Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Deuteronomy 5;1-33

5  Ndien Moses okot ofụri Israel+ onyụn̄ ọdọhọ mmọ ete: “O Israel, ẹkop mme ewụhọ ye mme ubiereikpe+ emi ntịn̄de nsịn mbufo ke utọn̄ mfịn emi, mbufo ẹnyụn̄ ẹkpep mmọ ẹnyụn̄ ẹtịm ẹkpeme ndinam mmọ.+  Jehovah Abasi nnyịn ama anam ediomi ye nnyịn ke Horeb.+  Idịghe ye mme ete ete nnyịn ke Jehovah akanam ediomi emi, edi akanam ye nnyịn, kpukpru nnyịn emi idude uwem mfịn emi.  Jehovah ama etịn̄ ikọ ke obot ke ufọt ikan̄ ye mbufo iso ye iso.+  N̄kada ke ufọt mbufo ye Jehovah ke ini oro+ man mmen uyo Jehovah ntịn̄ nnọ mbufo, (koro mbufo ẹkekopde ndịk ke ntak ikan̄ oro inyụn̄ idọkke obot oro,)+ nte,  “‘Ami ndi Jehovah Abasi fo,+ emi okosiode fi ke isọn̄ Egypt, ke ufọk ufụn.+  Kûnyene abasi efen ukọrọ ye ami.+  “‘Kûnam edisọi mbiet unọ idemfo,+ mbiet+ n̄kpọ ekededi eke odude ke heaven ke enyọn̄ m̀mê eke odude ke isọn̄ ke idak m̀mê eke odude ke mmọn̄ ke idak isọn̄.  Kûnụhọ unọ mmọ, kûnyụn̄ uyak ẹnam fi anam n̄kpọ mmọ,+ koro ami Jehovah Abasi fo ndi Abasi emi oyomde san̄asan̄a utuakibuot,+ nda ndudue mme ete ndori nditọ ke idem, nda ndori ọyọhọ emana ita ye ọyọhọ emana inan̄, eke ẹsuade mi;+ 10  edi mfọn ido ye ediwak tọsịn emana mmọ eke ẹmade mi ẹnyụn̄ ẹnịmde mme ewụhọ+ mi. 11  “‘Kûtomo enyịn̄ Jehovah Abasi fo ke usụn̄ eke mîdotke,+ koro Jehovah mîdiyakke anditomo enyịn̄ esie ke usụn̄ eke mîdotke ọbọhọ ufen.+ 12  “‘Nịm usen sabbath ke edisana, kpa nte Jehovah Abasi fo okowụkde fi,+ 13  nam n̄kpọ nyụn̄ nam ofụri utom fo ke usen itiokiet.+ 14  Edi ọyọhọ usen itiaba edi sabbath Jehovah Abasi fo.+ Kûnam baba utom kiet ke esịt,+ edide afo m̀mê eyeneren fo m̀mê eyenan̄wan fo m̀mê ofụn eren fo m̀mê ofụn an̄wan fo m̀mê ayara enan̄ fo m̀mê ass fo m̀mê ufene fo ekededi m̀mê esenowo emi odude ke obio fo,+ man ofụn eren fo ye ofụn an̄wan fo ẹkpeduọk odudu kpa nte afo ọduọkde.+ 15  Nyụn̄ ti ete ke afo ekedi ofụn ke isọn̄ Egypt+ ndien Jehovah Abasi fo ada ọkpọsọn̄ ubọk ye edinyanade ubọk osio fi do.+ Ntak edi oro Jehovah Abasi fo owụkde fi ete enịm usen sabbath.+ 16  “‘Kpono usọ ye uka,+ kpa nte Jehovah Abasi fo okowụkde fi; man usen fo ekpebịghi, okponyụn̄ ọfọn ye afo+ ke isọn̄ oro Jehovah Abasi fo ọnọde fi. 17  “‘Kûwot owo.+ 18  “‘Kûsịn efịbe.+ 19  “‘Kûyịp inọ.+ 20  “‘Kûtie ntiense nsu uban̄a ekemmọ owo.+ 21  “‘Kûyom n̄wan ekemmọ owo.+ Kûnyụn̄ udiọk itọn̄ uyom ufọk ekemmọ owo, m̀mê in̄wan̄ esie m̀mê ofụn eren esie m̀mê ofụn an̄wan esie m̀mê ayara enan̄ esie m̀mê ass esie m̀mê n̄kpọ ekededi eke enyenede ekemmọ owo.’+ 22  “Mme Ikọ emi ke Jehovah eketịn̄ ọnọ ofụri esop mbufo ke obot oro ke ufọt ikan̄,+ ke obubịt enyọn̄ ye ọkpọsọn̄ ekịm, ke ọkpọsọn̄ uyo, ikonyụn̄ itịn̄ke baba n̄kpọ kiet idian; ekem enye ewet mmọ ke itiatn̄wed iba ayak mmọ ọnọ mi.+ 23  “Ndien edikem ke ndondo oro mbufo ẹkopde nte uyo ọwọrọde ke ufọt ekịm oro, ke adan̄aemi ikan̄ okosụk asakde ke obot oro,+ mbufo ẹsan̄a ẹkpere mi, kpukpru mme etubom ke esien mbufo ye mbiowo mbufo. 24  Ndien mbufo ẹdọhọ ẹte, ‘Sese, Jehovah Abasi nnyịn omowụt nnyịn ubọn̄ esie ye akwa ubom esie, nnyịn imonyụn̄ ikop uyo esie ke ufọt ikan̄.+ Mfịn emi nnyịn imokụt ke Abasi ekeme nditịn̄ ikọ ye owo ndien owo oro osụk odu uwem.+ 25  Ndien ke emi ntak emi nnyịn ikpakpan̄ade, koro akwa ikan̄ emi ekemede ndita nnyịn?+ Edieke nnyịn ifiakde ikop uyo Jehovah Abasi nnyịn, nnyịn iditreke ndikpan̄a.+ 26  Koro anie odu ke otu kpukpru owo emi okopde uyo odu-uwem Abasi+ nte etịn̄de ikọ ke ufọt ikan̄ kpa nte nnyịn ikokopde, ndien enye osụk odu uwem? 27  Afo san̄a kpere nyụn̄ kop kpukpru se Jehovah Abasi nnyịn edidọhọde; ndien afo eyemen kpukpru se Jehovah Abasi nnyịn edidọhọde fi editịn̄ ọnọ nnyịn,+ ndien nnyịn iyokop inyụn̄ inam.’ 28  “Ntre Jehovah okop ikọ mbufo ke ini mbufo ẹkenyenede nneme ye ami, Jehovah onyụn̄ ọdọhọ mi ete, ‘Mmokop se mbio emi ẹdọhọde, emi mmọ ẹtịn̄de ye afo. Se mmọ ẹdọhọde ọfọn.+ 29  Mmọ ẹkpekam ẹnam* esịt mmọ abak mi+ ẹnyụn̄ ẹnịm kpukpru mme ewụhọ mi+ kpukpru ini, man ọkpọfọn ye mmọ ye nditọ mmọ ke nsinsi!+ 30  Ka kọdọhọ mmọ ete: “Ẹfiak ẹnyọn̄ọ ke mme tent mbufo.” 31  Edi afo da mi ye ami, ndien nyemen kpukpru ibet ye mme ewụhọ ye mme ubiereikpe emi afo edikpepde mmọ ntịn̄ nnọ fi,+ emi mmọ ẹdinyụn̄ ẹnamde ke isọn̄ oro nnọde mmọ ẹda ẹnyene.’ 32  Ndien mbufo ẹkpeme man ẹnam kpa nte Jehovah Abasi mbufo owụkde mbufo ete ẹnam.+ Mbufo ẹkûwọn̄ọde ẹka nnasia m̀mê ufien.+ 33  Mbufo ẹsan̄a ke kpukpru usụn̄ oro Jehovah Abasi mbufo etemede mbufo,+ man mbufo ẹkpedu uwem, okponyụn̄ ọfọn ye mbufo,+ mbufo ẹkpenyụn̄ ẹdu uwem ẹbịghi ke isọn̄ emi mbufo ẹdidade ẹnyene.

Mme Ikọ Idakisọn̄

At. Ed., “ẹkọri.”