Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Deuteronomy 11;1-32

11  “Afo nyụn̄ ma Jehovah Abasi fo+ nyụn̄ nam utom esie ye mme ewụhọ esie ye mme ubiereikpe+ esie ye mme ibet esie kpukpru ini.  Ndien mbufo ẹmetịm ẹfiọk mfịn emi (koro mmentịn̄ke ikọ emi nnọ nditọ mbufo emi mîfiọkke, mînyụn̄ ikwe ntụnọ Jehovah+ Abasi mbufo ye akwa ubom+ esie ye ọkpọsọn̄ ubọk+ esie ye edinyanade ubọk+ esie,  ye mme idiọn̄ọ esie ye mme edinam oro enye akanamde Pharaoh edidem Egypt ye ofụri isọn̄ esie ke Egypt;+  ye se enye akanamde udịmekọn̄ Egypt ye mme enan̄-mbakara esie ye mme chariot ekọn̄ esie onyụn̄ anamde mmọn̄ Ididuot Inyan̄ ọtọ ofụk mmọ ke ini mmọ ẹbịnede mbufo,+ Jehovah onyụn̄ osobo mmọ tutu esịm mfịn emi;+  ye se enye akanamde ye mbufo ke wilderness tutu mbufo ẹdisịm ebiet emi;  ye se enye akanamde Dathan ye Abiram+ nditọ Eliab eyen Reuben, ke ini isọn̄ akatatde inua emen mmọ ye ufọk mmọ ye mme tent mmọ ye kpukpru se idude uwem oro ẹketienede mmọ ke otu ofụri Israel);+  koro enyịn mbufo ẹma ẹkụt kpukpru ikpọ n̄kpọ oro Jehovah akanamde.+  “Ndien mbufo ẹnyene ndinịm ofụri ewụhọ+ oro n̄wụkde mbufo mfịn emi, man mbufo ẹkpesọn̄ idem ẹkpenyụn̄ ẹdụk ẹkeda isọn̄ emi mbufo ẹbede ẹka ndida nnyene,+  n̄ko man usen mbufo ekpebịghi+ ke isọn̄ oro Jehovah ọkọn̄wọn̄ọde ndinọ mme ete ete mbufo ye mfri mmọ,+ kpa isọn̄ emi ọfiọrọde mmọn̄eba ye aranọkwọk.+ 10  “Koro isọn̄ emi afo akade ndida nnyene itiehe nte isọn̄ Egypt emi mbufo ẹkewọn̄ọde ke esịt, emi afo ekesisuande n̄kpasịp fo onyụn̄ adade ikpat fo ọnọ enye mmọn̄, nte in̄wan̄ ikọn̄. 11  Edi isọn̄ emi mbufo ẹbede ẹka ndida nnyene edi isọn̄ emi enyenede obot ye unaisọn̄ itịghede.+ Enye ọn̄wọn̄ mmọn̄ edịm emi otode enyọn̄; 12  kpa isọn̄ emi Jehovah Abasi fo esede aban̄a. Enyịn+ Jehovah Abasi fo ese enye kpukpru ini, ọtọn̄ọde ke ntọn̄ọ isua tutu esịm utịt isua. 13  “Ndien ama ekem edieke mbufo mîditreke ndinịm mme ewụhọ mi+ emi n̄wụkde mbufo mfịn emi, ẹdinyụn̄ ẹmade Jehovah Abasi mbufo ẹnyụn̄ ẹnam n̄kpọ esie ke ofụri esịt mbufo ye ke ofụri ukpọn̄ mbufo,+ 14  ami n̄ko nyanam edịm edep ke isọn̄ mbufo ke edikem ini,+ edịm ini idọk ye edịm ini utọ,+ ndien afo oyobon n̄kpasịp fo ye edinem wine fo ye aran fo. 15  Ndien nyanam mbiet etịbe ke ikọt fo ọnọ mme ufene fo,+ afo oyonyụn̄ adia n̄kpọ oyụhọ.+ 16  Ẹkpeme idem mbufo mbak esịt editap mbufo,+ ndien mbufo ẹwaha ẹkpọn̄ usụn̄ ẹnyụn̄ ẹtuak ibuot ẹnọ mme abasi efen ẹnyụn̄ ẹnụhọ ẹnọ mmọ,+ 17  ndien Jehovah ayat esịt ye mbufo, onyụn̄ esịri ikpaenyọn̄ man edịm okûdep,+ isọn̄ edinyụn̄ on̄wụm mbun̄wụm esie ndien mbufo ẹsọp ndikpan̄a n̄wọn̄ọ ke eti isọn̄ oro Jehovah ọnọde mbufo.+ 18  “Mbufo ẹnam mme ikọ emi ẹdu mbufo ke esịt+ ye ke ukpọn̄ ẹnyụn̄ ẹtebe mmọ ẹdian ke ubọk mbufo nte idiọn̄ọ, yak mmọ ẹnyụn̄ ẹdi idiọn̄ọ ke ọkpọiso mbufo.+ 19  Mbufo ẹnyụn̄ ẹda mmọ ẹkpep nditọ mbufo, nyụn̄ tịn̄ ban̄a mmọ ke ini afo etiede ke ufọk fo ye ke ini afo asan̄ade ke usụn̄ ye ke ini afo anade-na ye ke ini afo adahade ada.+ 20  Afo nyụn̄ wet mmọ ke obubọk enyịnusụn̄ ufọk fo ye ke inuaotop+ fo, 21  man usen mbufo ye usen nditọ mbufo ẹkpewak+ ke isọn̄ emi Jehovah ọkọn̄wọn̄ọde ndinọ mme ete ete mbufo,+ nte mme usen heaven emi ofụkde isọn̄.+ 22  “Koro edieke mbufo ẹditịmde ẹnịm kpukpru mme ewụhọ+ oro n̄wụkde mbufo, ẹnyụn̄ ẹnamde mmọ, ẹnyụn̄ ẹmade Jehovah Abasi mbufo,+ ẹnyụn̄ ẹsan̄ade ke kpukpru usụn̄ esie+ ẹnyụn̄ ẹsọn̄ọde ẹyịre ye enye,+ 23  Jehovah n̄ko eyebịn kpukpru mme idụt emi efep ke ntak mbufo,+ ndien mbufo ẹyebọ mme idụt emi ẹkponide ẹnyụn̄ ẹwakde ẹkan mbufo isọn̄ mmọ.+ 24  Kpukpru ebiet eke ekaikpat mbufo edidịghide ẹdinyene mbufo.+ Ọtọn̄ọde ke wilderness tutu esịm Lebanon, ọtọn̄ọde ke Akpa, oro edi, Akpa Euphrates, tutu esịm inyan̄ edem usoputịn, edidi adan̄a mbufo.+ 25  Baba owo kiet idikemeke ndisọn̄ọ nda mbufo ke iso.+ Jehovah Abasi mbufo ayanam ndịk mbufo ye uten̄e mbufo ẹmụm kpukpru mme idụt+ emi mbufo ẹdikade, kpa nte enye ọkọn̄wọn̄ọde ọnọ mbufo. 26  “Sese, mmenịm edidiọn̄ ye isụn̄i ke iso mbufo mfịn emi:+ 27  edidiọn̄, edieke mbufo ẹdinịmde mme ewụhọ Jehovah Abasi mbufo+ oro n̄wụkde mbufo mfịn emi; 28  ye isụn̄i,+ edieke mbufo mîdinịmke mme ewụhọ Jehovah Abasi mbufo,+ edi ẹwahade ẹkpọn̄ usụn̄ emi ntemede mbufo mfịn emi, ẹnyụn̄ ẹtiene mme abasi en̄wen emi mbufo mîkọfiọkke. 29  “Ndien ama ekem ke ini Jehovah Abasi fo adade fi odụk isọn̄ emi afo akade ndida nnyene,+ afo enyene ndida ke Obot Gerizim+ ntan̄a edidiọn̄ nnyụn̄ nda ke Obot Ebal ntan̄a isụn̄i.+ 30  Nte mmọ idụhe ke n̄kan̄ Jordan emi esede edem usoputịn, ke isọn̄ mbon Canaan emi ẹdụn̄de ke Arabah,+ ke iso Gilgal,+ ikpere ikpọ eto Moreh?+ 31  Koro mbufo ẹmọn̄ ẹbe Jordan ẹdụk ẹkeda isọn̄ oro Jehovah Abasi mbufo ọnọde mbufo, mbufo ẹnyụn̄ ẹnyene ndida enye nnyene nnyụn̄ ndụn̄ ke esịt.+ 32  Mbufo ẹkpeme ndinam kpukpru mme ewụhọ ye mme ubiereikpe+ oro nnịmde mbufo ke iso mfịn emi.+

Mme Ikọ Idakisọn̄