Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Exodus 22;1-31

22  “Edieke owo eyịpde ayara enan̄ m̀mê erọn̄ onyụn̄ owotde m̀mê anyamde enye, enye enyene ndinọ enan̄ ition ke usiene enan̄ oro ye erọn̄ inan̄ ke usiene erọn̄ oro.+  (“Edieke ẹkụtde inọ+ nte oyomde ndibụn̄ ufọk ndụk+ ndien owo amia enye owot, owo oro idinyeneke ubiomikpe iyịp.+  Edieke edide eyo ama an̄wan̄a, owo oro eyenyene ubiomikpe iyịp.) “Inọ oro okûtre ndinọ usiene n̄kpọ oro enye eyịpde. Edi edieke enye mînyeneke n̄kpọ, ana ẹnyam enye ke usiene n̄kpọ oro enye eyịpde.+  Edieke ẹkụtde n̄kpọ oro enye eyịpde ke ubọk esie ye uwem, edide ayara enan̄ m̀mê ass m̀mê erọn̄, enye enyene ndinọ usiene utịm ikaba.  “Edieke owo adade ufene aka ẹketa mbiet ke in̄wan̄ m̀mê ke in̄wan̄ vine onyụn̄ ayakde mmọ ẹbe ẹketa n̄kpọ ke in̄wan̄ owo efen, enye enyene ndida se ifọnde ikan ke in̄wan̄ esie m̀mê ke in̄wan̄ vine esie nnọ ke usiene.+  “Edieke ikan̄ asakde atara ebe akata eto n̄kukịm ye mme ebek wheat* m̀mê mme wheat eke ẹdade ke etak, m̀mê in̄wan̄,+ owo emi ekesịnde ikan̄ oro iditreke ndinọ usiene ke se ikan̄ akatade.  “Edieke owo ọnọde ekemmọ owo okụk m̀mê n̄kpọ ekededi ete enịm,+ ndien ẹyịp enye ke ufọk esie, ẹma ẹkụt inọ oro, enye enyene ndinọ usiene utịm ikaba.+  Edieke owo mîkwe inọ oro, ẹnyene ndida enyeneufọk oro n̄wọrọ ndi ke iso ata Abasi+ man ẹfiọk m̀mê enye ama otụk inyene ekemmọ owo.  Amaedi ikpe ubiatibet+ ekededi, edide aban̄a ayara enan̄, m̀mê ass, m̀mê erọn̄, m̀mê ọfọn̄, m̀mê n̄kpọ ekededi eke osopde, emi owo edidọhọde ete, ‘Se enye mi!’ ẹnyene ndida ikọ mmọ mbiba ndi ke iso ata Abasi.+ Owo emi Abasi obiomde ikpe enyene ndinọ ekemmọ owo usiene utịm ikaba.+ 10  “Edieke owo ọnọde ekemmọ owo ass m̀mê ayara enan̄ m̀mê erọn̄ m̀mê ufene ekededi ete ekpeme, ndien unam emi akpa mîdịghe obiomo ndo mîdịghe ẹmụm ke ini owo mîkwe, 11  yak enye ada un̄wọn̄ọ+ ke ufọt mmọ mbiba ke iso Jehovah nte ke ubọk imọ ikotụkke inyene ekemmọ owo;+ ndien andinyene eyenyịme, ndien owo enye eken idinọhọ usiene. 12  Edi edieke ẹkeyịpde-yịp, enye enyene ndinọ andinyene usiene.+ 13  Edieke edide unam ikọt akawai,+ enye enyene ndimen okpo esie ndiwụt.+ Enye inyeneke ndinọ usiene ke se unam ikọt akawaide. 14  “Edi edieke owo ọbọde ekemmọ owo+ ufene ke ebuọt, ndien enye obiomo ndo mîdịghe akpa ke adan̄aemi andinyene mîdụhe do, yak enye okûtre ndinọ usiene.+ 15  Edieke andinyene odude do, enye inyeneke ndinọ usiene. Edieke ẹkebọde ke ukpeokụk, okụk oro ẹkekpede ekem. 16  “Edieke erenowo atapde eyenan̄wan emi mîfiọkke erenowo mînyụn̄ idụkke ediomi ndọ kan̄a, onyụn̄ adan̄de enye,+ yak enye okûtre ndimen enye ndọ nnyụn̄ nnọ ekọmurua ndọ.+ 17  Edieke ete eyenan̄wan mînyịmeke ndimen eyen esie nnọ enye, enye enyene ndinọ okụk emi ẹsikpede ke ibuot eyenan̄wan emi mîfiọkke erenowo.+ 18  “Kûnịm n̄wan emi edide abiaidiọn̄ uwem.+ 19  “Ẹkûtre ndiwot owo ekededi eke adan̄de unam.+ 20  “Ẹnyene ndiwot owo eke awade uwa ọnọ abasi ekededi ke mîbọhọke Jehovah ikpọn̄.+ 21  “Kûfiomo esenowo, kûnyụn̄ ufịk enye,+ koro mbufo ẹkedide isenowo ke isọn̄ Egypt.+ 22  “Ẹkûtụhọde ebeakpa m̀mê eyenakpa.+ 23  Edieke afo edededei otụhọde enye, ndien edieke enye esemede okot mi, nditreke ndikop eseme+ esie; 24  ndien iyatesịt mi oyobụbede asak,+ nyonyụn̄ n̄wot fi ke akan̄kan̄, ndien iban mbufo ẹyekabade ẹdi mme ebeakpa, nditọiren mbufo ẹyenyụn̄ ẹkabade ẹdi nditọakpa.+ 25  “Edieke afo ọnọde owo ke otu ikọt mi, kpa owo ukụt emi odude ye afo,+ okụk ke ebuọt, kûnam nte owo eke ọnọde ebuọt oyom akwa udori. Kûbọ enye udori.+ 26  “Edieke afo ọbọde ekemmọ owo ọfọn̄ ke ubiọn̄,+ afo enyene ndifiak nda nsọk enye mbemiso utịn osopde. 27  Koro emi edide n̄kukụre ọfọn̄ esie.+ Enye edi ọfọn̄ eke enye adade ofụk ikpọkidem esie. Enye edisịne nso isụhọde ina? Ndien ama ekem ke ini enye esemede okot mi, nditreke ndikop, koro mfọnde ido.+ 28  “Kûsụn̄i Abasi,+ kûnyụn̄ usụn̄i ọbọn̄ ke otu mbufo.+ 29  “Kûnọ ofụri mbun̄wụm fo ye se iyọhọde ọtọ udịghi wine fo iduọhọ, mmen̄e mmen̄e.+ Afo enyene ndida akpan fo nnọ mi.+ 30  Ntem ke afo edinam ye ayara enan̄ fo ye erọn̄ fo:+ Enye oyodu ye eka esie ke usen itiaba.+ Ke ọyọhọ usen itiaita, afo enyene ndida enye nnọ mi. 31  “Mbufo ẹnyụn̄ ẹdi ndisana ikọt mi;+ ẹkûta unam eke unam efen awaide ke ikọt.+ Ẹtop enye ẹnọ mme ebua.+

Mme Ikọ Idakisọn̄

Mîdịghe, emi ekeme ndidi “barley.”