Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Deuteronomy 10;1-22

10  “Ke ini oro, Jehovah ọdọhọ mi ete, ‘Sọi itiatn̄wed iba eke ẹbietde akpa oro,+ nyụn̄ dọk tiene mi ke obot, nyụn̄ da eto nam ekebe.+  Ndien ami nyewet mme ikọ oro ẹkedude ke akpa itiatn̄wed oro afo okobomde, ke mme itiatn̄wed emi, ndien afo enyene ndisịn mmọ ke ekebe oro.’  Ntre, mma nda eto acacia nnam ekebe nnyụn̄ nsọi itiatn̄wed iba eke ẹbietde akpa oro,+ ndien ndọk obot oro, ye itiatn̄wed mbiba ke ubọk.  Ndien enye ewet ke itiatn̄wed oro se enye ekewetde ke akpa,+ kpa Ikọ Duop+ emi Jehovah ọkọdọhọde mbufo ke obot ke ufọt ikan̄+ ke usen esop;+ ekem Jehovah ayak mmọ ọnọ mi.  Ndien mma nsụhọde ke obot+ oro nnyụn̄ mmen mme itiatn̄wed oro nsịn ke ekebe oro n̄kanamde, man mmọ ẹkpedu do, kpa nte Jehovah eketemede mi.+  “Ekem nditọ Israel ẹdaha ke Beeroth Bene-jaakan+ ẹka Moserah. Ndien Aaron akpa, ẹnyụn̄ ẹbụk enye do;+ ndien Eleazar eyen esie ọtọn̄ọ ndinam utom nte oku ke itie esie.+  Ndien mmọ ẹdaha do ẹka Gudgodah, ẹnyụn̄ ẹto ke Gudgodah ẹka Jotbathah,+ isọn̄ oro mme itịghede idịm mmọn̄ ẹdude.  “Ke ini oro, Jehovah adian̄ade esien Levi+ ete ẹbiom ekebe ediomi Jehovah,+ ẹnyụn̄ ẹda ke iso Jehovah ẹnam n̄kpọ ẹnọ enye+ ẹnyụn̄ ẹda enyịn̄ esie ẹnọ edidiọn̄ tutu esịm mfịn emi.+  Ntak edi oro Levi mînyeneke udeme ye n̄kpọ-akpa+ ke otu nditọete esie. Jehovah edi udeme esie, kpa nte Jehovah Abasi fo ọkọdọhọde enye.+ 10  Ndien ami n̄kodu ke obot oro kpa nte n̄kodude ke akpa ini, uwemeyo aba ye okoneyo aba,+ ndien Jehovah akpan̄ utọn̄ ọnọ mi n̄ko ke ini oro.+ Jehovah ikoyomke ndisobo mbufo mfep.+ 11  Ndien Jehovah ọdọhọ mi ete, ‘Daha ke enyọn̄, ka kada mbio emi daha, man mmọ ẹkpedụk ẹkeda isọn̄ oro n̄kọn̄wọn̄ọde nnọ mme ete ete mmọ nte ke nyọnọ mmọ.’+ 12  “Ndien ke emi, O Israel, nso ke Jehovah Abasi fo oyom oto fi+ ke mîbọhọke ndibak+ Jehovah Abasi fo, man asan̄a ke kpukpru usụn̄ esie+ onyụn̄ ama enye+ onyụn̄ anam n̄kpọ Jehovah Abasi fo ke ofụri esịt fo ye ke ofụri ukpọn̄ fo;+ 13  onyụn̄ enịm mme ibet Jehovah ye mme ewụhọ+ esie oro ntemede fi mfịn emi, ke ufọn fo?+ 14  Sese, heaven, kpa n̄kon̄n̄kan heaven enyene Jehovah Abasi fo,+ ọkọrọ ye isọn̄+ ye kpukpru se idude ke esịt. 15  Edi mme ete ete fo ke Jehovah okokot adian idem man ama mmọ, onyụn̄ emek nditọ mmọ emi ẹtienede mmọ,+ kpa mbufo, ke otu kpukpru mme idụt, nte edide mfịn emi. 16  Ndien mbufo ẹnyene ndisịbe edụt esịt+ mbufo mfep, ẹkûnyụn̄ ẹsọn̄ obotitọn̄ aba.+ 17  Koro Jehovah Abasi mbufo edi Abasi mme abasi+ ye Ọbọn̄ mme mbọn̄,+ akwa ye ọkpọsọn̄ Abasi emi enyenede uten̄e,+ emi mînamke asari+ mînyụn̄ ibọhọ ubọkedem,+ 18  emi ekpede edinen ikpe ọnọ eyenakpa ye ebeakpa+ onyụn̄ amade esenowo+ onyụn̄ ọnọde enye udia ye ọfọn̄. 19  Mbufo n̄ko ẹnyene ndima esenowo,+ koro mbufo ẹkedide isenowo ke isọn̄ Egypt.+ 20  “Bak Jehovah Abasi fo.+ Nam n̄kpọ esie,+ nyụn̄ yịre ye enye,+ enyịn̄ esie ke afo onyụn̄ enyene nditomo.+ 21  Enye ke afo enyene nditoro,+ enye onyụn̄ edi Abasi fo, emi akanamde ikpọ enyene-ndịk n̄kpọ emi ye afo, nte enyịn fo ẹkụtde.+ 22  Mme ete ete fo ẹkedi ukpọn̄ ata ye duop ke ini ẹkedide Egypt,+ ndien sese Jehovah Abasi fo amanam fi awak nte ntantaọfiọn̄ ke ikpaenyọn̄.+

Mme Ikọ Idakisọn̄