Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Deuteronomy 17;1-20

17  “Kûwa ayara enan̄ m̀mê erọn̄ emi obiomode ndo, n̄kpọ ekededi eke ọdiọkde, unọ Jehovah Abasi fo; koro emi edide mbubiam n̄kpọ ke enyịn Jehovah Abasi fo.+  “Edieke ẹkụtde eren m̀mê n̄wan ke otu fo emi anamde se idiọkde ke enyịn Jehovah Abasi fo onyụn̄ abiatde ediomi esie ke kiet ke otu mme obio fo emi Jehovah Abasi fo ọnọde fi,+  enye onyụn̄ akade akatuak ibuot ọnọ mme abasi efen onyụn̄ onụhọde ọnọ mmọ, m̀mê onụhọde ọnọ utịn m̀mê ọfiọn̄ m̀mê kpukpru mme udịm enyọn̄,+ kpa n̄kpọ eke mmen̄ketemeke mbufo,+  ndien ẹditịn̄ ẹnọ fi, afo onyụn̄ okop onyụn̄ etịm odụn̄ọde, ndien, sese! n̄kpọ emi edi akpanikọ,+ ẹma ẹnyụn̄ ẹnam mbubiam n̄kpọ emi ke Israel!  afo enyene ndida eren oro m̀mê n̄wan oro akanamde idiọkn̄kpọ emi n̄wọrọ ndi inuaotop obio fo, ih, eren m̀mê n̄wan oro, nnyụn̄ ntọn̄ọ utọ owo oro ke itiat, utọ owo oro enyene ndikpa.+  Ke inua ntiense iba m̀mê ita+ ke afo ediwot owo emi odotde n̄kpa do. Kûwot enye ke inua ntiense kiet.+  Yak edi ubọk mme ntiense oro ẹbem iso ẹdoro enye ke idem ndiwot enye, ndien ubọk kpukpru mbon eken ẹyetiene;+ ndien afo enyene ndisio se idiọkde mfep ke otu fo.+  “Edieke ikpe ọsọn̄de fi ndibiere,+ edide ikpe uduọkiyịp,+ ikpe emi ẹkotde owo,+ m̀mê ikpe afai, m̀mê ikpe emi eneni odude,+ ke obio fo, afo enyene ndidaha ke enyọn̄ ndọk n̄ka ebiet emi Jehovah Abasi fo edimekde,+  afo onyụn̄ enyene nditiene mme oku,+ nditọ Levi ye mme ebiereikpe+ emi ẹdidude ke mme usen oro, nnyụn̄ n̄kobụp, ndien mmọ ẹyeteme fi se idide ubiereikpe.+ 10  Ndien afo enyene ndinam nte mmọ ẹdidọhọde fi ke ebiet emi Jehovah edimekde; onyụn̄ ekpeme ndinịm kpukpru se mmọ ẹtemede fi. 11  Afo edinam kpa nte ekemde ye ibet emi mmọ ẹditemede fi, ye nte ekemde ye ubiereikpe oro mmọ ẹdidọhọde fi.+ Kûkpọn̄ ikọ oro mmọ ẹdidọhọde fi uwọn̄ọde uka nnasia m̀mê ufien.+ 12  Ndien owo eke edinamde n̄kpọ ke iseri mîdinyụn̄ ikopke uyo oku emi adade do ndisan̄a utom nnọ Jehovah Abasi fo m̀mê uyo ebiereikpe,+ owo oro enyene ndikpa;+ ndien afo enyene ndisio se idiọkde mfep ke Israel.+ 13  Ndien kpukpru owo ẹyekop ẹnyụn̄ ẹdịghe,+ mmọ idinyụn̄ inamke aba n̄kpọ ke iseri. 14  “Ke ini afo ke akpatre odụkde isọn̄ oro Jehovah Abasi fo ọnọde fi, onyụn̄ adade enye enyene onyụn̄ odụn̄de ke esịt,+ ndien ekem afo ọdọhọ ete, ‘Yak nnịm edidem akara mi nte kpukpru mme idụt emi ẹkande mi ẹkụk ẹnamde’;+ 15  kûtre ndinịm edidem emi Jehovah Abasi fo edimekde.+ Mek edidem ke otu nditọete fo man akara fi. Owo idiyakke fi emek esenowo emi mîdịghe eyenete fo ete akara fi. 16  Yak enye okûkam ọkọ ediwak enan̄-mbakara ọnọ idemesie,+ okûnyụn̄ anam mme owo ẹfiak ẹnyọn̄ Egypt man ẹkekọ ediwak enan̄-mbakara;+ koro Jehovah ọkọdọhọde mbufo ete, ‘Mbufo ẹkûfiak aba ẹka usụn̄ oro.’ 17  Yak enye okûnyụn̄ ọdọ ediwak iban, mbak esịt esie ediwaha ọkpọn̄ usụn̄;+ enye okûnyụn̄ ọkọ ata ediwak silver ye gold ọnọ idemesie.+ 18  Ndien ama ekem ke ini enye osụhọrede etie ke ebekpo ubọn̄ esie, yak enye osion̄o ibet emi odude ye mme oku, nditọ Levi, ewet esịn ke n̄wed efen.+ 19  “Ndien yak n̄wed emi odu ye enye, enye onyụn̄ okot enye ke ofụri usen uwem esie,+ man enye ekpep ndibak Jehovah Abasi esie nnyụn̄ nnịm kpukpru ikọ ibet emi ye mme ewụhọ emi nnyụn̄ nnam mmọ;+ 20  mbak esịt esie edimenede ke enyọn̄ akan nditọete esie,+ mbak enye edinyụn̄ ọwọn̄ọde ọkpọn̄ ewụhọ emi aka nnasia m̀mê ufien,+ man usen ubọn̄ esie ekpebịghi,+ enye ye nditọiren esie ke Israel.

Mme Ikọ Idakisọn̄