Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Exodus 30;1-38

30  “Ndien afo enyene ndinam itie ufọp incense;+ da eto acacia nam enye.  Uniọn̄ esie edidi cubit kiet, ubom esie edinyụn̄ edi cubit kiet, ukem ukem ke n̄kan̄ mbinan̄, nyụn̄ nam enye okon̄ ke cubit iba. Nam mme nnụk esie ẹwọrọ enye ke idem.+  Nyụn̄ da ata eti gold fụk enye, fụk enyọn̄ ye n̄kan̄ esie kanade ọkọrọ ye nnụk esie; nyụn̄ da gold nam mben esie kanade.+  Da gold n̄ko nam ekara n̄kpọ iba. Nam mmọ kpere mben enyọn̄ esie ke n̄kan̄ mbiba, emi ẹsakde iso ẹse kiet eken, nte itie eke ẹdisịnde nnyan eto emi ẹdidade ẹmen enye.+  Da eto acacia nam nnyan eto nyụn̄ da gold fụk mmọ.+  Nyụn̄ nịm enye ke iso ikpehe emi ekperede ekebe ntiense,+ ke iso okukịp emi okụbọde ke Ntiense, emi ndiwụtde fi idem do.+  “Ndien Aaron enyene ndifọp edifuọn̄ incense+ ke enyọn̄ itie emi.+ Enye edifọp incense emi kpukpru usenubọk, ke ini enye esịnde aran ke utuenikan̄.+  Ndien ke ini Aaron odomode mme utuenikan̄ ke mbubreyo,* enye ọyọfọp incense. Incense emi edidu kpukpru ini ke iso Jehovah ke ofụri emana mbufo.  Mbufo ẹkûfọp esen incense+ m̀mê edifọp uwa m̀mê uwa n̄kpasịp; ẹkûnyụn̄ ẹtọhọ edin̄wọn̄ uwa ke enye. 10  Ndien Aaron enyene ndisio isop ke mme nnụk itieuwa emi ini kiet ke isua.+ Enye enyene ndida ndusụk iyịp uwa usio-isop+ idiọkn̄kpọ nsio isop nnọ itieuwa emi ini kiet ke isua ke ofụri emana mbufo. Enye edi ata edisana n̄kpọ ọnọ Jehovah.” 11  Ndien Jehovah ọdọhọ Moses ete: 12  “Ini ekededi emi afo abatde nditọ Israel,+ ana owo mmọ kiet kiet ọnọ Jehovah n̄kpọ ndifak ukpọn̄ esie ke ini abatde mmọ,+ mbak ufen edisịm mmọ ke ini afo abatde mmọ.+ 13  Kpukpru owo emi ẹsan̄ade ẹbe man ẹbat mmọ ẹdinọ ubak shekel ke shekel edisana ebiet.+ Gerah edịp edi shekel kiet. Ubak shekel edi etịbe Jehovah.+ 14  Kpukpru owo emi ẹbede ẹdụk otu mbon emi ẹsịnde enyịn̄, ọtọn̄ọde ke owo isua edịp dọk, ẹnyene ndinọ Jehovah etịbe.+ 15  Yak mbon inyene ẹkûnọ awak akan ubak shekel, mme ubuene ẹkûnyụn̄ ẹnọ ekpri akan oro,+ man ẹnọ Jehovah etịbe emi ẹdidade ẹsio isop ukpọn̄ mbufo.+ 16  Nyụn̄ bọ nditọ Israel okụk silver eke ẹdade ẹsio isop nọ ẹda ẹnam utom tent usopidem,+ man emi edi n̄kpọ editi ke iso Jehovah ọnọ nditọ Israel, ndida nsio isop ukpọn̄ mbufo.” 17  Ndien Jehovah ọdọhọ Moses ete: 18  “Da okpoho nam besịn ye n̄kpọ udori besịn,+ nyụn̄ nịm enye ke ufọt tent usopidem ye itieuwa nyụn̄ sịn mmọn̄ ke esịt.+ 19  Ndien Aaron ye nditọiren esie ẹnyene ndida mmọn̄ do nyet ubọk ye ukot mmọ.+ 20  Mmọ ẹyeyere mmọn̄ mbak mmọ ẹdikpan̄a ke ini mmọ ẹdụkde tent usopidem, m̀mê ke ini mmọ ẹsan̄ade ẹkpere itieuwa ndinam utom nnyụn̄ mfọp uwa nnọ Jehovah.+ 21  Ndien mmọ ẹnyene ndiyet ubọk ye ukot mmọ mbak mmọ ẹdikpan̄a,+ emi edinyụn̄ edi ewụhọ ke nsinsi ọnọ mmọ, enye ye nditọ esie, ke ofụri emana mmọ.”+ 22  Ndien Jehovah ọdọhọ Moses ete: 23  “Da ata nti ufuọn̄n̄kpọ:+ mbabari myrrh+ shekel ikie ition, ye enem-utebe cinnamon+ ke ubak udomo oro, shekel ikie iba ye aba ye duop, ye enem-utebe calamus+ shekel ikie iba ye aba ye duop, 24  ye cassia+ shekel ikie ition ke shekel edisana ebiet,+ ye hin aran olive kiet.+ 25  Nyụn̄ da mmọ nam edisana aran oro ẹsidade ẹyet owo, edifuọn̄ aran, kpa mbuaha aran emi anam edifuọn̄ aran anamde.+ Enye edidi edisana aran oro ẹsidade ẹyet owo.+ 26  “Nyụn̄ da enye yet ke tent usopidem+ ye ke ekebe ntiense, 27  ye okpokoro ye kpukpru n̄kpoduoho esie ye uwụk utuenikan̄ ye n̄kpoduoho esie ye itieuwa ufọp incense, 28  ye itieuwa emi ẹsiwade edifọp uwa ye kpukpru n̄kpoduoho esie ye besịn ye n̄kpọ udori besịn. 29  Nyụn̄ nam mmọ ẹsana man mmọ ẹkabade ẹdi ata ndisana.+ Owo enyene ndidi edisana mbemiso otụkde mmọ.+ 30  Nyụn̄ yet Aaron+ ye nditọiren esie aran,+ nyụn̄ nam mmọ ẹsana man ẹkeme ndinam utom nte mme oku nnọ mi.+ 31  “Nyụn̄ dọhọ nditọ Israel ete, ‘Emi edidi edisana aran oro ẹsidade ẹyet owo ọnọ mi ke ofụri emana mbufo.+ 32  Owo inyeneke ndifiọn̄ọ enye ke idem, owo inyụn̄ inyeneke ndinam n̄kpọ eke etiede nte enye. Enye edi edisana n̄kpọ. Enye edidi edisana n̄kpọ ọnọ mbufo. 33  Owo ekededi eke anamde edifuọn̄ aran eke etiede ntem, onyụn̄ adade ubak ọfiọn̄ọ owo efen ekededi, yak ẹsịbe enye ẹfep ke otu orụk esie.’”+ 34  Ndien Jehovah ọdọhọ Moses ete: “Da mme ufuọn̄n̄kpọ emi:+ ufuọn̄n̄kpọ emi ẹdade ẹnam incense ye onycha ye edifuọn̄ galbanum ye ata eti frankincense.+ Mmọ kiet kiet ẹnyene ndidi ukem udomo. 35  Nyụn̄ nam enye akabade edi incense,+ mbuaha ufuọn̄n̄kpọ, nte emi anam edifuọn̄ aran anamde, ẹsịnde inụn̄,+ ẹnyụn̄ ẹnamde edi ata eti, edisana n̄kpọ. 36  Nyụn̄ tịm ndusụk enen̄ede ọdọrọ nyụn̄ diọk ndusụk ke iso Ntiense ke tent usopidem,+ emi ndiwụtde fi idem.+ Enye enyene ndidi ata edisana n̄kpọ nnọ mbufo. 37  Ndien incense emi afo edidade mme n̄kpọ emi anam, mbufo idinamke enye inọ idem mbufo.+ Mbufo ẹnyene ndida enye nte edisana n̄kpọ Jehovah.+ 38  Owo ekededi eke anamde n̄kpọ eke ebietde enye ete ikop inem utebe esie, yak ẹsịbe enye ẹfep+ ke otu orụk esie.”

Mme Ikọ Idakisọn̄

At. Ed., “ke ufọt mbubreyo iba.”