Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Exodus 8;1-32

8  Ekem Jehovah ọdọhọ Moses ete: “Ka ke ọtọ Pharaoh kọdọhọ enye ete, ‘Ntem ke Jehovah ọdọhọ ete: “Yak ikọt mi ẹnyọn̄ọ man mmọ ẹkenam n̄kpọ ẹnọ mi.+  Ndien edieke afo osụk esịnde ndiyak mmọ ẹnyọn̄ọ, sese mmọn̄ nda mfọt mmia ofụri obio fo ufen.+  Ndien mfọt ẹyeyọhọ Akpa Nile, ẹyenyụn̄ ẹdọk ẹdụk ufọk fo ye esịt ubet fo ẹnyụn̄ ẹdọk n̄kpana fo ẹnyụn̄ ẹdụk ufọk mme asan̄autom fo ẹnyụn̄ ẹdọk ikọt fo idem ẹnyụn̄ ẹdụk usan̄uyo fo ye n̄kpọ unuak ndomuyo fo.+  Mfọt ẹyenyụn̄ ẹdọk fi ye ikọt fo ye kpukpru mme asan̄autom fo idem.”’”+  Ekem Jehovah ọdọhọ Moses ete: “Dọhọ Aaron ete, ‘Nyan esan̄+ oro akamade ke ubọk do ke akpa ye ke mme edịk Nile ye ke mme n̄kpọdiọhọ mmọn̄ nyụn̄ nam mfọt ẹdọk ẹdi isọn̄ Egypt.’”  Ndien Aaron anyan ubọk esie ke mmọn̄ Egypt, ndien mfọt ẹtọn̄ọ ndidọk ndiyọhọ isọn̄ Egypt.  Edi mme oku mfọni ẹda mfọni mmọ ẹnam kpa ntre ẹnyụn̄ ẹnam mfọt ẹdọk ẹdi isọn̄ Egypt.+  Ekem Pharaoh okot Moses ye Aaron onyụn̄ ọdọhọ ete: “Ẹkpe Jehovah ubọk+ ẹte enye emen mfọt emi ọkpọn̄ mi ye ikọt mi, koro mmọn̄ nyak ikọt mbufo ẹnyọn̄ọ man mmọ ẹkewa uwa ẹnọ Jehovah.”+  Edi Moses ọdọhọ Pharaoh ete: “Ke ukpono fo, mbọk, sian mi ini eke ndinamde n̄kpeubọk nnọ fi ye mme asan̄autom fo ye ikọt fo man ẹmen mfọt emi ẹkpọn̄ fi ye ufọk fo. Mmọ ẹdidu ke Akpa Nile kpọt.” 10  Ndien enye ọdọhọ ete: “N̄kpọn̄.” Ntre enye ọdọhọ ete: “Eyedi kpa nte afo ọdọhọde, man afo ọkpọfiọk ete ke owo baba kiet ibietke Jehovah Abasi nnyịn,+ 11  koro mfọt emi ẹyekpọn̄ fi ye ufọk fo ye mme asan̄autom fo ye ikọt fo. Mmọ ẹdidu ke Akpa Nile kpọt.”+ 12  Ndien Moses ye Aaron ẹwọrọ ẹkpọn̄ Pharaoh, Moses onyụn̄ eseme okot Jehovah+ ke ntak mfọt oro Enye akadade amia Pharaoh ufen. 13  Ndien Jehovah anam ke uyo Moses,+ mfọt ẹnyụn̄ ẹtọn̄ọ ndikpan̄a ke ufọk ye ke okụre ye ke in̄wan̄. 14  Ndien mmọ ẹkpọri mfọt oro ẹbok, ke ebok ke ebok, ndien isọn̄ ọtọn̄ọ nditebe.+ 15  Ke ini Pharaoh okụtde ke imọbọhọ mfịna emi, enye anam esịt esie ọsọn̄;+ enye inyụn̄ ikpan̄ke utọn̄ inọ mmọ, kpa nte Jehovah ọkọdọhọde.+ 16  Ekem Jehovah ọdọhọ Moses ete: “Dọhọ Aaron ete, ‘Menede esan̄ fo+ yịbi ntan isọn̄, ndien enye ayakabade edi mbufụk ke ofụri isọn̄ Egypt.’” 17  Ndien mmọ ẹnam ntre. Ntem Aaron emenede esan̄ oro enye akamade ke ubọk eyịbi ntan isọn̄, ndien mbufụk ofụk owo ye unam. Ofụri ntan isọn̄ ẹkabade ẹdi mbufụk ke ofụri isọn̄ Egypt.+ 18  Ndien mme oku mfọni ẹdomo ndida mfọni mmọ nnam kpa ntre+ nnyụn̄ nsion̄o mbufụk ndi, edi mmọ ikemeke.+ Ndien mbufụk ofụk owo ye unam. 19  Ntem mme oku mfọni ẹdọhọ Pharaoh ẹte: “Emi edi nnuenubọk+ Abasi!”+ Edi esịt Pharaoh ọdọdiọn̄ ọsọn̄,+ enye inyụn̄ ikpan̄ke utọn̄ inọ mmọ, kpa nte Jehovah ọkọdọhọde. 20  Ekem Jehovah ọdọhọ Moses ete: “Bak demede ke usenubọk ka kada ke iso Pharaoh.+ Sese! Enye ke ọwọrọ edi ndika akpa! Ndien dọhọ enye ete, ‘Ntem ke Jehovah ọdọhọ ete: “Yak ikọt mi ẹnyọn̄ọ man mmọ ẹkenam n̄kpọ ẹnọ mi.+ 21  Edi edieke afo mûyakke ikọt mi ẹnyọn̄ọ, sese nyọdọn̄ okpụm nnọ fi ye ikọt fo ye ufọk fo;+ ndien okpụm ẹyeyọhọ kpukpru ufọk ke Egypt ye ke isọn̄ emi mmọ ẹdude n̄ko. 22  Ndien ke usen oro nyanam isọn̄ Goshen emi ikọt mi ẹdụn̄de ọwọrọ ada san̄asan̄a, man okpụm ndomokiet okûdu do;+ man afo ọfiọk ete ke ami ndi Jehovah ke ofụri isọn̄.+ 23  Ndien ami nyenịm ubahade ke ufọt ikọt mi ye ikọt fo.+ Idiọn̄ọ emi ayada itie n̄kpọn̄.”’” 24  Ndien Jehovah anam ntre; ndien akwa udịm okpụm ẹtọn̄ọ ndidụk ufọk Pharaoh ye ufọk mme asan̄autom esie ye ofụri isọn̄ Egypt.+ Okpụm+ ẹnyụn̄ ẹbiat idụt oro. 25  Ekem Pharaoh okot Moses ye Aaron onyụn̄ ọdọhọ mmọ ete: “Ẹka ẹkewa uwa ẹnọ Abasi mbufo ke idụt emi.”+ 26  Edi Moses ọdọhọ ete: “Inenke nnyịn ndinam ntre, koro se nnyịn idiwade inọ Jehovah Abasi nnyịn edidi mbubiam n̄kpọ ke enyịn nditọ Egypt.+ Edieke nnyịn iwade se idide mbubiam n̄kpọ ke enyịn nditọ Egypt; nte mmọ iditọn̄ọke nnyịn ke itiat? 27  Nnyịn idinam isan̄ usen ita ika wilderness inyụn̄ ikawa uwa do inọ Jehovah Abasi nnyịn kpa nte enye eketemede nnyịn.”+ 28  Ndien Pharaoh ọdọhọ ete: “Ami nyayak mbufo ẹka,+ ndien mbufo ẹyewa uwa ẹnọ Jehovah Abasi mbufo ke wilderness.+ Edi mbufo ẹkûka enen̄ede oyom usụn̄ ntre. Ẹnam n̄kpeubọk ẹnọ mi.”+ 29  Ndien Moses ọdọhọ ete: “Sese, mmọn̄ n̄wọrọ n̄kpọn̄ iso fo, nyonyụn̄ n̄kpe Jehovah ubọk, ndien okpụm ẹyekpọn̄ Pharaoh ye mme asan̄autom esie ye ikọt esie n̄kpọn̄. Edi yak Pharaoh okûbian̄a nnyịn aba onyụn̄ esịn ndiyak ikọt nnyịn ẹka ẹkewa uwa ẹnọ Jehovah.”+ 30  Ekem Moses ọwọrọ ọkpọn̄ Pharaoh onyụn̄ ekekpe Jehovah ubọk.+ 31  Ntre Jehovah anam ke uyo Moses,+ ndien okpụm ẹkpọn̄ Pharaoh ye mme asan̄autom esie ye ikọt esie.+ Ndomokiet isụhọke. 32  Edi Pharaoh anam esịt esie ọsọn̄ ini emi n̄ko, inyụn̄ iyakke mbon oro ẹnyọn̄ọ.+

Mme Ikọ Idakisọn̄