Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Mme N̄ke 27;1-27

27  Kûbụre mbụre uban̄a n̄kpọn̄,+ koro afo mûfiọkke se usen edimande.+  Yak esenowo otoro fi, okûdi inua fo otoro fi; yak edi owo esenidụt, okûdi n̄kpọkinua fo otoro fi.+  Itiat odobi, ntan onyụn̄ edi mbiomo+—edi iyatesịt ndisịme owo odobi akan mmọ mbiba.+  Ifụtesịt edi mfiomo, n̄ko ye ọkpọsọn̄ iyatesịt,+ edi anie ekeme ndida ufụp ke iso?+  Ndisua nnọ owo ke iso+ ọfọn akan ndịbe ima.  Unan emi owo ima ọnọde ẹdi unan akpanikọ,+ edi ẹbeben̄e ntịminua asua.+  Ukpọn̄ eke adiade oyụhọ eyedịghi obukpa ọkwọk ke ikpat, edi kpukpru ndotndot n̄kpọ ẹnenịn̄e ukpọn̄ eke okopde biọn̄.+  Kpa nte inuen eke efede ọkpọn̄ efọk esie,+ ntre ke edi ye owo eke efehede ọkpọn̄ ebiet esie.+  Aran ye incense+ ẹnam esịt adara, ntre n̄ko ke nsan̄a owo enem ke ntak item ofụri ukpọn̄ oro enye ọnọde.+ 10  Kûkpọn̄ nsan̄a fo m̀mê nsan̄a usọ, kûnyụn̄ udụk ufọk eyenuka ke usen afanikọn̄. Mbọhọidụn̄ emi ekperede ọfọn akan eyeneka emi odude anyan usụn̄.+ 11  Eyen mi, nyene ọniọn̄, nyụn̄ dat mi esịt,+ man n̄kụt se ndibọrọde owo eke osụn̄ide mi.+ 12  Owo mbufiọk ada okụt afanikọn̄ edịbe;+ edi ọkọi ebe aka onyụn̄ ọkọbọ ufen.+ 13  Bọ owo ọfọn̄idem edieke enye etiede ubiọn̄ ọnọ esenowo;+ ndien edieke enye eduede ye n̄wan esenidụt, bọ enye ubiọn̄.+ 14  Owo eke ọkọmde ekemmọ owo ke ọkpọsọn̄ uyo ke tụhi-tụhi usenubọk, ẹyebat oro ẹnọ enye nte isụn̄i.+ 15  N̄wanndọ emi edide owo utọk etie nte ndụtndụt ọkọmufọk emi ebịnde-bịn owo osio ke usen uyịre uyịre edịm.+ 16  Owo ekededi eke esịnde enye ke ufọk esịn ofụm ke ufọk, onyụn̄ eyere aran ke ubọk nnasia esie. 17  Ukwak aban ukwak ọsọp. Ntre ke owo anam iso owo efen ayama.+ 18  Owo eke ekpemede eto fig ayadia mfri esie,+ ndien ẹyekpono owo eke ekpemede eteufọk esie.+ 19  Nte iso ekemde ye iso ke mmọn̄, ntre ke esịt owo ekem ye esịt owo. 20  Udi* ye ebiet nsobo+ iyụhọke;+ ntre n̄ko ke enyịn owo mîyụhọke.+ 21  Ẹnịm eso utịm ẹnọ silver+ ẹnyụn̄ ẹnịm ikan̄ utịm ẹnọ gold;+ ndien itoro owo owụt se enye edide.+ 22  Ọkpọkọm afo esịn ndisịme owo ke udụn̄ ye wheat* ada eyenudụn̄ etịm tutu enye ọdọrọ, ndisịme esie idikpọn̄ke enye.+ 23  Tịm fiọk nte otuerọn̄ fo etiede. Kere ban̄a otu ufene fo;+ 24  koro n̄kpọuto mîdidụhe ke nsinsi,+ anyanya mîdinyụn̄ idụhe ke ofụri emana. 25  Awawa mbiet ẹkpan̄a, mbufa mbiet ẹnyụn̄ ẹsiaha, ẹnyụn̄ ẹtan̄ ikọn̄ obot ẹbok ọtọkiet.+ 26  Mme abak okukịm erọn̄ ẹna ẹnọ edisịnen̄kpọ fo,+ mme okpo ebot ẹnyụn̄ ẹdi ekọmurua in̄wan̄. 27  Mmọn̄eba ebot awak ekem ke udia fo, ke udia mbonufọk fo, ye ke se nditọiban fo ẹdade ẹdu+ uwem.

Mme Ikọ Idakisọn̄

Heb., “Sheol.”
Mîdịghe, emi ekeme ndidi “barley.”