Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Deuteronomy 19;1-21

19  “Ke ini Jehovah Abasi fo edisịbede mme idụt+ emi Jehovah Abasi fo ọnọde fi isọn̄ mmọ efep, afo edinyụn̄ ọbọde mmọ itie onyụn̄ odụn̄ ke mme obio mmọ ye ke mme ufọk mmọ,+  afo ayadian̄ade obio ita enịm ọnọ idemfo ke isọn̄ fo emi Jehovah Abasi fo ọnọde fi ete ada enyene.+  Afo ọyọdiọn̄ usụn̄ ọnọ idemfo, onyụn̄ abahade isọn̄ fo emi Jehovah Abasi fo ọnọde fi ete ada enyene ke mbak ita, ndien emi edidi ebiet eke owotowo ekededi edifehede aka.+  “Ndien emi edi ikọ emi aban̄ade owotowo eke edifehede aka do man odu uwem: Ke ini enye owotde ekemmọ owo ke ndudue, mîkonyụn̄ isuaha enye ke mbemiso;+  m̀mê ke ini enye etienede ekemmọ owo odụk akai ndikpi eto, ndien ke ini enye emenerede ekụri ete ikpi eto, ukwak otorode ọwọrọ ke ito,+ onyụn̄ ọtọ owo oro owot, yak enye efehe aka kiet ke otu mme obio emi, man enye odu uwem.+  Mîdịghe ntre, osio-usiene+ iyịp ekeme ndibịne owotowo oro, koro esịt ofiopde enye, nnyụn̄ nsịm enye, sia usụn̄ oyomde; ndien enye ekeme ndiwot enye,* ke adan̄aemi owo mîkebiereke ikpe n̄kpa+ inọ enye, koro enye mîkasuaha enye ke mbemiso.  Ntak edi oro n̄wụkde fi nte, ‘Dian̄ade obio ita nịm nọ idemfo.’+  “Ndien edieke Jehovah Abasi fo atatde adan̄a fo, kpa nte enye ọkọn̄wọn̄ọde ọnọ mme ete ete fo,+ onyụn̄ ọnọde fi ofụri isọn̄ emi enye ọkọdọhọde ete iyọnọ mme ete ete fo,+  koro afo eyenịm kpukpru ibet emi ami n̄wụkde fi mfịn emi onyụn̄ anam mmọ, onyụn̄ ama Jehovah Abasi fo, onyụn̄ asan̄a ke usụn̄ esie kpukpru ini,+ afo ndien enyene ndida obio ita efen ndian ke obio ita emi,+ 10  mbak ẹdiduọk iyịp owo eke mîduehe+ ke isọn̄ fo emi Jehovah Abasi fo ọnọde fi ke udeme, n̄ko mbak afo udunyene ubiomikpe iyịp.+ 11  “Edi edieke owo asuade+ ekemmọ owo, onyụn̄ edịbede ebet enye onyụn̄ adahade ke enyọn̄ eyịbi enye* owot,+ ndien efehe aka kiet ke otu obio emi, 12  yak mbiowo obio esie ẹdọn̄ ẹkesio enye ke obio oro ẹdi, ẹnyụn̄ ẹyak enye ẹsịn ke ubọk osio-usiene iyịp, ndien enye enyene ndikpa.+ 13  Enyịn fo inyeneke nditua enye mbọm,+ edi afo enyene ndisio ubiomikpe iyịp owo eke mîduehe mfep ke Israel,+ man ọfọn ye afo. 14  “Kûsịk adan̄a mbọhọidụn̄ fo,+ emi mme ete ete fo ẹdinịmde ke udeme fo emi afo edibọde ke isọn̄ emi Jehovah Abasi fo ọnọde fi ada enyene. 15  “Ntiense kiet kpọt inyeneke ndidaha nda ntịn̄ ikọ mbiom owo ikpe ke ndudue ekededi m̀mê ke idiọkn̄kpọ+ ekededi emi owo anamde. Ke inua ntiense iba m̀mê ke inua ntiense ita ke ikọ edisọn̄ọ ada.+ 16  Edieke ntiense emi aduakde afai edidahade ada odori owo ikọ ete enye ọsọn̄ ibuot,+ 17  owo iba emi ẹnyenede ikọ do ẹnyene ndida ke iso Jehovah, ke iso mme oku ye ke iso mme ebiereikpe eke ẹdidude ke mme usen oro.+ 18  Ndien mme ebiereikpe ẹnyene nditịm ndụn̄ọde,+ ndien edieke ntiense oro edide ntiense nsu, onyụn̄ edide enye odori eyenete esie ikọ, 19  mbufo ẹnyene ndinam enye kpa nte enye akaduakde ndinam eyenete esie,+ afo onyụn̄ enyene ndisio se idiọkde ke otu fo mfep.+ 20  Ntre mbon eken ẹyekop ẹnyụn̄ ẹdịghe, idinyụn̄ itọn̄ọke aba ntak inam orụk idiọkido emi ke otu fo.+ 21  Enyịn fo inyeneke nditua mbọm:+ ukpọn̄ ke ukpọn̄, enyịn ke enyịn, edet ke edet, ubọk ke ubọk, ukot ke ukot.+

Mme Ikọ Idakisọn̄

At. Ed., “ukpọn̄ esie.”
At. Ed., “ukpọn̄ esie.”