Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Amos 7;1-17

7  Emi edi se Jehovah Akakan Ọbọn̄ Andikara akanamde mi n̄kụt, ndien, sese! enye anam udịm n̄kukun̄kpọyọriyọ ẹwọrọ ke ini se ẹketọde ke ukperedem ọtọn̄ọde nditịbe.+ Ndien, sese! ekedi se ẹketọde ke ukperedem ke ẹma ẹkesịbe mbiet ẹda ẹsọk edidem.  Ndien edikem ke enye ama akata ikọn̄ okụre ke isọn̄, ami ndọhọ nte: “O Jehovah Akakan Ọbọn̄ Andikara, mbọk, fen nọ mmọ.+ Anie edidaha ada ke Jacob? Koro enye ekpride!”+  Jehovah okpụhọ ekikere* ke n̄kpọ emi.+ Jehovah onyụn̄ ọdọhọ ete, “Emi iditịbeke.”  Emi edi se Jehovah Akakan Ọbọn̄ Andikara akanamde mi n̄kụt, ndien, sese! Jehovah Akakan Ọbọn̄ Andikara ada ikan̄ esịn utọk;+ ndien ikan̄ oro ata akwa udem onyụn̄ ata obot.  Ndien ami ndọhọ nte: “O Jehovah Akakan Ọbọn̄ Andikara, mbọk, tre.+ Anie edidaha ada ke Jacob? Koro enye ekpride!”+  Jehovah okpụhọ ekikere* ke n̄kpọ emi.+ Jehovah Akakan Ọbọn̄ Andikara onyụn̄ ọdọhọ ete, “Oro n̄ko iditịbeke.”  Emi edi se enye akanamde mi n̄kụt, ndien, sese! Jehovah ada ke ibibene emi ẹdade urụk udomon̄kpọ ẹdomo,+ urụk udomon̄kpọ onyụn̄ odu enye ke ubọk.  Ekem Jehovah obụp mi ete: “Amos, nso ke afo okụt?” Ndien mbọrọ nte: “Urụk udomon̄kpọ.” Ndien Jehovah ọdọhọ ete: “Sese, mmọn̄ nda urụk udomon̄kpọ ndomo ikọt mi Israel.+ Ndifenke mmọ aba.+  Ndien mme edikon̄ ebiet Isaac+ iditreke ndina ndon, ẹyenyụn̄ ẹsobo+ ndisana ebiet+ Israel; ndien nyada akan̄kan̄ ntiene ufọk Jeroboam.”+ 10  Ndien Amaziah oku Bethel+ ọdọn̄ ẹkedọhọ Jeroboam+ edidem Israel, ete: “Amos omodụk odu aban̄a fi ke esịtufọk Israel.+ Isọn̄ ikemeke ndiyọ kpukpru ikọ esie.+ 11  Koro ntem ke Amos ọdọhọ ete, ‘Jeroboam ayakpa ke akan̄kan̄; ndien Israel iditreke ndikpọn̄ isọn̄ esie n̄ka ntan̄mfep.’”+ 12  Ndien Amaziah ọdọhọ Amos ete: “O afo okụt-n̄kukụt,+ fehe ka isọn̄ Judah, nyụn̄ ta uyo do, ndien emekeme nditịn̄ ntịn̄nnịm ikọ do. 13  Edi kûtịn̄ aba ntịn̄nnịm ikọ ke Bethel,+ koro enye edide edisana ebiet edidem+ ye ufọk obio ubọn̄.” 14  Ndien Amos ọbọrọ onyụn̄ ọdọhọ Amaziah ete: “Ami n̄kedịghe prọfet, n̄konyụn̄ ndịghe eyen prọfet;+ edi n̄kedi ekpemerọn̄+ ye owo emi etịbide fig eto sycamore. 15  Ndien Jehovah emen mi ọkpọn̄ nditiene otuerọn̄, Jehovah onyụn̄ ọdọhọ mi ete, ‘Ka, ketịn̄ ntịn̄nnịm ikọ nọ ikọt mi Israel.’+ 16  Ndien ke emi kop ikọ Jehovah, ‘Nte afo ọdọhọ: “Kûtịn̄ ntịn̄nnịm ikọ uban̄a Israel,+ kûnyụn̄ utịn̄ ikọ ndomokiet+ uban̄a ufọk Isaac”? 17  Mmọdo ntem ke Jehovah ọdọhọ ete: “N̄wan fo ayakabade edi akpara ke obio.+ Nditọiren fo ye nditọiban fo ẹyenyụn̄ ẹkpan̄a ke akan̄kan̄. Ndien ẹyeda urụk ẹdomo isọn̄ fo ẹdeme. Afo oyonyụn̄ akpa ke ndedehe isọn̄;+ ndien Israel iditreke ndikpọn̄ isọn̄ esie n̄ka ntan̄mfep.”’”+

Mme Ikọ Idakisọn̄

At. Ed., “atua n̄kpọfiọk.”
At. Ed., “atua n̄kpọfiọk.”