Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Esther 1;1-22

1  Edikem ke eyo Ahasuerus,+ oro edi, Ahasuerus emi akakarade nte edidem ke ikpehe obio ukara+ ikie ye edịp ye itiaba ọtọn̄ọde ke India tutu esịm Ethiopia,  ke eyo oro, nte Edidem Ahasuerus etiede ke ebekpo ubọn̄+ esie, emi okodude ke akwa ufọk ubọn̄ Shushan,+  ke ọyọhọ isua ita emi enye akarade, enye anam akamba usọrọ+ ọnọ kpukpru mbọn̄ esie ye mme asan̄autom esie, mme etubom udịmekọn̄ Persia+ ye Media,+ ikpọ owo+ ye mbọn̄ ikpehe obio ukara esie ẹnyụn̄ ẹdu ye enye,+  ke ini enye owụtde inyene+ akwa ubọn̄ esie ye ukpono+ ye uyai ubom esie, ke ediwak usen, kpa usen ikie ye anan̄.  Ndien ke ini mme usen emi ẹkụrede, edidem anam akamba usọrọ ke usen itiaba ọnọ kpukpru owo oro ẹdude ke akwa ufọk ubọn̄ Shushan, ikpọ ye n̄kpri, ke okụre in̄wan̄esa ufọk edidem.  Ọfọn̄ ikpehe emi edide linen, ọfọn̄ eti mfriukịm ye blu blu+ ọfọn̄ emi ẹyịride ke urụk eti ọfọn̄ ẹma ẹdu, ọkọrọ ye urụk idet erọn̄ emi enyenede uduot mmọn̄ibọn̄+ emi ẹdọn̄de ke mme ekara n̄kpọ oro ẹnamde ke silver ye mme adaha marble, n̄kpana+ gold ye silver emi ẹdude ke enyọn̄ mbot itiat porphyry ye marble ye pearl ye obubịt marble.  Ndien ẹnọ mme owo wine ẹn̄wọn̄ ke cup+ gold; mme cup emi ẹnyụn̄ ẹdi nsio nsio, wine+ ufọk ubọn̄ onyụn̄ odu barasuene, nte inyene edidem edide.  Ke ini oro, owo ikenyịkke-nyịk owo ndin̄wọn̄ n̄kpọ nte ibet eketemede, koro ntem ke edidem okowụk kpukpru ikpọ owo ufọk esie, ete owo kiet kiet anam nte enye amade.  Vashti+ ọbọn̄ an̄wan n̄ko anam akamba usọrọ ọnọ iban ke ufọk ubọn̄ Edidem Ahasuerus. 10  Ke ọyọhọ usen itiaba, ke ini wine anamde esịt adat edidem,+ enye ọdọhọ Mehuman, Biztha, Harbona,+ Bigtha ye Abagtha, Zethar ye Carkas, kpa owo itiaba emi ẹdide mme adaidaha ke okụre ẹnyụn̄ ẹsan̄ade utom+ ẹnọ Edidem Ahasuerus, 11  ete ẹda Vashti ọbọn̄ an̄wan edi ke iso edidem, enye onyụn̄ ayara anyanya ubọn̄, man ẹwụt kpukpru owo ye mbọn̄ uyai esie; koro enye ama eye etieti.+ 12  Edi Vashti ọbọn̄ an̄wan esịn+ ndiyere ikot oro edidem ọkọdọn̄de mme adaidaha ke okụre esie ete ẹkekot enye ẹdi. Ntem edidem ayat esịt etieti, esịt onyụn̄ enen̄ede ofụt enye.+ 13  Ndien edidem ọdọhọ mbon ọniọn̄+ emi ẹfiọkde mme ini+ (koro ntem ke ẹkesida ikọ edidem ẹdi ke iso kpukpru mmọ eke ẹtịmde ẹfiọk ibet ye ikpe, 14  ndien mbon oro ẹkperede enye idem ẹkan ẹkedi Carshena, Shethar, Admatha,Tarshish, Meres, Marsena, ye Memucan, kpa mbọn̄ itiaba+ eke Persia ye Media, emi ẹsikụtde edidem iso,+ ẹnyụn̄ ẹtiede ke akpa itie ke obio ubọn̄ oro) ete: 15  “Nte ibet etemede, nso ke ẹdinam Vashti ọbọn̄ an̄wan ke emi enye esịnde ndinam uyo emi Edidem Ahasuerus ọkọnọde mme adaidaha ke okụre esie ete ẹkesian enye?” 16  Ntem, Memucan+ ọdọhọ ke iso edidem ye mbọn̄ ete: “Idịghe edidem kpọt ke Vashti ọbọn̄ an̄wan edue,+ edi enye edue kpukpru mbọn̄ ye kpukpru owo emi ẹdude ke ofụri ikpehe obio ukara Edidem Ahasuerus. 17  Koro se ọbọn̄ an̄wan anamde emi ayasuana esịm kpukpru ibanndọ ndien mmọ ẹyese mme andinyene+ mmọ ke ndek,+ ẹnyụn̄ ẹdọhọ ẹte, ‘Edidem Ahasuerus ke idemesie akam ọdọhọ ẹda Vashti ọbọn̄ an̄wan ẹdi ke iso imọ, edi enye esịn ndika.’ 18  Ntem ke iban mbọn̄ Persia ye Media, emi ẹkopde se ọbọn̄ an̄wan akanamde, ẹdidọhọ kpukpru mbọn̄ edidem mfịn emi, ndien emiom ye iyatesịt oyokpon.+ 19  Edieke ọfọnde edidem ke enyịn,+ yak edidem ọnọ uyo, yak ẹnyụn̄ ẹwet uyo emi ẹsịn ke otu mme ibet+ Persia ye Media, man enye okûbe efep,+ ete yak Vashti okûdi aba iso Edidem Ahasuerus; yak edidem onyụn̄ emen itie esie nte ọbọn̄ an̄wan ọnọ n̄wan efen, kpa n̄wan eke ọfọnde akan enye. 20  Ndien ẹyekop ewụhọ edidem emi enye ediwụkde ke kpukpru ikpehe obio ukara esie (koro enye okponde), ndien kpukpru iban ẹyekpono+ mme andinyene+ mmọ, n̄kpri ye ikpọ.” 21  Ndien n̄kpọ oro enem edidem+ ye mbọn̄ esie, edidem onyụn̄ anam ke uyo Memucan. 22  Ndien enye ewet n̄wed+ ọnọ ẹsọk kpukpru ikpehe obio ukara+ edidem ke ido uwetn̄kpọ obio mmọ, onyụn̄ ọnọ obio kiet kiet ke usem mmọ, ete kpukpru mme ebe ẹsụk ẹdi mbọn̄ ke ufọk+ mmọ, ẹnyụn̄ ẹtịn̄ ikọ ke usem mbio obio mmọ.

Mme Ikọ Idakisọn̄