17  Ndien afo ada ndiye n̄kpọ fo emi akanamde ke gold ye silver oro n̄kọnọde fi+ anam mme mbiet erenowo+ ọnọ idemfo onyụn̄ anam akpara ye mmọ.+ 18  Ndien afo ada ọfọn̄ emi ẹkịmde ẹdọn̄ fansi ofụk mmọ; afo onyụn̄ ada aran mi ye incense+ mi enịm mmọ ke iso. 19  Ndien afo ada uyo mi oro n̄kọnọde fi—eti ndomuyo ye aran ye aranọkwọk oro n̄kọnọde fi adia+—enịm ke iso mmọ nte edinem utebe,+ ndien emi etịbe,’ uyo Jehovah Akakan Ọbọn̄ Andikara edi emi.” 20  “‘Ndien afo ada nditọiren fo ye nditọiban fo emi afo akamande ọnọ mi,+ awa ọnọ mmọ man ẹta+—nte mme edinam usan̄a akpara fo emi ikemke? 21  Ndien afo owot nditọiren mi,+ onyụn̄ ọfọp mmọ ke ikan̄.*+ 22  Ndien ke kpukpru mme mbubiam n̄kpọ fo ye ke mme edinam usan̄a akpara fo, afo uketịghi mme usen uyen fo, ini emi afo ekedide iferi; ini emi afo akamian̄ade ke iyịp fo.+ 23  Edikem ke ama akanam kpukpru idiọkn̄kpọ fo (“mbọm, mbọm fo,”+ uyo Jehovah Akakan Ọbọn̄ Andikara edi emi), 24  afo anam ibombom ọnọ idemfo onyụn̄ anam edikon̄ ebiet ke kpukpru an̄wa obio ọnọ idemfo.+ 25  Afo ọbọp edikon̄ ebiet+ fo ke kpukpru ibuot usụn̄ onyụn̄ anam uyai fo edi n̄kpọ itekesịt+ onyụn̄ atat ukot fo ọnọ kpukpru owo emi ẹsan̄ade ẹbe+ onyụn̄ anam mme edinam usan̄a akpara fo ẹwak.+ 26  Ndien afo aka akanam akpara ye nditọ Egypt,+ kpa mme mbọhọidụn̄ fo emi ẹkponde obụkidem,*+ afo onyụn̄ anam akpara fo awak man ayat mi esịt. 27  Ndien, sese! ami nyanyanade ubọk mi n̄n̄wana ye afo+ nnyụn̄ nnam udeme+ fo osụhọde nnyụn̄ nyak fi nnọ se idọn̄de+ ukpọn̄ iban eke ẹsuade fi,+ nditọiban Philistia,+ kpa iban eke ẹbọde esuene ke ntak obukpo ido fo.+ 28  “‘Ndien afo aka akanam akpara ye nditọ Assyria koro afo mûkokopke uyụhọ,+ ndien afo anam akpara ye mmọ unyụn̄ ukopke uyụhọ n̄ko. 29  Ntre afo anam edinam usan̄a akpara fo awak ke isọn̄ Canaan+ ye mbon Chaldea;+ ndien emi n̄ko ikam inamke fi okop uyụhọ. 30  O se nte esịt ofụtde+ mi aban̄a fi,’ uyo Jehovah Akakan Ọbọn̄ Andikara edi emi, ‘ke afo ndinam kpukpru n̄kpọ emi, utom an̄wan,+ kpa akpara oro etiede ukara ukara!+ 31  Ke ini akanamde ibombom fo ke ibuot kpukpru usụn̄ onyụn̄ anamde edikon̄ ebiet fo ke kpukpru an̄wa obio, afo ukûbietke akpara koro ekesede okụk ke ndek. 32  Amaedi n̄wan oro esịnde efịbe, enye ada isenowo utu ke ebe esie.+ 33  Emehe mme owo ndinọ kpukpru mme akpara enọ,+ edi afo amada mme enọ fo ọnọ kpukpru mmọ eke ẹnen̄erede ẹma fi,+ ndien afo ọnọ mmọ ubọkedem man ẹto ke kpukpru edem ẹdụk ẹdi ẹbịne fi kaban̄a mme edinam+ usan̄a akpara fo. 34  Ndien mme edinam usan̄a akpara fo ẹdi isio ye eke iban eken, inyụn̄ idụhe baba owo kiet eke asan̄ade utọ akpara eke afo asan̄ade, idem ke afo ndinọ owo okụk ke ini owo mînọhọ fi okụk, ntre ke afo anam ke isio isio usụn̄.’ 35  “Mmọdo, O akpara,+ kop uyo Jehovah.+ 36  Ntem ke Jehovah Akakan Ọbọn̄ Andikara ọdọhọ ete, ‘Ke ntak emi afo an̄wan̄ade ọkpọsọn̄ udọn̄ idan̄ fo ọduọk+ onyụn̄ ofụhọrede mme ndido idan̄+ fo ke mme edinam usan̄a akpara fo owụt mbon oro ẹnen̄erede ẹma fi+ onyụn̄ owụtde kpukpru mme mbubiam mbiet+ fo, idem ye iyịp nditọiren fo emi afo ọkọnọde mmọ,+ 37  mmọdo sese ami mmọn̄ ntan̄ kpukpru mbon oro ẹnen̄erede ẹma fi emi afo ekenemde mmọ ye kpukpru mbon oro afo akamade ọkọrọ ye kpukpru mbon oro afo akasuade, mbon ọtọkiet, ndien ami nyatan̄ mmọ ke kpukpru edem mbon ọtọkiet ẹdin̄wana ye afo, nyonyụn̄ mfụhọde mme ndido idan̄ fo n̄wụt mmọ, ndien mmọ ẹyekụt kpukpru ndido idan̄ fo.+ 38  “‘Ndien ami nyekpe ikpe ye afo nte emi ẹkpede ye iban n̄kaowo+ ye iban emi ẹduọkde iyịp,+ ndien ami nyọnọ fi iyịp ifụtesịt ye ufụp.+ 39  Ndien nyayak fi nsịn mmọ ke ubọk, ndien mmọ ẹyewụri ibombom+ fo ẹnyụn̄ ẹwụri mme edikon̄ ebiet fo,+ mmọ ẹyenyụn̄ ẹsion̄o fi ọfọn̄+ ẹfep ke idem ẹnyụn̄ ẹda ndiye n̄kpọ+ fo ẹnyụn̄ ẹkpọn̄ fi iferi. 40  Ndien mmọ ẹyeda esop+ ẹdọk ẹdin̄wana ye afo ẹnyụn̄ ẹtọn̄ọ fi ke itiat+ ẹnyụn̄ ẹwot fi ke akan̄kan̄ mmọ.+ 41  Ndien mmọ ẹyefọp mme ufọk fo ke ikan̄+ ẹnyụn̄ ẹbiere ikpe ẹnọ fi ke iso ediwak iban;+ ndien ami nyanam fi etre ndisan̄a akpara,+ n̄ko afo udunyụn̄ unọhọ aba okụk. 42  Ndien ami nyanam ifụtesịt mi odobo ke idem fo,+ ufụp mi oyonyụn̄ ọwọn̄ọde ọkpọn̄ fi;+ ndien ami nyetie sụn̄ ndinyụn̄ ntọn̄ọke aba ntak nyat esịt.’ 43  “‘Ke ntak emi afo mûketịghi mme usen uyen+ fo, okonyụn̄ anamde mi n̄kop editịmede esịt ke ntak kpukpru mme n̄kpọ emi,+ idem ke ebiet emi ami n̄ko nyada usụn̄ fo ndori fi ke ibuot,’+ uyo Jehovah Akakan Ọbọn̄ Andikara edi emi, ‘ndien afo udunamke obukpo ido ekededi ukọrọ ye kpukpru mbubiam n̄kpọ fo. 44  “‘Sese! Kpukpru owo oro ẹtohode fi ufiet+ ẹyetoho ufiet emi, ẹte: “Eyen mbiet eka!”+ 45  Afo edi eyenan̄wan ọnọ eka fo,+ enye emi asuade ebe+ esie ye nditọ esie. Afo onyụn̄ edi eyeneka an̄wan ọnọ nditọeka fo iban, emi ẹkesuade mme ebe mmọ ye nditọ mmọ. Eka oro akamande mbufo iban emi ekedi owo Hittite,+ ete mbufo okonyụn̄ edi owo Amorite.’”+ 46  “‘Ndien akamba eyeneka fo an̄wan edi Samaria+ ye n̄kpri obio esie,+ emi odụn̄de ke ufien fo, ekpri eyeneka fo an̄wan, emi odụn̄de ke nnasia fo, onyụn̄ edi Sodom+ ye n̄kpri obio esie.+ 47  Ndien afo ukusan̄ake ke usụn̄ mmọ, ukunyụn̄ unamke nte ekemde ye mme mbubiam n̄kpọ mmọ.+ Ke ata esisịt ini afo amanam se idade nsobo idi akan se mmọ ẹkenamde ke kpukpru usụn̄ fo.+ 48  Ma uwem mi,’ uyo Jehovah Akakan Ọbọn̄ Andikara edi emi, ‘Sodom eyeneka fo an̄wan, enye ye n̄kpri obio esie, inamke nte afo akanamde, afo ye n̄kpri obio fo.+ 49  Sese! Emi ekedi ndudue Sodom eyeneka fo an̄wan: Ntan̄idem,+ uyo+ oro awakde ekem ye ifụre+ editie sụn̄ emi enye ye n̄kpri obio+ esie ẹkenyenede, enye ikonyụn̄ isọn̄ọke+ owo ukụt+ ye ubuene ubọk. 50  Ndien mmọ ẹseri iseri+ ẹnyụn̄ ẹnam mbubiam n̄kpọ ke iso mi,+ ndien ke akpatre ami mmen mmọ mfep, kpa nte n̄kụtde ke odot.+ 51  “‘Ndien amaedi Samaria,+ enye inamke idiọkn̄kpọ isịm mbahade iba ke idiọkn̄kpọ fo, edi afo amanam mme mbubiam n̄kpọ fo ẹwak ẹkan se mmọ ẹkenamde, ntre afo amanam nditọeka fo iban ẹtie nte ndinen owo ke ntak kpukpru mbubiam n̄kpọ oro afo anamde.+ 52  Afo n̄ko, biom esuene fo ke ini afo enenide eneni ke ufọn nditọeka fo iban. Ke ntak mme idiọkn̄kpọ fo emi afo akanamde mbubiam akan nte mmọ ẹkenamde, mmọ ẹmenen ẹkan fi.+ Ndien afo n̄ko, kop bụt nyụn̄ biom esuene fo sia afo anamde nditọeka fo iban ẹtie nte ndinen owo.’ 53  “‘Ndien ami nyatan̄ ikọt mmọ oro ẹkemụmde nte mbuotekọn̄,+ mbon Sodom oro ẹkemụmde nte mbuotekọn̄ ye eke n̄kpri obio esie mbon ọtọkiet, ọkọrọ ye mbon Samaria oro ẹkemụmde nte mbuotekọn̄ ye eke n̄kpri obio esie; ami nyatan̄ n̄ko ikọt fo emi ẹdude ke otu mmọ, oro ẹkemụmde nte mbuotekọn̄ mbon ọtọkiet,+ 54  man afo okpobiom esuene fo;+ ndien afo ayadia esuene ke ntak kpukpru n̄kpọ oro afo anamde, ke emi afo ọkọdọn̄de mmọ esịt.+ 55  Ndien nditọeka fo iban, Sodom ye n̄kpri obio esie, ẹyefiak ẹketie nte mmọ ẹketiede ke akpa, ndien Samaria ye n̄kpri obio esie ẹyefiak ẹketie nte mmọ ẹketiede ke akpa, ndien afo ye n̄kpri obio fo ẹyefiak ẹketie nte mbufo ẹketiede ke akpa.+ 56  Ndien Sodom eyeneka fo an̄wan ikedịghe n̄kpọ ndomokiet oro ẹkpekopde ẹban̄a ke inua fo ke usen emi afo akatan̄de idem,+ 57  mbemiso ẹkeyararede idiọkn̄kpọ fo,+ kpa nte ekedide ke ini oro ẹkesuenede nditọiban Syria+ ye kpukpru mbon oro ẹkande enye ẹkụk, kpa nditọiban Philistia,+ mbon oro ẹdade fi ẹnam n̄kpọ nsahi ke kpukpru edem.+ 58  Afo oyobiom obukpo ido+ fo ye mme mbubiam n̄kpọ fo,’+ uyo Jehovah edi emi.” 59  “Koro ntem ke Jehovah Akakan Ọbọn̄ Andikara ọdọhọ ete, ‘Ami n̄ko nyanam ye afo kpa nte afo akanamde,+ koro afo ekesịnde un̄wọn̄ọ ke ndek ke ndibiat ediomi mi.+ 60  Ndien ami nyeti ediomi mi oro n̄kodiomide ye afo ke mme usen uyen fo,+ nyonyụn̄ nnam nsinsi ediomi+ ye afo. 61  Ndien afo eyeti mme usụn̄+ fo onyụn̄ adia esuene ke ini afo ọbọde nditọeka fo iban, mbon oro ẹkponde ẹkan fi ọkọrọ ye mbon oro ẹkpride ẹkan fi, ndien ami nyayak mmọ nnọ fi nte nditọiban,+ edi idịghe ke ntak ediomi+ fo.’ 62  “‘Ndien ami nyanam ediomi mi ye afo;+ ndien afo ọyọfiọk ete ke ami ndi Jehovah, 63  man afo ekpeti okponyụn̄ okop bụt,+ okûnyụn̄ enyene aba ntak ekededi ndikụbọde inua+ fo ke ntak esuene fo, ke ini nsiode isop+ nnọ fi ke kpukpru se afo anamde,’ uyo Jehovah Akakan Ọbọn̄ Andikara edi emi.”

Mme Ikọ Idakisọn̄

At. Ed., “anam ẹbe ke ikan̄.”
M̀mê, “ndido idan̄.”