Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Daniel 11;1-45

11  “Ndien ke akpa isua Darius owo Media,+ ami ndaha nda nte andisọn̄ọ enye idem nnyụn̄ ntie nte ọkpọsọn̄ ebiet nnọ enye.  Ndien ke emi nyasian fi se idide akpanikọ:+ “Sese! Ndidem ita ẹyedaha ẹda ke Persia,+ ọyọhọ inan̄+ oyonyụn̄ ọkọ ediwak inyene akan kpukpru mbon eken.+ Ndien ke ndondo oro enye ọsọn̄ọde ke inyene esie, enye eyedemede kpukpru n̄kpọ ẹdaha ẹn̄wana ye obio ubọn̄ Greece.+  “Ndien akwa edidem ayadaha ada akara ye akwa ubọn̄+ onyụn̄ anam kpa nte enye amade.+  Ndien ke enye ama akadaha ada,+ ẹyesuan obio ubọn̄ esie ẹnyụn̄ ẹbahade enye ẹsịn ke n̄kan̄ ofụm mbinan̄+ ke ikpaenyọn̄,+ edi owo idinọhọ nditọ+ esie idinyụn̄ ibietke ubọn̄ emi enye akakarade; koro ẹyedịbede obio ubọn̄ esie ẹfep, ẹnyụn̄ ẹda ẹnọ mbon en̄wen eke mîsan̄ake n̄kpọ ye mmọ.  “Ndien edidem usụk, oro edi, kiet ke otu mbọn̄ esie, ayakabade okop odudu; ndien enye ayakan enye onyụn̄ akara ye akwa ubọn̄ emi okponde akan odudu ukara enye eken.  “Ndien ama ekem ke utịt mme isua, mmọ ẹyedian idem ye kiet eken, ndien eyenan̄wan edidem usụk eyedi ke ọtọ edidem edere ndinam ediomi. Edi eyenan̄wan emi idikaha iso inyene odudu ubọk esie;+ edidem idinyụn̄ isọn̄ọke ida, ubọk esie idinyụn̄ isọn̄ọke ida; ndien ẹyeyak eyenan̄wan emi ẹnọ, enye ye mmọ oro ẹdade enye ẹdi, ye andibon enye, ye andinam enye okop odudu ke ini oro.  Ndien owo kiet emi otode ke n̄kọk+ orụn̄ eyenan̄wan emi ayadaha ada ke itie esie, ndien enye eyedi ebịne mbonekọn̄ onyụn̄ odụk ọkpọsọn̄ ebiet edidem edere onyụn̄ an̄wana ye mmọ onyụn̄ akan.  N̄ko enye ayasan̄a ye mme abasi+ mmọ, ye mme editara mbiet mmọ, ye ndiye n̄kpọ silver mmọ ye eke gold ye mbuotekọn̄, edi Egypt. Ndien enye eyesịk ọkpọn̄ edidem edere ke ndusụk isua.  “Ndien enye oyodụk obio ubọn̄ edidem usụk onyụn̄ afiak ọnyọn̄ ke isọn̄ esie. 10  “Ndien amaedi nditọ esie, mmọ ẹyetịm idem ẹnyụn̄ ẹsop akwa udịmekọn̄ ọtọkiet. Ndien enye ọyọdọdiọn̄ edi onyụn̄ editọ ọyọhọ nte mmọn̄ ukwọ onyụn̄ asan̄a ebe. Edi enye ayafiak ọnyọn̄, oyonyụn̄ etịm idem aka ọkpọsọn̄ ebiet esie. 11  “Ndien edidem usụk ayayat esịt onyụn̄ adaha aka ndin̄wana ye enye, oro edi, ye edidem edere; ndien enye ayanam akwa otuowo ẹdaha ẹda, ndien ẹyeda otuowo emi ẹsịn owo oro ke ubọk.+ 12  Ndien ẹyemen otuowo emi ẹdaha. Enye eyemenede esịt ke enyọn̄,+ enye oyonyụn̄ anam ediwak tọsịn owo ke mme itie duop ẹduọn̄ọ; edi enye ididaha ọkpọsọn̄ idaha esie inam n̄kpọ. 13  “Ndien edidem edere enyene ndifiak nnyọn̄ n̄ketịm otuowo eke ẹwakde ẹkan eke akpa; ndien ke utịt mme ini, ke ndusụk isua ẹma ẹkebe, enye eyedi, asan̄a ye akwa udịmekọn̄,+ onyụn̄ asan̄a ye ediwak inyene.+ 14  Ndien ke mme ini oro ediwak owo ẹyedaha ẹda ẹn̄wana ye edidem usụk. “Ndien ẹyenam nditọ mbon n̄wo emi ẹdide orụk fo ẹtiene ẹdomo ndinam n̄kukụt osu;+ ndien mmọ ẹyetuak ukot ẹduọn̄ọ.+ 15  “Ndien edidem edere eyedi edikịbi ibombom+ akanade onyụn̄ ada obio ibibene enyene. Ndien amaedi ubọk edem usụk, mmọ idisọn̄ọke ida, ndimek ikọt esie n̄ko idisọn̄ọke ida; odudu idinyụn̄ idụhe ndisọn̄ọ nda. 16  Ndien enye emi edide ndin̄wana ye enye ayanam nte enye amade, idinyụn̄ idụhe owo eke adade enye ke iso. Ndien enye ayada ke isọn̄ N̄kpọmbana,+ nsobo oyonyụn̄ odu enye ke ubọk.+ 17  Enye eyetịm ebiere ndisan̄a ye odudu ofụri obio ubọn̄ esie ndi, ẹyenyụn̄ ẹnam ediomi+ ye enye; ndien enye ayanam n̄kpọ uforo uforo.+ Ndien ẹyenọ enye odudu ndisobo eyenan̄wan iban. Ndien eyenan̄wan emi idisọn̄ọke ida, idinyụn̄ ikaha iso ida ye enye.+ 18  Ndien enye ọyọwọn̄ọde iso ese mme isuo+ onyụn̄ ada ediwak enyene. Ndien etubom kiet ayanam esuene oro otode enye okûsịm enye, man esuene esie okụre. Enye ayanam esuene emi afiak etiene enye. 19  Ndien enye ọyọwọn̄ọde iso ese n̄kpọsọn̄ ebiet idụt esie, oyonyụn̄ atuak ukot ọduọ, ndien owo idikwe enye.+ 20  “Ndien owo emi anamde ọbọ-utomo+ asan̄a ebe ke ediye obio ubọn̄ ayadaha ada ke itie esie,+ ndien ẹyesobo enye ke usen ifan̄, edi idịghe ke iyatesịt inyụn̄ idịghe ke ekọn̄. 21  “Ndien owo kiet emi ẹsịnde ke ndek ayadaha ada ke itie esie,+ edi mmọ idinọhọ enye uku obio ubọn̄; ndien enye eyedi ke ini ifụre+ onyụn̄ ada obio ubọn̄ ke nneminua.+ 22  Ndien ubọk+ mmọn̄ ukwọ ọyọtọ ofụk mmọ ke ntak esie, ẹyenyụn̄ ẹsobo mmọ;+ ntre n̄ko+ ye Adausụn̄+ ediomi.+ 23  Ndien ke ntak emi mmọ ẹdiande idem ye enye, enye ayabian̄a abian̄a onyụn̄ ọdọk edi onyụn̄ ada ekpri idụt okop odudu.+ 24  Ke ini ifụre,+ enye oyodụk mfọnn̄kan ikpehe obio ukara onyụn̄ anam se mme ete esie ye mme ete ete esie mîkanamke. Enye ayasuan mbụme ye n̄kpọ n̄wo ye inyene ke otu mmọ; oyonyụn̄ aduak idiọk+ aban̄a mme ebiet ukpeme, edi edidi ke esisịt ini kpọt. 25  “Ndien enye eyedemede odudu esie ye esịt esie asan̄a ye akwa udịmekọn̄ akan̄wana ye edidem usụk; ndien edidem usụk ọyọdọn̄ idem asan̄a ye akwa udịmekọn̄ emi awakde etieti aka ekọn̄. Edi enye idisọn̄ọke ida, koro mmọ ẹyeduak idiọk ẹban̄a enye. 26  Ndien mbon emi ẹdiade ndunịm udia esie ẹyedi ntak iduọ esie. “Ndien ẹyesuan udịmekọn̄ esie, ediwak owo ẹyenyụn̄ ẹduọn̄ọ ẹkpan̄a. 27  “Ndien amaedi ndidem iba emi, esịt mmọ oyoyom ndinam idiọk, ndien mmọ ẹyetie ke okpokoro+ kiet ẹsu nsu.+ Edi baba n̄kpọ kiet idikwe unen,+ koro utịt odude kan̄a ebet ini emi ẹkenịmde.+ 28  “Ndien enye ayada ediwak inyene afiak ọnyọn̄ isọn̄ esie, esịt esie oyonyụn̄ asua edisana ediomi.+ Ndien enye ayanam n̄kpọ uforo uforo+ onyụn̄ afiak ọnyọn̄ isọn̄ esie. 29  “Enye ayafiak aka ke ini emi ẹkenịmde,+ ndien enye eyedi edin̄wana ye edem usụk;+ edi ukperedem iditiehe nte akpa. 30  Ndien mme nsụn̄ikan̄ Kittim+ ẹyedi ẹdin̄wana ye enye, ndien enye oyokop mfụhọ. “Ndien enye ayafiak ọnyọn̄ onyụn̄ akayat esịt+ ye edisana ediomi+ onyụn̄ anam n̄kpọ uforo uforo; ndien enye ayafiak aka akanam n̄kpọ ye mbon oro ẹkpọn̄de edisana ediomi. 31  Ndien mbonekọn̄* ẹyeto enye ke idem ẹdaha ẹda; ndien mmọ ẹyesabade edisana ebiet,+ kpa ọkpọsọn̄ ebiet, ẹnyụn̄ ẹmen uwa ofụri ini ẹfep.+ “Ndien mmọ ẹyenịm mbubiam n̄kpọ+ oro adade nsobo edi.+ 32  “Ndien amaedi mbon oro ẹnamde idiọk ẹdian ediomi+ oro, enye ayada nneminua+ anam mmọ ẹdi mbon mfiakedem.+ Edi mbon oro ẹfiọkde Abasi+ mmọ ẹyekan+ ẹnyụn̄ ẹnam n̄kpọ uforo uforo. 33  Ndien amaedi mbon emi ẹnyenede ikike+ ke otu mme owo, mmọ ẹyenam ediwak owo ẹnyene ifiọk.+ Ndien ẹyenam mmọ ẹtuak ukot ẹduọn̄ọ ke akan̄kan̄ ye ke edemeikan̄, ye ke ntan̄mfep ye ke mbụme,+ ke ndusụk usen. 34  Edi ke ini ẹnamde mmọ ẹtuak ukot ẹduọn̄ọ, ẹyenọ mmọ esisịt un̄wam;+ ndien ediwak owo ẹyeda nneminua ẹdian idem ye mmọ.+ 35  Ndien ẹyenam ndusụk mbon oro ẹnyenede ikike ẹtuak ukot ẹduọn̄ọ,+ man ẹsion̄o mmọ ndek ke idem ẹnyụn̄ ẹnam mmọ ẹsana ẹnyụn̄ ẹnam mmọ ẹfia,+ tutu esịm utịt ini;+ koro utịt odude kan̄a ebet ini emi ẹkenịmde.+ 36  “Ndien edidem ayanam kpa nte enye amade, onyụn̄ emenede idem ke enyọn̄ onyụn̄ ada idem ke n̄kpọ akan kpukpru mme abasi;+ enye eyetịn̄ mme n̄kpọ oro ẹkpade owo idem adian Abasi mme abasi.+ Ndien enye oyokụt unen tutu ifụtesịt okụre;+ koro ẹnyene ndinam n̄kpọ emi ẹkebierede. 37  Ndien enye idikereke iban̄a Abasi mme ete esie; idinyụn̄ ikereke iban̄a se iban ẹmade, idinyụn̄ ikereke iban̄a baba abasi kiet, edi enye eyemenede idem ke enyọn̄ akan kpukpru owo.+ 38  Edi enye ayada itie esie okpono abasi n̄kpọsọn̄ ebiet; onyụn̄ ada gold ye silver ye ọsọn̄urua itiat ye ndiye n̄kpọ okpono abasi oro mme ete esie mîkọfiọkke. 39  Ndien enye ayada esen abasi adian idem an̄wana uforo uforo ye ata n̄kpọsọn̄ ebiet. Enye ayanam owo ekededi eke ọdiọn̄ọde enye okpon ke ubọn̄, oyonyụn̄ anam mmọ ẹkara ke otu ediwak owo; oyonyụn̄ edeme isọn̄ ke ekọmurua. 40  “Ndien ke utịt ini edidem usụk+ ye enye ẹyenụk kiet eken, ndien edidem edere ayada mme chariot ye mme awat enan̄-mbakara ye ediwak nsụn̄ikan̄ obụmede an̄wana ye enye; ndien enye oyodụk mme idụt oro onyụn̄ ọtọ ofụk mmọ onyụn̄ asan̄a ebe. 41  Enye oyodụk+ isọn̄ N̄kpọmbana+ n̄ko, ndien ẹyenam ediwak idụt ẹtuak ukot ẹduọn̄ọ.+ Edi mmọ emi ẹdibọhọde ẹwọrọ enye ke ubọk ẹdi Edom ye Moab+ ye mme etubom nditọ Ammon. 42  Ndien enye ayanyanade ubọk amia mme idụt oro; ndien idụt Egypt+ idibọhọke. 43  Ndien enye ayakara mme ndedịbe n̄kpọuto emi ẹdide gold ye silver onyụn̄ akara kpukpru ndiye n̄kpọ Egypt. Ndien mbon Libya ye mbon Ethiopia ẹyetiene nde ikpat esie. 44  “Edi etop oyoto ke edem usiahautịn+ ye edem edere editịmede enye,+ ndien enye ọyọwọrọ ye akwa ifụtesịt aka man ọkọsọhi onyụn̄ osobo ediwak owo.+ 45  Ndien enye oyowụk tent ufọk ubọn̄ esie ke ufọt akwa inyan̄ ye edisana obot N̄kpọmbana;+ ndien enye eyesịm utịt esie,+ idinyụn̄ idụhe owo eke an̄wamde enye.+

Mme Ikọ Idakisọn̄

At. Ed., “ubọk.”