Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Deuteronomy 14;1-29

14  “Mbufo ẹdi nditọ Jehovah Abasi mbufo.+ Mbufo ẹkûkpi idem+ mbufo, ẹkûnyụn̄ ẹnam ibọ+ ke ọkpọiso mbufo ẹban̄a akpan̄kpa.  Koro afo edi edisana ikọt+ Jehovah Abasi fo, Jehovah onyụn̄ emek fi ete edi ikọt imọ, akpan inyene,+ ke otu kpukpru owo emi ẹdude ke iso isọn̄.  “Kûta ndedehe n̄kpọ baba kiet.+  Orụk unam eke mbufo ẹkemede ndita+ ẹdi emi: ayara enan̄ ye erọn̄ ye ebot,  edop ye akan̄ ye okoyo+ ye ebot ikọt ye oso ye erọn̄ ikọt ye okoyo ebot;  ye unam ekededi eke asiahade ikpat enịm ufan̄, onyụn̄ ọkpọhide n̄kpọ ata ke otu unam.+ Oro ke mbufo ẹkeme ndita.  Emi kpọt ke mbufo mînyeneke ndita ke otu mbon oro ẹkpọhide n̄kpọ ẹta m̀mê oro ẹsiahade ikpat ẹnịm ufan̄: camel+ ye ebet+ ye eku abaitiat,+ koro mmọ ẹkpọhide n̄kpọ ẹta edi isiahake ikpat. Mmọ ẹdi ndedehe n̄kpọ ẹnọ mbufo.  Kpa ntre ye edi,+ koro enye asiahade ikpat edi ikpọhike n̄kpọ ita. Enye edi ndedehe n̄kpọ ọnọ mbufo. Mbufo ẹkûta obụk mmọ baba kiet, ẹkûnyụn̄ ẹtụk okpo mmọ.+  “Mbufo ẹta mmọ emi ke otu kpukpru se idude ke mmọn̄: Kpukpru n̄kpọ eke ẹnyenede n̄kọi ye ikpọk ke mbufo ẹkeme ndita.+ 10  Ndien se ededi oro mînyeneke n̄kọi ye ikpọk mbufo inyeneke ndita.+ Enye edi ndedehe n̄kpọ ọnọ mbufo. 11  “Mbufo ẹmekeme ndita inuen ekededi eke asanade. 12  Edi mmọ emi ke mbufo mîditaha: ntrukpom ye ososo inyan̄ ye obubịt utere,+ 13  ye ndatndat mbukpo ye obubịt mbukpo+ ye n̄kukwọ inọ ke orụk mmọ; 14  ye raven+ ke orụk mmọ; 15  ye ostrich+ ye ikurikụt ye ituen ye falcon ke orụk mmọ; 16  ye ekpri ikurikụt ye atiai-utọn̄ ikurikụt+ ye unen mmọn̄, 17  ye ikpan̄inyan̄+ ye utere ye unen idịm, 18  ye inuen inyan̄ ye akpantana ke orụk mmọ, ye usari ye emian̄.+ 19  Ndien kpukpru enyene-mba edibotn̄kpọ emi ẹsan̄ade ke otu ẹdi ndedehe n̄kpọ ẹnọ mbufo.+ Mbufo ẹkûta mmọ. 20  Mbufo ẹmekeme ndita edibotn̄kpọ ekededi emi asanade eke efede. 21  “Mbufo ẹkûta n̄kpọ ekededi emi akpade ikpọn̄.+ Afo emekeme ndimen enye nnọ esenowo emi odude ke obio fo, ndien enye ekeme ndita; mîdịghe emekeme ndinyam enye nnọ owo esenidụt, koro afo edi edisana ikọt ọnọ Jehovah Abasi fo. “Kûtem eyen ebot ke mmọn̄eba eka esie.+ 22  “Kûtre ndinọ ọyọhọ mbak duop ke kpukpru mbun̄wụm fo, se itode ke in̄wan̄ ke isua ke isua.+ 23  Afo onyụn̄ enyene ndidia ọyọhọ mbak duop ke otu n̄kpasịp+ fo ye obufa wine fo ye aran fo ye akpa ke otu nditọ enan̄ fo ye eke erọn̄+ fo, ke ebiet emi Jehovah Abasi fo edimekde ndinam enyịn̄ esie odu; man afo ekpep ndibak Jehovah Abasi fo kpukpru ini.+ 24  “Edieke usụn̄ oyomde akaha,+ afo mûnyụn̄ ukemeke ndibiom enye, sia ebiet oro Jehovah Abasi fo edimekde ndinịm enyịn̄ esie+ ediyomde usụn̄ akaha afo ndisan̄a n̄kesịm, (koro Jehovah Abasi fo edidiọn̄de fi,)+ 25  kpụhọ enye sịn ke okụk, bọp okụk oro kama ke ubọk fo nyụn̄ nam isan̄ ka ebiet oro Jehovah Abasi fo edimekde. 26  Afo onyụn̄ enyene ndida okụk oro ndep se ededi oro ọdọn̄de ukpọn̄ fo,+ enan̄ ye erọn̄ ye ebot ye wine ye ọkpọsọn̄ mmịn+ oro ọdọn̄de fi; nyụn̄ ta mmọ do ke iso Jehovah Abasi fo nyụn̄ dat esịt,+ afo ye mbonufọk fo. 27  Kûnyụn̄ ufre eyen Levi+ emi odude ke obio fo, koro enye mîtieneke fi inyene udeme m̀mê n̄kpọ-akpa.+ 28  “Ke utịt isua ita afo ayada kpukpru ọyọhọ mbak duop ke otu mbun̄wụm fo edi ke isua oro,+ afo onyụn̄ enyene ndida enye ndinịm ke esịt obio fo. 29  Ndien eyen Levi+ emi mîtieneke fi inyene udeme m̀mê n̄kpọ-akpa, ọkọrọ ye esenowo+ ye eyenakpa ye ebeakpa+ emi ẹdude ke obio fo, ẹyedi ẹdidia ẹyụhọ; man Jehovah Abasi fo ọdiọn̄+ fi ke kpukpru utom+ ubọk fo emi afo edinamde.

Mme Ikọ Idakisọn̄