Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Ezekiel 1;1-28

1  Edikem ke ọyọhọ isua edịp ye duop, ke ọyọhọ ọfiọn̄ inan̄, ke ọyọhọ usen ition ke ọfiọn̄ oro, ke adan̄aemi ndude ke otu mbon ntan̄mfep+ ke mben Akpa Chebar,+ enyọn̄ eberede+ ndien n̄kụt n̄kukụt Abasi.+  Ke ọyọhọ usen ition, oro edi, ke ọyọhọ isua ition tọn̄ọ nte ẹkeda Edidem Jehoiachin ẹka ntan̄mfep,+  uyo Jehovah esịm+ Ezekiel+ eyen Buzi oku ke isọn̄ mbon Chaldea+ ke mben Akpa Chebar, ubọk Jehovah onyụn̄ odoro enye ke idem ke ebiet oro.+  N̄kụt, ndien sese! oyobio+ oto edem edere edi, akamba eboho obubịt enyọn̄+ ye ikan̄ eke emịnen̄de,+ uyama onyụn̄ akan enye okụk, ndien n̄kpọ eke etiede nte mbuaha gold ye silver ọwọrọ ke ufọt esie, ke ufọt ikan̄ oro.+  Mme n̄kpọ eke ẹbietde odu-uwem edibotn̄kpọ+ inan̄ ẹnyụn̄ ẹwọrọ ke ufọt esie, ndien mmọ ẹketie ntem: mmọ ẹkebiet owo.  Kiet kiet ekenyene iso inan̄,+ kiet kiet okonyụn̄ enyene mba inan̄.+  Ndien ukot mmọ ẹnyụn̄ ẹdi nnennen, ekaikpat mmọ ẹkenyụn̄ ẹbiet ekaikpat eyen enan̄;+ ndien mmọ ẹkesem nte okpoho eke ẹtụkde esem.+  Ndien mme ubọk owo ẹdu ke idak mba mmọ ke n̄kan̄ mmọ mbinan̄,+ mmọ mbinan̄ ẹnyụn̄ ẹnyene iso ye mba.+  Mba mmọ ẹtụk kiet eken. Mmọ iwọn̄ọkede iso ke ini mmọ ẹkade; mmọ kiet kiet ẹnen iso ẹka.+ 10  Ndien amaedi nte iso mmọ ẹtiede, mmọ mbinan̄ ẹnyene iso owo+ ye iso ekpe+ ke nnasia,+ mmọ mbinan̄ ẹnyụn̄ ẹnyene iso ayara enan̄+ ke ufien;+ mmọ mbinan̄ ẹnyụn̄ ẹnyene iso ntrukpom.+ 11  Ntem ke iso mmọ ẹketie. Mba+ mmọ ẹnyụn̄ ẹtara ẹmenede ke enyọn̄. Kiet kiet enyene mba iba emi ẹtụkde kiet eken, iba ẹnyụn̄ ẹfụk mmọ idem.+ 12  Ndien mmọ kiet kiet ẹnen iso ẹka.+ Ebiet ekededi eke spirit oyomde ndika, mmọ ẹka.+ Mmọ iwọn̄ọkede iso nte mmọ ẹkade.+ 13  Ndien amaedi mme odu-uwem edibotn̄kpọ oro, mmọ ẹkebiet ikan̄ ukan̄ eke asakde.+ N̄kpọ eke ebietde nsadan̄ ikan̄+ asan̄a aka iso afiak edem ke ufọt mme odu-uwem edibotn̄kpọ oro, ndien ikan̄ oro ayama, emịnen̄mịnen̄ onyụn̄ oto ke ikan̄ oro ọwọrọ.+ 14  Ndien mme odu-uwem edibotn̄kpọ oro ẹwọrọ ẹka ẹnyụn̄ ẹfiak ẹdi nte emịnen̄mịnen̄.+ 15  Nte nsụk nsede mme odu-uwem edibotn̄kpọ oro, n̄kụt ndien sese! wheel kiet odu ke isọn̄ ke n̄kan̄ mme odu-uwem edibotn̄kpọ oro,+ ekpere mme odu-uwem edibotn̄kpọ emi kiet kiet enyenede iso inan̄.+ 16  Amaedi nte mme wheel+ oro ẹtiede ye nte ẹnamde mmọ, mmọ ẹkebiet uyama chrysolite;+ mmọ mbinan̄ ẹkebiet kiet eken. Ndien nte mmọ ẹtiede ye nte ẹnamde mmọ ẹketie nte emi wheel odude ke esịt wheel.+ 17  Ke ini mmọ ẹkade, mmọ ẹsan̄a ke n̄kan̄ mmọ mbinan̄.+ Mmọ iwọn̄ọkede idụk usụn̄ efen ke ini mmọ ẹkade.+ 18  Ndien amaedi mben mmọ, mmọ ẹkon̄ tutu ẹnam owo ndịk; enyịn ẹnyụn̄ ẹyọhọ mben mmọ ẹkan mmọ mbinan̄ ẹkụk.+ 19  Ndien ke ini mme odu-uwem edibotn̄kpọ emi ẹkade, mme wheel ẹsan̄a mmọ ke n̄kan̄, ke ini ẹnyụn̄ ẹmenerede mme odu-uwem edibotn̄kpọ emi ẹkpọn̄ isọn̄, ẹmenede mme wheel.+ 20  Ebiet ekededi eke spirit oyomde ndika, mmọ ẹka, koro spirit oyomde ndika do; ndien ẹmenede mme wheel ke enyọn̄ ẹkpere n̄kan̄ mmọ, koro spirit emi odude ke odu-uwem edibotn̄kpọ odude ke mme wheel. 21  Ke ini mmọ ẹkade, mmọ emi ẹyeka; ndien ke ini mmọ ẹtuakde ẹda, mmọ emi ẹtuak ẹda; ke ini ẹmenerede mmọ ẹkpọn̄ isọn̄, ẹmenede mme wheel ke enyọn̄ ẹkpere n̄kan̄ mmọ, koro spirit emi odude ke odu-uwem edibotn̄kpọ odude ke mme wheel.+ 22  Ndien n̄kpọ eke ebietde ikpaenyọn̄,+ onyụn̄ ebietde uyama ice oro enyenede uten̄e, odu ke enyọn̄ ibuot mme odu-uwem edibotn̄kpọ oro, anyanade ke enyọn̄ ibuot mmọ.+ 23  Ndien ke idak ikpaenyọn̄ oro, mba mmọ ẹnen ẹse enyọn̄, kiet otụk eken. Kiet kiet enyene mba iba emi ẹfụkde n̄kan̄ emi, kiet kiet onyụn̄ enyene mba iba emi ẹfụkde idem mmọ ke n̄kan̄ eken. 24  Ndien n̄kop uyom mba mmọ, uyom emi ebiet uyom akamba mmọn̄,+ ebiet uyom Enye emi edide Ata Ọkpọsọn̄, ke ini mmọ ẹkade, uyom editịm,+ ebiet uyom nnaekọn̄.+ Ke ini mmọ ẹtuakde ẹda, mmọ ẹsụhọde mba mmọ ẹnịm. 25  Ndien uyo ọwọrọ ke enyọn̄ ikpaenyọn̄ oro odude ke enyọn̄ ibuot mmọ. (Ke ini mmọ ẹtuakde ẹda, mmọ ẹsụhọde mba mmọ ẹnịm.) 26  Ndien n̄kpọ eke ebietde itiat sapphire,+ onyụn̄ ebietde ebekpo,+ odu ke enyọn̄ ikpaenyọn̄ oro odude ke enyọn̄ ibuot mmọ. Ndien mbiet owo odoro ke n̄kpọ eke ebietde ebekpo,+ ke enyọn̄. 27  Ndien ami n̄kụt n̄kpọ eke etiede nte uyama mbuaha gold ye silver,+ n̄kpọ eke ebietde ikan̄ akan esịt esie okụk,+ ọtọn̄ọde ke se ibietde isịn esie dọk; ndien ọtọn̄ọde ke se ibietde isịn esie sụhọde, ami n̄kụt n̄kpọ eke ebietde ikan̄, enye onyụn̄ ayama akan okụk. 28  Ndien n̄kpọ eke ebietde akpara+ odu ke obubịt enyọn̄ nte ke usen emi edịm edepde. Ntem ke uyama oro akande okụk eketie. Enye ekebiet ubọn̄ Jehovah.+ Ke ini n̄kụtde n̄kpọ emi, ami nduọ n̄kịbi iso ke isọn̄,+ nnyụn̄ ntọn̄ọ ndikop nte uyo etịn̄de ikọ.

Mme Ikọ Idakisọn̄