Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Daniel 3;1-30

3  Edidem Nebuchadnezzar anam mbiet+ gold emi ọniọn̄de ke cubit ata, ubom onyụn̄ edide cubit itiokiet. Ndien owụk enye ke unaisọn̄ Dura ke ikpehe obio ukara Babylon.+  Ndien Edidem Nebuchadnezzar ọdọn̄ ẹkekot mme satrap ye mme etubom+ ye mme andikara ye mme ọnọitem ye mme akama-okụk ye mme ebiereikpe ye mme ekpeikpe obio+ ye kpukpru mme akama-itie ke mme ikpehe obio ukara, ẹte ẹdi edinam editọn̄ọ ndikpono mbiet emi Edidem Nebuchadnezzar okowụkde.  Ekem mme satrap+ ye mme etubom ye mme andikara ye mme ọnọitem ye mme akama-okụk ye mme ebiereikpe ye mme esịn emem ke obio ye kpukpru mme akama-itie ke mme ikpehe obio ukara ẹsop idem man ẹdụk edinam editọn̄ọ ndikpono mbiet oro Edidem Nebuchadnezzar okowụkde, mmọ ẹnyụn̄ ẹda ke iso mbiet oro Nebuchadnezzar okowụkde.  Ndien ọnọ-ntọt ofiori+ ke ọkpọsọn̄ uyo ete: “O mbufo mme idụt ye obio ye usem, ẹdọhọ mbufo,+  ẹte, ke ini mbufo ẹkopde uyo nnụk ye ifiom ye ndido ye ekpri harp ye ndido urụk ye obukpon̄ ye kpukpru orụk n̄kpọ ubre ikwọ,+ mbufo ẹduọn̄ọ ke isọn̄ ẹtuak ibuot ẹnọ mbiet gold emi Edidem Nebuchadnezzar okowụkde.  Ndien ẹyetop owo ekededi eke mîduọhọ ke isọn̄ ituak ibuot+ ẹsịn ke akwa ikan̄ eke asakde+ kpa ke ndondo oro.”+  Ntem, ke ndondo oro ẹkopde uyo nnụk ye ifiom ye ndido ye ekpri harp ye ndido urụk ye kpukpru orụk n̄kpọ ubre ikwọ, kpukpru owo+ ye idụt ye usem ẹduọn̄ọ ke isọn̄ ẹtuak ibuot ẹnọ mbiet gold emi Edidem Nebuchadnezzar okowụkde.  Ndien, kpa idaha oro, ndusụk mme Chaldean ẹdi ẹdibia mme Jew.+  Mmọ ẹbọrọ ẹnyụn̄ ẹdọhọ Edidem Nebuchadnezzar ẹte: “O edidem, yak itọn̄ uwem ọsọn̄ fi ke nsinsi.+ 10  O edidem, afo ama owụk ewụhọ ete yak owo ekededi eke okopde uyo nnụk ye ifiom ye ndido ye ekpri harp ye ndido urụk ye obukpon̄ ye kpukpru orụk n̄kpọ ubre ikwọ,+ ọduọ ke isọn̄ atuak ibuot ọnọ mbiet gold; 11  n̄ko yak ẹtop owo ekededi eke mîduọhọ ke isọn̄ ituak ibuot ẹsịn ke akwa ikan̄ eke asakde.+ 12  Odu ndusụk mme Jew emi afo ekemekde ndise mban̄a ikpehe obio ukara Babylon,+ kpa Shadrach ye Meshach ye Abednego; n̄kparawa emi ibatke fi ke baba n̄kpọ kiet, O edidem, mmọ inamke n̄kpọ mme abasi fo, inyụn̄ ituakke ibuot inọ mbiet gold emi afo okowụkde.”+ 13  Ntem Nebuchadnezzar ọdọhọ ke iyatesịt ye ifụtesịt+ ete ẹkeda Shadrach ye Meshach ye Abednego+ ẹdi. Ndien ẹda mmọ ẹdi iso edidem. 14  Nebuchadnezzar ọbọrọ onyụn̄ ọdọhọ mmọ ete: “O Shadrach ye Meshach ye Abednego, ndi enen̄ede edi akpanikọ ke mbufo inamke n̄kpọ mme abasi mi,+ inyụn̄ ituakke ibuot inọ mbiet gold emi n̄kowụkde?+ 15  Ntre edieke edide mbufo ẹmeben̄e idem man ke ini mbufo ẹkopde uyo nnụk ye ifiom ye ndido ye ekpri harp ye ndido urụk ye obukpon̄ ye kpukpru orụk n̄kpọ ubre ikwọ,+ mbufo ẹduọn̄ọ ke isọn̄ ẹtuak ibuot ẹnọ mbiet oro n̄kanamde, oro ọyọfọn. Edi edieke mbufo mîtuakke ibuot, kpa idaha oro ẹyetop mbufo ẹdọn̄ ke akwa ikan̄ eke asakde. Ndien ewe abasi odu emi ekemede ndinyan̄a mbufo nsio mi ke ubọk?”+ 16  Shadrach ye Meshach ye Abednego ẹbọrọ, ẹnyụn̄ ẹdọhọ edidem ẹte: “O Nebuchadnezzar, ufọn idụhe nnyịn ndibọrọ fi n̄kpọ emi.+ 17  Edieke ẹtopde nnyịn ẹdọn̄ ke ikan̄, Abasi emi nnyịn inamde n̄kpọ inọ ekeme ndinyan̄a nnyịn. Enye ayanyan̄a nnyịn, O edidem, osio ke akwa ikan̄ eke asakde onyụn̄ anyan̄a nnyịn osio fi ke ubọk.+ 18  Edi edieke mînyan̄ake, fiọk, O edidem, ete ke mme abasi fo idịghe mmọ emi nnyịn inamde n̄kpọ inọ, nnyịn idinyụn̄ ituakke ibuot inọ mbiet gold emi afo okowụkde.”+ 19  Ntem Nebuchadnezzar ofụt esịt, iso esie onyụn̄ okpụhọde nte enye esede Shadrach ye Meshach ye Abednego. Ndien enye ọbọrọ onyụn̄ ọdọhọ ẹnam akwa ikan̄ oro asak utịm ikatiaba akan nte akam esidide. 20  Ndien enye ọdọhọ irenowo emi ẹkopde odudu+ ke udịmekọn̄ esie ete ẹbọp Shadrach ye Meshach ye Abednego, man ẹtop mmọ ẹdọn̄ ke akwa ikan̄ eke asakde.+ 21  Ndien ẹbọp mmọ ye ọfọn̄ mmọ ke idem ye mme ewụra mmọ ye mme itam mmọ ye mme edisịnen̄kpọ mmọ eken ẹnyụn̄ ẹtop mmọ ẹdọn̄ ke akwa ikan̄ eke asakde. 22  Sia uyo edidem ọkọsọn̄de, ẹkenyụn̄ ẹnamde akwa ikan̄ oro asak ebe nde, n̄kparawa emi ẹkemende Shadrach ye Meshach ye Abednego ke akwa edemeikan̄ oro okowot. 23  Edi n̄kparawa eken, kpa owo ita oro, Shadrach ye Meshach ye Abednego, ẹduọn̄ọ ke esịt akwa ikan̄ eke asakde, kpa nte ẹkebọpde mmọ.+ 24  Ndien ndịk anam Edidem Nebuchadnezzar, enye onyụn̄ obụmede adaha ke enyọn̄. Ndien enye ọbọrọ onyụn̄ ọdọhọ ikpọ mbọn̄ esie ete: “Nte idịghe owo ita ke nnyịn ikọbọp itop idọn̄ ke esịt ikan̄?”+ Ndien mmọ ẹbọrọ ẹnyụn̄ ẹdọhọ edidem ẹte: “Edi ntre, O edidem.” 25  Enye ọbọrọ onyụn̄ ọdọhọ ete: “Sese! Ami n̄kụt owo inan̄ ẹsan̄ade ifụre ifụre ke esịt ikan̄, ndien n̄kpọ inamke mmọ, ọyọhọ owo inan̄ onyụn̄ ebiet eyen mme abasi.”+ 26  Ekem Nebuchadnezzar asan̄a ekpere enyịnusụn̄ akwa ikan̄ oro.+ Enye ọbọrọ onyụn̄ ọdọhọ ete: “Shadrach, Meshach, ye Abednego, mbufo mme asan̄autom Ata Edikon̄ Abasi,+ ẹwọn̄ọ ẹdi mi!” Ndien Shadrach, Meshach, ye Abednego ẹwọn̄ọ ke esịt ikan̄ oro ẹdi. 27  Ndien mme satrap ye mme etubom ye mme andikara ye ikpọ owo+ edidem emi ẹkesopde idem ẹkụt n̄kparawa emi, nte ke ikan̄ ikanamke mmọ n̄kpọ ndomokiet ke idem,+ inyụn̄ ifrike ndomo idet kiet ke ibuot mmọ,+ ọfọn̄ mmọ inyụn̄ ifọbọke, owo ikonyụn̄ ikopke mmọ utebe ikan̄ ke idem. 28  Nebuchadnezzar ọbọrọ onyụn̄ ọdọhọ ete: “Yak itoro enyene Abasi Shadrach, Meshach, ye Abednego,+ emi ọkọdọn̄de angel+ esie onyụn̄ anyan̄ade mme asan̄autom esie emi ẹbuọtde idem ye enye,+ ẹnyụn̄ ẹsịnde ndinam uyo edidem, ẹnyụn̄ ẹnyịmede ndiyak uwem mmọ atak, koro mmọ mîdinamke n̄kpọ+ mîdinyụn̄ ituakke ibuot+ inọ abasi ekededi ke mîbọhọke Abasi mmọ.+ 29  Ndien ami mmowụk ewụhọ nte,+ amaedi owo ke idụt ye obio ye usem ekededi eke etịn̄de idiọk adian Abasi Shadrach, Meshach, ye Abednego, ẹyekpok enye mbak mbak,+ ẹnyụn̄ ẹnam ufọk esie akabade edi ekwe mbio obio;+ koro abasi efen mîdụhe eke ekemede ndinyan̄a nte enye emi.”+ 30  Ndien edidem anam n̄kpọ ọfọn ye Shadrach ye Meshach ye Abednego ke ikpehe obio ukara Babylon.+

Mme Ikọ Idakisọn̄