Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Exodus 36;1-38

36  “Ndien yak Bezalel anam utom, ọkọrọ ye Oholiab+ ye kpukpru mbon esịt ọniọn̄ emi Jehovah ọnọde ọniọn̄+ ye ifiọk+ ke mme n̄kpọ emi man mmọ ẹfiọk ndinam kpukpru utom edisana ebiet nte ekemde ye kpukpru se Jehovah eketemede.”+  Ndien Moses okot Bezalel ye Oholiab ye kpukpru mbon esịt ọniọn̄ emi Jehovah ekesịnde mmọ ọniọn̄ ke esịt,+ kpukpru owo eke esịt onụkde ndidi ndinam utom emi.+  Ndien mmọ ẹbọ Moses kpukpru etịbe+ oro nditọ Israel ẹkedade ẹdi ke utom edisana ebiet, man ẹda ẹnam utom emi, ndien nditọ Israel ẹda enọ unyịmesịt ẹdi kpukpru usenubọk.  Ndien kpukpru mbon ọniọn̄ emi ẹnamde ofụri edisana utom emi ẹtọn̄ọ ndidi kiet kiet, kpukpru mmọ ẹkpọn̄ utom emi mmọ ẹkenamde ẹdi,  ẹnyụn̄ ẹdidọhọ Moses ẹte: “Mbon emi ẹnọ n̄kpọ awak akan se ẹyomde ke utom emi Jehovah eketemede ete ẹnam.”  Ntre Moses eteme ete ẹnọ ntọt ke ofụri itienna ẹte: “Iren ye iban, ẹkûnam aba n̄kpọ ẹda ẹdi nte edisana etịbe.” Ntem ke ẹnam mme owo ẹtre ndida n̄kpọ ndi.  Ndien n̄kpọ awak ekem ke kpukpru utom emi ẹkenyenede ndinam, onyụn̄ awak akan se ẹkeyomde.  Ndien kpukpru mbon esịt ọniọn̄+ ke otu mbonutom ẹnam tent utuakibuot+ emi ke ọfọn̄ tent duop emi ẹnamde ke eti linen oro ẹfiakde-fiak ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi; enye ọdọk cherub nte fansi adian ke mmọ.  Uniọn̄ ọfọn̄ tent kiet kiet ekedi cubit edịp ye itiaita, ubom ọfọn̄ tent kiet kiet okonyụn̄ edi cubit inan̄. Kpukpru ọfọn̄ tent emi ẹkenyene udomo kiet. 10  Ekem enye ada ọfọn̄ tent ition ekịm kiet eyịri ye eken,+ onyụn̄ ada ọfọn̄ tent ition efen ekịm kiet eyịri ye eken. 11  Ndien enye ada blu blu ndidi anam itie usịn ekọp ke mben ọfọn̄ tent kiet emi edide akpatre. Enye anam kpasụk ntre ke mben akpatre ọfọn̄ tent enye eken emi ẹdimende ẹkpaha.+ 12  Enye anam itie aba ye duop emi ẹdisịnde ekọp ke ọfọn̄ tent kiet, onyụn̄ anam itie aba ye duop emi ẹdisịnde ekọp ke utịt ọfọn̄ tent enye eken emi ẹdimende ẹkpaha, mme itie usịn ekọp emi ẹsak iso ẹse kiet eken.+ 13  Ekem enye ada gold anam ekọp aba ye duop onyụn̄ ada mme ekọp emi akpaha mme ọfọn̄ tent emi adian kiet man akabade edi tent utuakibuot kiet.+ 14  Ndien enye ada idet ebot anam ọfọn̄ tent emi ẹdidade ẹfụk tent utuakibuot emi. Enye anam ọfọn̄ tent duopekiet.+ 15  Uniọn̄ ọfọn̄ tent kiet kiet ekedi cubit edịp ye duop, ubom ọfọn̄ tent kiet kiet okonyụn̄ edi cubit inan̄. Ọfọn̄ tent duopekiet emi ẹkenyene udomo kiet.+ 16  Ndien enye ekịm ọfọn̄ tent ition eyịri kiet onyụn̄ ekịm ọfọn̄ tent itiokiet eken eyịri kiet.+ 17  Ekem enye anam itie aba ye duop emi ẹdisịnde ekọp ke mben ọfọn̄ tent kiet emi edide akpatre, onyụn̄ anam itie aba ye duop emi ẹdisịnde ekọp ke mben ọfọn̄ tent enye eken emi ẹdimende ẹkpaha.+ 18  Ndien enye ada okpoho anam ekọp aba ye duop emi ẹdidade ẹkpaha mme ọfọn̄ tent emi ẹyịri kiet man akabade edi kiet.+ 19  Ndien enye ada ikpa okukịm erọn̄ emi ẹsịnde uduot ẹnam eyịbe anam ufụkn̄kpọ ofụk tent onyụn̄ ada ikpa seal+ anam ufụkn̄kpọ ofụk ke enyọn̄ esie.+ 20  Ekem enye ada eto acacia+ anam obubọk tent utuakibuot, emi ẹdidade ẹwụk. 21  Uniọn̄ obubọk kiet ekedi cubit duop, ubom obubọk+ kiet okonyụn̄ edi cubit kiet ye ubak. 22  Obubọk kiet kiet enyene ukot iba emi ẹdide ukem. Ntem ke enye anam kpukpru obubọk tent utuakibuot emi.+ 23  Ntre enye anam obubọk tent utuakibuot emi, obubọk edịp ke n̄kan̄ emi esede Negeb, ke edem usụk.+ 24  Ndien enye ada silver anam etak obubọk aba emi ẹdiwụkde obubọk edịp, etak iba ke idak obubọk kiet emi enyenede ukot iba ye etak iba efen ke idak obubọk enye eken emi enyenede ukot iba.+ 25  Ndien enye anam obubọk edịp ọnọ tent utuakibuot emi ke n̄kan̄ eken, emi esede edem edere+ 26  ye etak aba emi ẹnamde ke silver, etak iba ke idak obubọk kiet ye etak iba efen ke idak obubọk enye eken.+ 27  Ndien enye anam obubọk itiokiet ke n̄kan̄ tent utuakibuot emi esede edem usoputịn.+ 28  Ndien enye anam obubọk iba nte inụk tent utuakibuot ke n̄kan̄ esie mbiba.+ 29  Ndien mmọ ẹdiana iba ke isọn̄ ẹnyụn̄ ẹdiana iba ntre ẹsịm enyọn̄ ke akpa itie emi ekara n̄kpọ odude. Ntem ke enye akanam mmọ mbiba, adaha inụk iba.+ 30  Ntre mmọ ẹdi obubọk itiaita ye etak efịtekiet emi ẹnamde ke silver, etak iba ke idak obubọk kiet ye etak iba efen ke idak obubọk enye eken.+ 31  Ndien enye ada eto acacia anam mbiọn̄ eto, anam ition ọnọ mme obubọk emi ẹdude ke n̄kan̄ kiet ke tent utuakibuot emi+ 32  onyụn̄ anam mbiọn̄ eto ition ọnọ mme obubọk emi ẹdude ke n̄kan̄ eken ke tent utuakibuot emi ndien anam mbiọn̄ eto ition ọnọ mme obubọk tent utuakibuot emi ẹdude ke n̄kan̄ emi esede edem usoputịn.+ 33  Ekem enye anam ibiọn̄ eto emi esịnede ke ufọt obubọk emi oto ke utịt kiet esịm utịt eken.+ 34  Ndien enye ada gold ofụk mme obubọk emi, onyụn̄ ada gold anam mme ekara n̄kpọ emi ẹdisịnde mbiọn̄ eto emi, onyụn̄ ada gold ofụk mbiọn̄ eto emi.+ 35  Ndien enye ada blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak anam ikpehe.+ Enye ọdọk mme cherub nte fansi adian ke ikpehe emi.+ 36  Ndien enye ada eto acacia anam adaha inan̄ onyụn̄ ada gold ofụk mmọ, ada gold anam ntok mmọ, onyụn̄ ada silver anam etak inan̄ ọnọ mmọ.+ 37  Ndien enye ada blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak anam ọfọn̄ enyịnusụn̄ tent, kpa utom ọdọk-ọfọn̄,+ 38  onyụn̄ anam adaha ition ye ntok mmọ. Ndien enye ada gold ofụk enyọn̄ ye ikek mmọ, edi ada okpoho anam etak ition ọnọ mmọ.+

Mme Ikọ Idakisọn̄