Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Esther 9;1-32

9  Ndien ke ọyọhọ ọfiọn̄ duopeba, oro edi, ọfiọn̄ Adar,+ ke ọyọhọ usen duopeta ke ọfiọn̄ oro, ke esịmde ini eke ẹkpenamde+ uyo ye ibet edidem, ke usen eke mme asua mme Jew ẹketiede ẹbet ndikara mmọ, n̄kpọ okpụhọde, mme Jew ẹdikabade ẹkara mmọ emi ẹsuade mmọ.+  Mme Jew ẹsop idem+ ke mme obio mmọ ke ofụri ikpehe obio ukara Edidem Ahasuerus+ man ẹn̄wana ye mbon oro ẹyomde ndinam mmọ idiọk,+ ndien baba owo kiet ikemeke ndida mmọ ke iso, koro ndịk+ mmọ anamde kpukpru mme idụt.  Ndien kpukpru mbọn̄+ ke mme ikpehe obio ukara ye mme satrap+ ye mme andikara ye mmọ eke ẹnamde n̄kpọ+ edidem ẹn̄wam mme Jew, koro ndịk+ Mordecai anamde mmọ.  Koro Mordecai okponde+ ke ufọk edidem, etop+ esie onyụn̄ asuanade ke ofụri ikpehe obio ukara oro, koro Mordecai ọkọdiọn̄de-diọn̄ okpon.+  Ndien mme Jew ẹsobo kpukpru mme asua mmọ ke akan̄kan̄,+ ẹwot ẹnyụn̄ ẹsọhi mmọ ẹfep, mmọ ẹnyụn̄ ẹnam mme asua mmọ nte mmọ ẹmade.+  Ndien ke akwa ufọk ubọn̄ Shushan+ mme Jew ẹwot ẹnyụn̄ ẹsobo owo ikie ition.  Mmọ ẹnyụn̄ ẹwot Parshandatha ye Dalphon ye Aspatha  ye Poratha ye Adalia ye Aridatha  ye Parmashta ye Arisai ye Aridai ye Vaizatha, 10  kpa nditọiren+ duop emi Haman,+ eyen Hammedatha, asua mme Jew,+ ekenyenede; edi mmọ ikadaha ubọk mmọ itụk n̄kpọ mbụme.+ 11  Ke usen oro, ẹda ibat mbon oro ẹwotde ke akwa ufọk ubọn̄ Shushan ẹdi ke iso edidem. 12  Ndien edidem ọdọhọ Esther ọbọn̄ an̄wan+ ete: “Mme Jew ẹmewot ẹnyụn̄ ẹsobo owo ikie ition ke akwa ufọk ubọn̄+ Shushan ye nditọiren Haman duop. Nso ke mmọ ẹkenam+ ke mme ikpehe eken ke obio ukara+ edidem? Afo ekpe ubọk oyom nso? Ẹyenọ fi.+ Nso efen ke afo onyụn̄ eben̄e?+ Ẹyenam ẹnọ fi.” 13  Ntem Esther ọdọhọ ete: “Edieke ọfọnde edidem ke enyịn,+ yak ẹnyịme n̄ko mme Jew emi ẹdude ke Shushan ẹnam n̄kpọn̄ emi edisierede se ibet ọdọhọde ẹnam mfịn emi;+ yak ẹnyụn̄ ẹyịri nditọ Haman duop ke eto.”+ 14  Ntem edidem ọdọhọ ẹte ẹnam ntre.+ Ekem ẹtan̄a ibet ke Shushan, ẹnyụn̄ ẹyịri nditọiren Haman duop. 15  Ndien mme Jew emi ẹdude ke Shushan ẹsop idem ke ọyọhọ usen duopenan̄+ ke ọfiọn̄ Adar, mmọ ẹnyụn̄ ẹwot owo ikie ita ke Shushan; edi mmọ ikadaha ubọk mmọ itụk n̄kpọ mbụme.+ 16  Ndien mme Jew eken emi ẹdude ke mme ikpehe obio ukara+ edidem ẹsop idem ẹnyụn̄ ẹn̄wana ẹban̄a ukpọn̄+ mmọ, ẹnyụn̄ ẹsio usiene+ ye mme asua mmọ ẹnyụn̄ ẹwot owo tọsịn ata ye efịt ke otu mme asua mmọ; edi mmọ ikadaha ubọk mmọ itụk n̄kpọ mbụme, 17  ke ọyọhọ usen duopeta ke ọfiọn̄ Adar; nduọkodudu onyụn̄ odu ke ọyọhọ usen duopenan̄ ẹnyụn̄ ẹnịm usen emi ke usen akamba usọrọ+ ye idara.+ 18  Ndien mme Jew emi ẹdude ke Shushan ẹsop idem ke ọyọhọ usen duopeta+ ye ke ọyọhọ usen duopenan̄, nduọkodudu onyụn̄ odu ke ọyọhọ usen efịt, ẹnyụn̄ ẹnịm usen emi ke usen akamba usọrọ ye idara.+ 19  Ntak edi oro mme Jew emi ẹdụn̄de ke n̄kpri obio emi ẹdude ke edem akwa obio, ẹnịmde ọyọhọ usen duopenan̄ ke ọfiọn̄ Adar+ nte usen idara+ ye usen akamba usọrọ ye usen inemesịt+ ye usen unọ kiet eken enọ.+ 20  Ndien Mordecai+ ewet mme n̄kpọ emi onyụn̄ ọnọ n̄wed emi ẹsọk kpukpru mme Jew emi ẹdude ke ofụri ikpehe obio ukara+ Edidem Ahasuerus, mmọ emi ẹdude ẹkpere ye mmọ emi ẹdude nsannsan, 21  ete ẹwụk mmọ ẹsinịm+ ọyọhọ usen duopenan̄ ye ọyọhọ usen efịt ke ọfiọn̄ Adar kpukpru isua, 22  nte ekemde ye usen emi mme Jew ẹkebọhọde mme asua+ mmọ, ye ọfiọn̄ emi mfụhọ akakabarede idara, usen ntuan̄a+ okonyụn̄ akabarede usen inemesịt, ete ẹnịm mmọ ke usen akamba usọrọ ye idara ye usen eke ẹnọde kiet eken+ enọ ẹnyụn̄ ẹnọde mme ubuene+ n̄kpọ. 23  Ndien mme Jew ẹnyịme ndinam se mmọ ẹma ẹketọtọn̄ọ ye se Mordecai ama ekewewet ọnọ mmọ. 24  Koro Haman,+ eyen Hammedatha+ Agagite,+ emi akasuade+ kpukpru mme Jew, akaduakde ndisobo mme Jew,+ okonyụn̄ esịnde Pur,+ oro edi, Afia,+ nditịmede nnyụn̄ nsobo mmọ. 25  Edi ke ini Esther odụkde edi ke iso edidem, edidem owụk ewụhọ emi ẹwetde ke n̄wed+ ẹte: “Yak idiọk uduak+ oro enye akaduakde aban̄a mme Jew afiak odoro enye ke ibuot”;+ ndien mmọ ẹyịri enye ye nditọiren esie ke eto.+ 26  Ntak edi oro mmọ ẹkotde mme usen emi Purim, ke enyịn̄ Pur.+ Mmọdo, nte ekemde ye kpukpru ikọ leta+ emi, ye se mmọ ẹkekụtde ẹban̄a emi, ye se ikọwọrọde mmọ, 27  mme Jew ẹwụk ẹnyụn̄ ẹnyịme ẹnọ idemmọ ye nditọ mmọ ye kpukpru mmọ eke ẹdiande idem ye mmọ,+ ẹte mmimọ iditreke ndisinịm usen mbiba emi, nte ekemde ye se ẹkewetde ẹban̄a mmọ, nte onyụn̄ ekemde ye ini emi ẹmekde ndinịm mmọ kpukpru isua. 28  Ndien ẹkenyene nditi mme usen emi nnyụn̄ nnịm mmọ ke kpukpru emana, ye ke kpukpru ubon, ye ke ikpehe obio ukara kiet kiet, ye ke obio kiet kiet, ndien mme usen Purim emi ikpenyeneke ndibe mfep ke otu mme Jew, nditọ mmọ ikponyụn̄ itreke nditi+ mmọ. 29  Ndien Esther ọbọn̄ an̄wan, eyen Abihail,+ ye Mordecai eyen Jew ẹwet n̄wed ye ofụri nsọn̄uyo ndisọn̄ọ udiana leta emi aban̄ade Purim. 30  Ndien enye ọnọ n̄wed ẹsọk kpukpru mme Jew ke ikpehe obio ukara+ ikie ye edịp ye itiaba, emi Ahasuerus+ akarade, ke ikọ emem ye akpanikọ,+ 31  ndisọn̄ọ mme usen Purim emi ke ekemini mmọ, kpa nte Mordecai eyen Jew ye Esther ọbọn̄ an̄wan ẹkewụkde mmọ,+ nte mmọ ẹkenyụn̄ ẹwụkde ukpọn̄ mmọ ye nditọ mmọ,+ ke ikọ utreudia+ mmọ ye eke eseme mmọ kaban̄a un̄wam.+ 32  Ndien uyo Esther ọsọn̄ọ ikọ Purim+ emi, ẹnyụn̄ ẹwet enye ẹsịn ke n̄wed.

Mme Ikọ Idakisọn̄