Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Esther 2;1-23

2  Ke mme n̄kpọ emi ẹma ẹkebe, ke esịt ama okonyụn̄ osụhọ Edidem Ahasuerus,+ enye eti Vashti+ ye se enye akanamde+ ye se ẹkebierede ndinam enye.+  Ndien ikọt edidem, kpa mme asan̄autom+ esie, ẹdọhọ ẹte: “Yak ẹyom+ nditọiban eke ẹyede uyai etieti, mînyụn̄ ifiọkke erenowo,+ ẹnọ edidem,  yak edidem onyụn̄ emek mme isụn̄utom ke ofụri ikpehe obio ukara+ esie, ndien yak mmọ ẹtan̄ kpukpru nditọiban eke ẹyede uyai etieti, mînyụn̄ ifiọkke erenowo, ẹbon ọtọkiet ke akwa ufọk ubọn̄ Shushan, ke ufọk iban emi esịnede Hegai+ ke ubọk, kpa eunuch+ edidem, emi edide andikpeme iban, yak ẹnyụn̄ ẹnuak mmọ idem.  Ndien eyenan̄wan eke ediyede edidem ke enyịn eyedi ọbọn̄ an̄wan ke itie Vashti.”+ Ndien n̄kpọ emi enem edidem, enye onyụn̄ anam ntre.  Ndien eren kiet emi edide eyen Jew ama odu ke akwa ufọk ubọn̄ Shushan,+ ndien enye ekekere Mordecai,+ eyen Jair, eyen Shimei, eyen Kish, eyen Benjamin,+  emi ẹkemụmde ke Jerusalem ye mbon oro ẹkebịnde ẹsion̄o emi ẹkedade ẹka ntan̄mfep+ ọkọrọ ye Jeconiah+ edidem Judah emi Nebuchadnezzar+ edidem Babylon akadade aka ntan̄mfep.  Ndien enye ekedi andibọk+ Hadassah, oro edi, Esther, eyen eyeneka ete+ esie, koro enye mîkenyeneke ete ye eka; ndien eyenan̄wan emi ama eye idem onyụn̄ eye iso,+ ndien ke ini ete ye eka esie ẹkpade, Mordecai ada enye nte eyen esie.  Edikem ke ini ẹkopde ikọ ye ibet edidem, ye ke ini ẹtan̄de ediwak nditọiban ẹkebon ọtọkiet ke akwa ufọk ubọn̄ Shushan,+ ke idak Hegai,+ ẹda Esther ẹka ufọk edidem ẹkesịn Hegai, andikpeme iban, ke ubọk.  Ndien eyenan̄wan oro eye enye ke enyịn, enye onyụn̄ owụt enye ima-mfọnido+ ndien enye ọsọsọp anam ẹnuak+ enye idem onyụn̄ ọnọ enye san̄asan̄a udia, onyụn̄ ọnọ enye nditọiban itiaba emi ẹmekde ẹto ufọk edidem, ndien enye osio Esther ye nditọiban esie aka mfọnn̄kan itie ke ufọk iban. 10  Esther iketịn̄ke iban̄a orụk+ esie m̀mê iman esie, koro Mordecai ama owụk enye ete okûtịn̄.+ 11  Ndien kpukpru usen Mordecai asan̄a ke iso okụre ufọk iban ebe man ọfiọk nte n̄kpọ etiede ye Esther ye nte ẹnamde n̄kpọ ye enye. 12  Ndien ke adan̄aemi ini ekemde nditọiban kiet kiet ndidụk n̄ka iso Edidem Ahasuerus ke mmọ ẹma ẹketie ọfiọn̄ duopeba nte ekemde ye ewụhọ iban, koro ntem ke ndutịm unuak idem ekesisan̄a esịm utịt, ẹkama aran myrrh+ ke ọfiọn̄ itiokiet, ẹnyụn̄ ẹkama aran+ balsam ye n̄kpọ unuak idem ke ọfiọn̄ itiokiet; 13  edi ke ẹma ẹkenam mme n̄kpọ emi ke eyenan̄wan ekekeme ndidụk n̄ka iso edidem. Kpukpru se enye eben̄ede ke ẹnọ enye man enye ada oto ufọk iban odụk ufọk edidem.+ 14  Enye odụk ke mbubreyo onyụn̄ ọwọrọ ke usenubọk aka udiana ufọk iban emi esịnede ke ubọk Shaashgaz, kpa eunuch+ edidem, andikpeme iban esa. Enye idụkke aba ika iso edidem ibọhọke edidem ama enye onyụn̄ okot enye ke enyịn̄.+ 15  Ndien ke adan̄aemi esịmde ini Esther eyen Abihail eyeneka ete Mordecai, emi enye akadade nte eyen+ esiemmọ, ndidụk n̄ka iso edidem, enye ikeben̄eke baba n̄kpọ kiet,+ ke mîbọhọke se Hegai,+ eunuch edidem, andikpeme iban, akasiakde (ndien ke ofụri ini emi Esther ọdọdiọn̄ okụt mfọn ke iso kpukpru owo emi ẹkụtde enye).+ 16  Ekem ẹda Esther ẹdụk ẹka iso Edidem Ahasuerus ke ufọk ubọn̄ esie ke ọyọhọ ọfiọn̄ duop, oro edi, ke ọfiọn̄ Tebeth, ke ọyọhọ isua+ itiaba emi enye akarade. 17  Ndien edidem ama Esther akan kpukpru iban eken, tutu owụt enye mfọn ye ima-mfọnido akan kpukpru nditọiban eken emi mîfiọkke erenowo.+ Ndien edidem ayara enye anyanya ubọn̄ ke ibuot onyụn̄ anam enye edi ọbọn̄ an̄wan+ ke itie Vashti. 18  Ndien edidem anam akamba usọrọ ọnọ kpukpru mbọn̄ esie ye mme asan̄autom esie, kpa akamba usọrọ Esther; enye onyụn̄ ọnọ mme owo ifụre+ ke mme ikpehe obio ukara, onyụn̄ ọnọ enọ nte inyene edidem edide. 19  Ndien ke ini ẹtọn̄ọde ntak ẹtan̄ nditọiban eke mîfiọkke erenowo+ ẹbon ọtọkiet, Mordecai eketie ke inuaotop+ edidem. 20  Esther iketịn̄ke iban̄a iman esie ye orụk+ esie, kpa nte Mordecai+ okowụkde enye;+ Esther okonyụn̄ anam uyo Mordecai, kpa nte enye ekesinamde ke ini Mordecai ọkọbọkde enye.+ 21  Ke mme usen oro nte Mordecai etiede ke inuaotop edidem, Bigthan ye Teresh, mme adaidaha iba ke okụre edidem, kpa mme ekpeme-usụn̄, ẹyat esịt ẹnyụn̄ ẹyom usụn̄ ndiwot+ Edidem Ahasuerus. 22  Ndien Mordecai edifiọk n̄kpọ emi, onyụn̄ ọsọsọp emen etịn̄+ ọnọ Esther ọbọn̄ an̄wan. Ndien Esther emen etịn̄ ọnọ edidem ke enyịn̄ Mordecai.+ 23  Ntre ẹdụn̄ọde n̄kpọ oro ẹkụt, ẹnyụn̄ ẹyịri+ mmọ mbiba ke eto+ ẹwot; ekem ẹwet n̄kpọ emi ẹsịn ke n̄wed n̄kpọntịbe+ eyo oro ke iso edidem.

Mme Ikọ Idakisọn̄