Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Deuteronomy 1;1-46

1  Mme ikọ emi ke Moses eketịn̄ ọnọ ofụri Israel ke ikpehe Jordan+ ke wilderness, ke unaisọn̄ desat emi asakde iso ese Suph, ke ufọt Paran+ ye Tophel ye Laban ye Hazeroth+ ye Dizahab,  emi edide isan̄ usen duopekiet to ke Horeb ke usụn̄ Obot Seir sịm Kadesh-barnea.+  Edikem ke ọyọhọ isua aba,+ ke ọyọhọ ọfiọn̄ duopekiet, ke akpa usen ke ọfiọn̄ oro, Moses asian nditọ Israel kpukpru se Jehovah okowụkde enye ete asian mmọ,  ke enye ama akakan Sihon+ edidem mme Amorite, emi okodụn̄de ke Heshbon, ye Og+ edidem Bashan, emi okodụn̄de ke Ashtaroth,+ ke Edrei.+  Moses anam ibet+ emi an̄wan̄a ke ikpehe Jordan ke isọn̄ Moab ete:  “Jehovah Abasi nnyịn ọkọdọhọ nnyịn ke Horeb+ ete, ‘Mbufo ẹmedụn̄ ke ikpehe emi etiede obot obot+ mi ebịghi ekem.  Ẹwọn̄ọde iso ẹka obot obot ikpehe mme Amorite+ ye ọtọ kpukpru mbọhọidụn̄ mmọ ke Arabah,+ ke ikpehe oro etiede obot obot,+ ye Shephelah ye Negeb+ ye mbeninyan̄,+ isọn̄ mbon Canaan,+ ye Lebanon,+ tutu esịm akwa akpa, oro edi Akpa Euphrates.+  Sese, mmenịm isọn̄ oro ke iso mbufo. Ẹdụk ẹkeda isọn̄ oro Jehovah ọkọn̄wọn̄ọde ọnọ mme ete mbufo, Abraham ye Isaac+ ye Jacob,+ ete iyọnọ mmọ ye mfri mmọ emi ẹditienede mmọ.’+  “Ndien mma ndọhọ mbufo ke ini oro nte, ‘N̄kemeke ndikama mbufo ke idemmi ikpọn̄. + 10  Jehovah Abasi mbufo amanam mbufo ẹwak, ndien sese, mbufo ẹmewak mfịn emi nte ntantaọfiọn̄ ke ikpaenyọn̄.+ 11  Jehovah Abasi mme ete ete mbufo akpakam anam mbufo ẹtọt+ utịm ike-tọsịn ẹkan emi, onyụn̄ ọdiọn̄+ mbufo kpa nte enye ọkọn̄wọn̄ọde ọnọ mbufo.+ 12  N̄keme didie ndikama mbufo nnyụn̄ nyọ mbufo ye utọk mbufo ke idemmi ikpọn̄?+ 13  Mbufo ẹda mbon eti ibuot ye mbon ọniọn̄+ ye mbon ikike+ ke mme esien mbufo ẹdi, man nnịm mmọ ke mme etubom mbufo.’+ 14  Ndien mbufo ẹbọrọ mi ẹte, ‘Se afo ọdọhọde nnyịn inam ọfọn.’ 15  Ntre mma nda mme etubom ke mme esien mbufo ndi, kpa mbon ọniọn̄ ye mbon ikike, nnyụn̄ nnịm mmọ nte mme etubom mbufo, nte etubom mme tọsịn ye etubom mme ikie ye etubom mme aba ye duop ye etubom mme duop ye nte ikpọ owo ke mme esien mbufo.+ 16  “Ndien mma nteme mme ebiereikpe mbufo ke ini oro nte, ‘Ke ini mbufo ẹkpede ikpe nditọete mbufo, mbufo ẹkpe ke edinen ido+ ke ufọt owo ye eyenete esie m̀mê esenowo esie.+ 17  Mbufo ẹkûnam asari ke ikpe.+ Mbufo ẹkop ikọ ekpri owo ukem nte eke akamba owo.+ Mbufo ẹkûbak owo enyịn,+ koro ikpe enyenede Abasi;+ ndien mbufo ẹda ikpe eke ọsọn̄de akan mbufo ẹsọk mi, man n̄kpe.’+ 18  Ndien mma nteme mbufo ke ini oro kpukpru se mbufo ẹnyenede ndinam. 19  “Ekem nnyịn ima idaha ke Horeb inyụn̄ isan̄a ibe ofụri akwa enyene-ndịk wilderness,+ emi mbufo ẹkekụtde, ke usụn̄ obot obot ikpehe mme Amorite,+ kpa nte Jehovah Abasi nnyịn eketemede nnyịn; ke akpatre nnyịn ima idisịm Kadesh-barnea.+ 20  Mma nnyụn̄ ndọhọ mbufo nte, ‘Mbufo ẹmesịm obot obot ikpehe mme Amorite, emi Jehovah Abasi nnyịn edinọde nnyịn.+ 21  Sese, Jehovah Abasi fo amayak isọn̄ emi esịn fi ke ubọk.+ Dọk kada enye nyene, kpa nte Jehovah Abasi mme ete ete fo ọkọdọhọde fi.+ Kûfehe ndịk, kûnyụn̄ uyak idem enyek fi.’+ 22  “Edi kpukpru mbufo ẹma ẹdi ke ọtọ mi ẹdidọhọ ẹte, ‘Yak nnyịn isio mme owo idọn̄ ẹbem nnyịn iso ẹkeyep isọn̄ oro ẹnọ nnyịn ẹnyụn̄ ẹfiak ẹdisian nnyịn usụn̄ eke nnyịn idisan̄ade ye mme obio eke nnyịn ididụkde.’+ 23  Ntre n̄kpọ emi ama ọfọn mi ke enyịn, ami mma nnyụn̄ nsio owo duopeba ke otu mbufo ndọn̄, owo kiet ke esien kiet kiet.+ 24  Ekem mmọ ẹwọn̄ọde ẹdọk ikpehe emi etiede obot obot+ ẹnyụn̄ ẹsan̄a ẹkesịm itịghede mmọn̄ Eshcol+ ẹkeyep isọn̄ oro. 25  Ndien mmọ ẹda ndusụk mbun̄wụm isọn̄+ oro ẹsọk nnyịn, ẹnyụn̄ ẹdidọhọ nnyịn ẹte, ‘Isọn̄ oro Jehovah Abasi nnyịn ọnọde nnyịn ọfọn.’+ 26  Edi mbufo ikoyomke ndidọk n̄ka,+ ẹma ẹnyụn̄ ẹsọn̄ ibuot ẹbiat ewụhọ Jehovah Abasi mbufo.+ 27  Mbufo ẹma ẹnyụn̄ ẹkụni ke mme tent mbufo ẹte, ‘Edi koro Jehovah akasuade+ nnyịn akanam enye osio nnyịn ke isọn̄ Egypt+ ete iyak nnyịn isịn mme Amorite ke ubọk, man ẹsobo nnyịn.+ 28  Nnyịn ididọk ika m̀mọ̀n̄? Nditọete nnyịn ẹmenam esịt eyemede nnyịn,+ ẹte: “Nnyịn ima ikụt mme owo eke ẹkponide ẹnyụn̄ ẹniọn̄de ẹkan nnyịn,+ ye ikpọ obio emi ẹbọpde ibibene ukpeme ẹsịm enyọn̄,+ ima inyụn̄ ikụt nditọ Anak+ do.”’ 29  “Ntre mma ndọhọ mbufo nte, ‘Mbufo ẹkûdịghe, ẹkûnyụn̄ ẹfehe mmọ.+ 30  Jehovah Abasi mbufo asan̄a mbufo ke iso. Enye ayan̄wana ọnọ mbufo+ kpa nte enye akan̄wanade ọnọ mbufo ke Egypt ke iso mbufo,+ 31  ye ke wilderness,+ emi mbufo ẹkekụtde nte Jehovah Abasi mbufo ekemende mbufo akama+ kpa nte owo emende eyen esie akama, ke kpukpru usụn̄ emi mbufo ẹkesan̄ade tutu mbufo ẹdisịm ebiet emi.’+ 32  Edi kpa ye ikọ emi, mbufo ikọbuọtke idem ye Jehovah Abasi mbufo,+ 33  emi ekebemde mbufo iso aka ndiyep ebiet nna nnọ mbufo,+ asan̄a ke ikan̄ ke okoneyo man mbufo ẹkụt usụn̄ emi mbufo ẹkpesan̄ade onyụn̄ asan̄a ke obubịt enyọn̄ ke uwemeyo.+ 34  “Ofụri emi, Jehovah ke okokop se mbufo ẹtịn̄de. Ntre enye ayat esịt onyụn̄ ọn̄wọn̄ọ+ ete, 35  ‘Baba owo kiet ke otu mbon idiọk emana emi idikwe eti isọn̄ emi n̄kọn̄wọn̄ọde ndinọ mme ete mbufo,+ 36  ibọhọke Caleb eyen Jephunneh.+ Enye oyokụt, nyonyụn̄ nda isọn̄ emi enye akasan̄ade ke esịt nnọ enye ye nditọ esie, koro enye akasan̄ade ye Jehovah ke ofụri esịt.+ 37  (Jehovah ama onyụn̄ ayat esịt ye ami ke ntak mbufo, ọdọhọde ete, ‘Afo n̄ko ududụkke do.+ 38  Joshua eyen Nun, emi adade ke iso fo, edidụk.’+ Enye amanam enye okop odudu,+ koro enye edinam Israel ẹda enye ẹnyene.) 39  Amaedi n̄kpri nditọ mbufo emi mbufo ẹkedọhọde ẹte: “Mmọ ẹyekabade ẹdi n̄kpọ mbụme!”+ ye nditọ mbufo emi mîfiọkke eti m̀mê idiọk mfịn emi, mmọ ẹdidụk, nyonyụn̄ nnọ mmọ isọn̄ emi, ndien mmọ ẹyeda enye ẹnyene. 40  Amaedi mbufo, ẹwọn̄ọde ẹsan̄a usụn̄ Ididuot Inyan̄ ẹka wilderness.’+ 41  “Ndien mbufo ẹma ẹbọrọ mi ẹte, ‘Nnyịn imanam idiọkn̄kpọ idue Jehovah.+ Nnyịn iyọdọk ikan̄wana kpa nte Jehovah Abasi nnyịn eketemede nnyịn!’ Ntre mbufo ẹma ẹbọbọ mbọbọ ekọn̄, kpukpru mbufo, ẹnyụn̄ ẹkere ke edi mfefere n̄kpọ ndidọk obot oro.+ 42  Edi Jehovah ama ọdọhọ mi ete, ‘Dọhọ mmọ ete: “Mbufo ẹkûdọk ẹken̄wana, koro ami mmendụhe ke otu mbufo;+ mbak mme asua mbufo ẹdikan mbufo.”’+ 43  Ntre mma ndọhọ mbufo, ndien mbufo ikakpan̄ke utọn̄, edi ẹsọn̄ ibuot+ ẹbiat ewụhọ Jehovah ẹnyụn̄ ẹyat esịt, mbufo ẹnyụn̄ ẹdomo ndidọk obot+ oro. 44  Ekem mme Amorite emi ẹdụn̄de ke obot oro ẹma ẹwọrọ ẹdisobo ye mbufo ẹnyụn̄ ẹbịne mbufo,+ kpa nte emi ọkwọk ebịnede owo, ẹnyụn̄ ẹsuan mbufo ke Seir tutu esịm Hormah.+ 45  Ke oro ebede mbufo ẹnyọn̄ ẹdi ẹnyụn̄ ẹdituan̄a ke iso Jehovah, edi Jehovah ikakpan̄ke utọn̄ inọ mbufo,+ ikonyụn̄ ikopke eseme mbufo.+ 46  Ndien mbufo ẹdụn̄ ke Kadesh ẹbịghi, ke adan̄a ediwak usen emi mbufo ẹkedụn̄de do.+

Mme Ikọ Idakisọn̄